1 Pilistiya hi haveyan Isileli elal oya Gilbowa elana. Yaka Isileli hi louem elal ge hi gewi hi lopaaligaliya to. 2 He hi petaki Sol ge natunau eliyaa nige ali bwaga, yaka natunau bolau Diyontan, Abinadab, ge Malki-Suwa hi lopaaligal. 3 Pilistiya hi haveyan gagasisi Sol eliyana, yaka toloegipoyo gau hi alihin Sol hi howa pwamwaun ge i lomwan nabi.

4 Inoke Sol i baek wana elohaveyan ana tokaval elana i ba, “Wam haveyan kilepana u momol tagilan abanaa yaka u howa paaligau. Bahi Pilistiya, heliya nige Yehoba hi aatena ge nige gotomwa yoho paganina hi aahe, nihi nenem tuwau nihi papalomwani ge nihi hohowa paaligau.”

Yaa wana elohaveyan ana tokaval i lovakun nabi yaka nige i giginol. Inoke Sol totona wana haveyan kilepana i ahe, yaka i pamilil ge i soguek pwatanaa. 5 Sauga wana elohaveyan ana tokaval i kite Sol iyaka i aliga, inoke iya al ge wana haveyan kilepana i ahe i pamilil ge i soguek pwatanaa, yaka alona ge Sol hi aliga toyawa. 6 Inoke Sol alonau natunau bolau eton, i ola al wana elohaveyan ana tokaval ge wana tolohaveyan, gegewel hi aliga lan maisena o elana.

7 Isileli bolo hi minaa abwabwa Oya Gilbowa gabulanaa ge wewel Yolidani labi leunati, hi kite wali tolohaveyan iyaka hi lou, ge wasa hi hago Sol alonau ge natunau iyaka hi aliga. Inoke wali panuwa ona hi lou luwail, yaka Pilistiya hi na hi holavel.

8 Hi kenu lan i gan, yaka Pilistiya hi na Isileli bolo hi aliga wali bugubugul waiwaisal hi bugulan, inoke Sol ge natunau eton bwaliwawagal* Bwaliwagawaga ana sapu te gamagal toto iyaka i aliga tuwana. hi pwawal Oya Gilbowa elana. 9 Inoke Sol mwamwalina hi gotomwa ge wana elohaveyan hi bugulan. Yaka elopapatuna hi patunal hi na Pilistiya ana labi gegewena elal, inoke wana yaomal wasana hi wasaan wali yabowaineyau wali limi tapwalolowa ge gamagalau elal. 10 Wana elohaveyan hi teleliya wali yabowaine Astolet* yabowaine Astolet 1Samuwela 7:3 ana epwamwananal paiya nu kite. wana limi tapwalolo gamwanaa, ge tuwana hi pakuki panuwa Bet-San ana gana elana.

11 Panuwa Yabesi, iyoho labi Giliyad elana, wasa hi hago hauna Pilistiya hi ginol Sol elana, 12 yaka wali tolohaveyan waiwaisal gegewel bulina hi nawanawa hi na hi vin panuwa Bet-San. Inoke Sol ge natunau tuwaliya hi ahe lowan panuwa ana gana elana yaka hi pwatanik wali panuwaa Yabesi ge hi tonil. 13 Yaka tutuwaliya hi ahe hi na hi yamwil abwakil tamalik* abwakil tamalik Abatelipuna 21:33 ana epwamwananal paiya nu kite. gabulanaa ge nuwanak kaiwena ali galebu hi palahikan lan ana gewi seben.