5
Deibid I Tabwa Isileli ge Yuda wali Kin
1 Sauga etega al abwe Isileli ali un gegewel hi na Deibid hi kite panuwa Hebiloni ge hi baek elana hi ba, “Tunahot ama tutuma owa. 2 Valila Sol iya wama kin, yaa owa te ama Isileli wama tolohaveyan u nunulil haveyan elal. Ge Yehoba i baewa elam i ba, ‘Owa bwaliga nu ola sipi ali tomatahikan no gamagalau Isileli kaiweliya, ge nu tabwa wali tohouwa.’ ”
3 Inoke Hebiloni elana Deibid alonau ge Isileli wali tonowakau hi pebaabateli-agil Yehoba matanaa, yaka enonu hi hol kokowanaa i tabwa wali kin.
4 Deibid wana baliman teti (30) te i tabwa kin, yaka i logugui baliman ali gewi poti (40). 5 Hebiloni elana Yuda i logugui-agil baliman seben ge waikena sikis, yaka abwe Yelusalema elana Isileli ge Yuda gegewel i logugui-agil baliman teti tili (33).
Deibid I Kin - Liwanina Enuna
(2 Samuwela 5:6–8:18)
Deibid Yebusi I Pakokovel ge Yelusalema I Ahe Wana Panuwa
6 Deibid wana tolohaveyan i nulil hi na Yelusalema nihi lohaveyan Yebusi elal, heliya labi o towohiliyau. Heliya hi nuwatu tage Deibid nige bosowaina ni tuk wali panuwaa, yaka hi ba hanaha elana hi ba, “Nige nuku tutuk wama panuwaa. Bwagana tomatakai ge bolo aeliya i kom, bosowailiya ya te nihi palimiu.” 7 Bwagana hi ba ola o, yaa Deibid ge wana tolohaveyan hi tuk ge wali sivesive* Sivesive ana sapu te tolohaveyan wali abamina gasigasisena. Saiyoni hi ahe, yaka abwe alana hi tun Deibid wana Panuwa.
8 Mulaa abwe hi tuk hi haveyan, he lan o elana Deibid i ba, “Ebo nuwala Yebusi ta pakokovel, inoke ta uluhek gol kenken toto wewel ana abawagi* Wewel tubtub etega i gan Yelusalema tolinaa alana Wewel Gihon. Gol etega hi ken tukan wewel i sani tuk panuwa gabulanaa, yaka gol etega hi ken lowan i tupaa wewel o eliyana ali wewel ana abawagi. elana, yaka eliyana avalau ‘bolo aeliya i kom ge tomatakai’ o ta petupatupa-agila, heliya o topihigelgel.” Deibid i ba ola o, heiya te kaiwena gamagalau wali baaba etega hi babaa, “Tomatakai ge bolo aeliya i kom bahi nihi tutuk kin limena elana.”
9 Sauga wali sivesive Deibid i ahe, inoke i na i minaa ge alana i tun Deibid wana Panuwa. Yaka abwe panuwa i tal painan pwabwata, i telipunaa labi toto bwana hi ken ginolil labilabiya mwalu kaiweliya ge i tal tuk panuwa gamwanaa. 10 Yaka Deibid wana gasisi i bwatabwata ya, kaiwena Yehoba Yabowaine Togasisi Hot i minaa elana.
11 Panuwa Taya wali kin alana Hilam wana elopapatuna i patunal hi na Deibid elana, ginebi ge abwakil sida* Sida iya ebwakil gasigasisena ge ana awa waiwaisana, limi ana ginol. He nige i sisiuna Isileli wali labiya, yaa hi ahem labi enuna al elal. ge limi ana totaltal, bolo ebwakil elana ge bolo pat elana. Yaka kin limena hi tal Deibid kaiwena. 12 Inoke Deibid iyaka i atena te Yehoba i patunahot iya i kin Isileli elal, ge wana abalogugui alana i pwabwata wana gamagalau Isileli wali waisi kaiwena.
13 Sauga Deibid panuwa Hebiloni i eguluwan i na i minaa Yelusalema, inoke yowau hi gewi al i alolon-agil, enuna lagonau hot, ge enuna lagonau al. Inoke natunau bolau ge yowau hi gewi al hi abil. 14 He natunau bolau bolo hi abiliya to alaliya i ola hiwe: Samuwa, Sobab, Neitan, Solomon, 15 Ibhal, Elisuwa, Nepeg, Yapiya, 16 Elisama, Eliyada ge Elipelet.
