Deibid i baek Yowab ge tolohaveyan wali tohouwa elal i ba, “Nuku nok Isileli ana labi gegewena nuku nosolaan, yaka bolau bolo haveyan bosowailiya alaliya nuku ahe, inoke ali gewi na atena.” He Yowab i ba, “Ibwe ge nuwam nu ginol ola?” Yaa Deibid nige wana nuwatu i pipil. Inoke hi na Isileli ana labi gegewena hi nosolaan alan hi ahiahi. Yaka hi sikal Yelusalema ge bolau bolo haveyan bosowailiya ali gewi hi wasaan Deibid elana. (puna 1-9)

Yaka abwe Deibid i atena age nak te i ginol ge atena i lomwan, yaka i baek Yehoba elana i ba, “Nau iyaka ya gegi nabi. No gegi nu ahe yoho.” Lan i gan Yehoba palopita Gad i patuna Deibid elana i ba, “Yehoba i ba ola hiwe: Nuwatu eton na pewa ge nu hile hauna lahi na ginol elam: ebo baliman eton galebu bwabwatana ni gangan wam labiya, ebo weikena eton am topihigelgel nihi gasisi ge nu louem elal, o ebo lan eton kasiyebwa nanakina ni gan wam labiya.” (puna 10-13)

Deibid i baek Gad elana i ba, “O lahi ni neem Yehoba nimanaa, kaiwena iya toatilomwan, bahi ni neneem gamagalau nimaliyaa.” Inoke mweluluga o Yehoba kasiyebwa nanakina i patuna Isileli elal, yaka lan eton gamwaliyaa ali gewi sebenti tausan (70,000) hi aliga. (puna 14-15)

Sauga anelose toto nak i giginol i nem Yelusalema labenaa, yaka Yehoba i baek elana i ba, “Besena ga!” He sauga o i minaa Alauna gagama Yebusi wana witi musana ana abaasiasi elana. Inoke Gad i na Deibid elana i ba, “U nok abapowon etega u tal Yehoba elana Alauna gagama Yebusi wana witi musana ana abaasiasi elana.” Yaka Deibid i na Alauna wana witi musana ana abaasiasi ge bulumwakau bolo i papatuwalali-agil i pwamolal. (puna 16-24)