2
Deibid I Tabwa Yuda wali Kin
1 Sauga etega al, Deibid i nel* Tabam Deibid i ba topowon Abaiyada Ulim ge Tamim i patuwalali, inoke eliyana Yehoba i neli ge wana nuwatu ni atena. Yehoba elana i ba, “Tab na sikal na na labi Yuda panuwana etega elana na minaa?”
Anana i lahe i ba, “E, nu sikal.”
Yaka Deibid i nel al i ba, “Hauna awan elana na minaa?”
Anana i lahe i ba, “Panuwa Hebiloni.”
2 Inoke Deibid lagonau labui i ahel alonau, etegana Ahinoam Diyeslil yovana ge labuina Abigeil Nabal gagama Kamel abuabulina. 3 I ola al ana hevalau avaliyau lagoliyau ge natuliyau i ahel hi na hi minaa Hebiloni ge awanina ona elal. 4 Yaka Yuda bolauiliyau hi na Hebiloni, inoke enonu hi hol Deibid kokowanaa i tabwa boda Yuda wali kin.
He Deibid wasa i hago te Yabesi, iyoho labi Giliyad, bolauiliyau Sol tuwana iyaka hi ahe ge ga hi teli ola. 5 Inoke elopapatuna i patunal hi na elal ge hi ba, “Yehoba ni muloluagimiu, kaiwena wami tonowak Sol tuwana ku ahe ge ku teli, inoke eliyana wami nunuwana iya kaiwena ku pamasal. 6 Inoke ya awanun Yehoba wana nunuwana ni pamasal hikahikani eliyamiu. Nau al ge ginol waiwaisana toto ku ginol Sol elana lahena na ginol bubun eliyamiu. 7 He wami tonowak Sol iyaka i aliga ge Yuda enonu hi hol kokowawa iyaka ya tabwa wali kin, inoke atemiu ni matuwa ge nuku lohaveyan gagasisi.”* atemiu ni matuwa ge nuku lohaveyan gagasisi Baaba ya gamwana etega te i awanun elal nihi olak elana, yaka alonau nihi lohaveyan Sol ana topihigelgel Pilistiya elal. He panuwa Yabesi nige un Yuda panuwana i oola.
Deibid wana Boda ge Isboset wana Boda Hi Lohaveyan
He Abna, Sol wana tolohaveyan wali tohouwa, iyaka Sol natuna Isboset i ahe hi na panuwa Mahanaim ge i pakin un gegewel al kaiweliya. (puna 8-11)
Lan etega Abna Isboset wana tolohaveyan i nulil hi na panuwa Gibiyon. Yowab Deibid wana tolohaveyan al i nulil, yaka boda labui hi petupatupa-agil wewel kenken etega elana iyoho Gibiyon. Yaka abwe boda labui hi lohaveyan gagasisi, yaa Deibid wana tolohaveyan hi gasisi yaka Abna ge Isileli wali tolohaveyan hi pakokovel ge hi lou. (puna 12-17)
Yowab talina Asahel Abna i take. Abna i baek elana i ba, “Bahi nu tatakeyau. Nige nuwau na loliwa, kaiwena owa Yowab talina.” Yaa Asahel iyoho ya i pepetaki, inoke Abna Asahel i lopaaliga. (puna 18-23)
Yaka abwe Yowab ge talina etega al alana Abisai, avaliyau wali tolohaveyan Abna ge wana boda hi takel. Sabwelu i lolobek Abna ge wana boda hi minaa oya etega pwatanaa ge i yoga Yowab elana i ba, “Besela taulol!” Yaka Yowab i bakuhu lopetaki. (puna 24-28)
Yaka Abna alonau wana tolohaveyan hi sikal Mahanaim. Yaa Yowab alonau wana tolohaveyan Asahel tuwana hi teliya Bedeliyema, yaka abwe hi sikal Hebiloni. (puna 29-32)
*2:1: Tabam Deibid i ba topowon Abaiyada Ulim ge Tamim i patuwalali, inoke eliyana Yehoba i neli ge wana nuwatu ni atena.
*2:7: atemiu ni matuwa ge nuku lohaveyan gagasisi Baaba ya gamwana etega te i awanun elal nihi olak elana, yaka alonau nihi lohaveyan Sol ana topihigelgel Pilistiya elal. He panuwa Yabesi nige un Yuda panuwana i oola.