Deibid Pilistiya I Pakokovel
17 Sauga Pilistiya wasa hi hago te Isileli enonu hi hol Deibid kokowanaa i tabwa wali kin, inoke wali tolohaveyan gegewel hi tagil hi na hi loyaan. Wasaliya Deibid i hago, inoke i na ababunsumi elana.* Nige ta aatena bubun ababunsumi toto ya ga i minaa. Yaa totalisi hi gewi hi ba ababunsumi toto gol etega panuwa Adulam labenaa, (1 Samuwela 22:1 ge 2 Sam 23:13-14 nu kite) o ebo ababunsumi etega al Yuda gamwanaa toto valila i bunsumiya (1 Sam 23:14). Totalisi enuna hi ba ababunsumi ya iya sivesive Saiyoni. 18 He Pilistiya iyaka hi nem hi holaviya Abwab Lepaim ge hi pakalaopop. 19 Yaka Deibid i nel* Tabam pat ali etotohi gaganina Ulim ge Tamim hi patuwalali. Ulim ge Tamim nu kite Baaba Ona ali Sapu ana Abaloya elana, lamwa 241 Abatelipuna, Totagil, Yosuwa, Ludi, Daniyela ge Yona ali buki elana. Yehoba elana i ba, “Na nok na lohaveyan Pilistiya elal o bahiwa? Tab nu telel nimwawa?”
Anana Yehoba i lahe i ba, “E, nu nok. Tunahot na telel nimwamwa.”
20 Inoke Deibid alonau wana tolohaveyan hi na panuwa Bal-Pelasim avaliyau Pilistiya hi lohaveyan ge hi pakokoveliya to. Yaka i ba, “Yehoba o topihigelgel i tagalekaleka-agil maniniwa i ola banata gasigasisena.” Inoke heiya te kaiwena panuwa o alana i tun Bal-Pelasim.* Alan Bal-Pelasim ana sapu te “Babala i tagalekaleka.” 21 He Pilistiya wali yabowaineyau gogoginol hi lou luwagiliya to, yaka Deibid ge wana tolohaveyan hi kalivail egonagil.
22 Sauga etega al abwe Pilistiya hi sikal hi holaviya Abwab Lepaim ge hi pakalaopop. 23 Inoke Deibid Yehoba i neli ga ni ginol ola. Wana nel i lahe i ba, “Bahi nuku nonopasapu elal, yaa nuku nopain eliyaa, yaka abwe nuku tuk nuku haveyan elal abwakil popla awoliyaa. 24 Sauga ebo butun nuku hago abwakil popla lamwaliyaa ni ola tolohaveyan aeliya butuna, yaka etimwawa nuku tuk nuku haveyan elal. Kaiwena nau Yehoba na nohouwa awomiwa Pilistiya wali tolohaveyan na lolil.” 25 Yaka Deibid i ginol ola Yehoba wana baaba, inoke alonau ge wana tolohaveyan Pilistiya hi takel ge hi mimi lololil, i telipunaa panuwa Gibiyon i na ana siga panuwa Gesel.
*5:7: Sivesive ana sapu te tolohaveyan wali abamina gasigasisena.
*5:8: Wewel tubtub etega i gan Yelusalema tolinaa alana Wewel Gihon. Gol etega hi ken tukan wewel i sani tuk panuwa gabulanaa, yaka gol etega hi ken lowan i tupaa wewel o eliyana ali wewel ana abawagi.
*5:11: Sida iya ebwakil gasigasisena ge ana awa waiwaisana, limi ana ginol. He nige i sisiuna Isileli wali labiya, yaa hi ahem labi enuna al elal.
*5:17: Nige ta aatena bubun ababunsumi toto ya ga i minaa. Yaa totalisi hi gewi hi ba ababunsumi toto gol etega panuwa Adulam labenaa, (1 Samuwela 22:1 ge 2 Sam 23:13-14 nu kite) o ebo ababunsumi etega al Yuda gamwanaa toto valila i bunsumiya (1 Sam 23:14). Totalisi enuna hi ba ababunsumi ya iya sivesive Saiyoni.
*5:19: Tabam pat ali etotohi gaganina Ulim ge Tamim hi patuwalali. Ulim ge Tamim nu kite Baaba Ona ali Sapu ana Abaloya elana, lamwa 241 Abatelipuna, Totagil, Yosuwa, Ludi, Daniyela ge Yona ali buki elana.
*5:20: Alan Bal-Pelasim ana sapu te “Babala i tagalekaleka.”