1-10  Kin Belsesa wana logugui ana baliman etonina elana, Daniyela ana pankite etega i gan. Sipi melutauina etega ana hon labui i kite i patalelu nok labi pai, labi aluwabwa ge labi yalasa ge i pakokovel. Yaka goti etega ana hon bwabwatana maisena etimwawa hot i patalelu i neem pai, inoke sipi melutauina i lol ge iya i tabwa togasisi hot. Abwe ana hon bwabwatana o i mwagabom ge lahena hon esopali hi siun. (puna 1-8)

Enaa, hon etega i siun neem hon esopali o avaliya etegana elana. Hon o i telipuna i kekeisi, yaa wana gasisi i bwatabwata ya i na Panuwa Waiwaisana o ebo ta ba Bateli Panuwana i ahe ge Yehoba wana boda enuna i pulilowalowagil. (puna 9-10)

11 Yaka totona i teli heyan i awatautau labulabum ana ivan ana Tohouwa elana. Powon bolo lan maisena ge maisena hi popowonan Tohouwa o elana i lopwali, ge wana Limi Bwabwalena ana bwabwalena i apanak.

19 Inoke i ba, “Wam wasa na pewa hauna gun abwe ni gan sauga mulaa Yehoba wana huga ana sauga elana, kaiwena am pankite ana nuwatu i noek sauga mowamowasena elana toto Yehoba iyaka i teli.

20 “Sipi melutauina toto u kite ana hon labui, iya i ola abalogugui toto Mediya ge Pesiya ali abalogugui. 21 Goti i ola Gilis ana abalogugui, ge ana hon bwabwatana i minaa matana labui ali luwaluwala i ola ana kin houwan. 22 Hon o i mwagabom yaka hon esopali hi siun lahe ana sapu Gilis ana abalogugui nihi wali ni tabwa abalogugui esopali, yaa wali gasisi nige ni oola abalogugui toto houwan.

23 “Sauga abalogugui esopali o wali sauga kelaubwa ni mowasi ge gegi paganina iyaka i bwata hot, yaka kin etega ni masal iya tohugahuga ge kakawi ni sibaan. 24 Iya ni tabwa togasisi hot, yaa nige totona wana gasisi elana i oola. Apapanak bwabwatana ni ginol ge hauna nuwana ni ginol bosowaina ni ginol. Tohouwa gasigasisel ge i ola al Yehoba wana gamagalau bwabwalel ni apapanak-agil. 25 Alona wana siba kakawi ni patuwalali, yaka hauna nuwana ni ginol bosowaina ni ginol, ge atena hanaha ni kalaopopwi. Gamagalau nihi gewi nihi ba, ‘Nige ta bwebwe!’ yaka iya ni apapanak-agil. I ola al ni lut ge ni lohaveyan tohouwa wali Tohouwa elana. He abwe nak ni pwawa, yaa nige gamagal etega wana gasisi eliyana i oola.”