Galatiya wali Leta
Pol wana Leleli
Baaba Houwan
Toabulilek houwan heliya Yudiya gamagaliliyau ya awawal. Yaka abwe bolo nige Yudiya i oola hi gewi Yeisu hi abulilek-an. He toabulilek Yudiya enuna hi ba toekelesiya bolo nige Yudiya i oola Mosese wana Logugui nihi toulil, mulaa abwe nihi tabwa Kelisitiyani hot. Yudiya wali tapwalolo ana logugui etegana heiya bolau tuwaliya buhuna kunisina nihi gotomwa yoho. He ginol ya etotohi etega, i pamasal heliya Yehoba wana hilihili gamagaliliyau. (Abatelipuna 17:10-12) Inoke toabulilek Yudiya enuna hi ba tage toabulilek bolo nige Yudiya i oola, heliya al ge gotomwa yoho paganina nihi ahe. Yaa Pol nuwatu ya i towani. Iya i ba wali abulilek Yeisu elana ya te kaiwena ge Yehoba ni awa sapusapu-agil ge nihi tabwa Kelisitiyani hot.
Galatiya iya polobins etega Loma wali abalogugui gamwanaa. Pol leta ya i patuna toekelesiya elal panuwa enuna labi Galatiya gamwanaa. Nige ta aatena bubun, yaa gamagalau hi gewi wali nuwatu panuwa bolo o heliya Antiyok, Ikoniyam, Listila ge Debi. Pol wana nawanawa houwan elana i na panuwa bolo ya elal, inoke ekelesiya i telipuna-an ge i gan elal (Tuwalali 13:14–14:23). Pol wana nawanawa houwan enaa, abwe i sikal Antiyok toto labi Siliya.
Ana awa i ola Pol iyoho Antiyok labi Siliya, inoke wasa enuna i hago tage gamagalau enuna panpankiti gegetogana hi panpankiti-an toekelesiya labi Galatiya elana. Topankite ya hi ba Pol nige apostolo hot i oola inoke bahi anana nihi hahago. I ola al, hi ba toekelesiya Mosese wana Logugui nihi toulil.
Inoke Pol Galatiya wali leta ya i ginol ge nuwatu bolo topankite hi panpankiti-an i ba pasapu. Nuwatu mowamowasena ge i liwanan i ola hiwe. Sauga Keliso i sokalila, he Yayaluwa Bwabwalena i nulila inoke pagan waiwaisana te ta giginol avalau elal.
1
1 Nau Pol, apostolo etega, o hilihili nige i neneem gamagalau elal, o ebo gamagal etega ni patunau ge ya tabwa apostolo. Yaa Yeisu Keliso ge Yehoba Tamala, toto Yeisu i palutem yaomala, heliya te hi patunau. 2 Alowau ge talilau bolo alowau ha mina, leta ya ha leli ge ha patuna i nowa komiu ekelesiya ona eliyamiu labi Galatiya elana.
3 Ha awanun Yehoba Tamala ge wala Babala Yeisu Keliso nihi muloluagimiu, ge wali nuwa laumwal atemiu ni pakalaopop. 4 Keliso iya totona i talamwan wala gegi kaiwena inoke ni sokalila panayawi toto sauga ya ana pagan nanakina elana, i ginol i ola Yehoba Tamala wana nuwatu. 5 Yehoba ta awa wasawasa-an sauga gegewena nige ni momowasi. Ibwe. I ola.
Wasa Waiwaisana Iyai Te Maisena, Nige Etega Al
6 Keliso wana mulolu bwagabwaga eliyana Yehoba i yogaagimiu ku tabwa wana gamagalau. Inoke nuwau ya ahe te etimwawa ana en ku pek ge nuwamiu i noek wasa waiwaisana gegetogana eliyana. 7 He nige wasa waiwaisana gegetogana etega i gagan, yaa gamagalau enuna nuwamiu hi pagewagewa ge tage Keliso wasana waiwaisana nihi pil getogaan. 8 Yaa ebo ama apostolo etega, o ebo anelose etega labulabumwa, wasa gegetogana ni wasaan eliyamiu nige ni oolak toto valila ha wasaan, he binimala Yehoba gamagal o ni apapanak-an Gehena elana. 9 Iyaka valila ya ba haba, inoke sauga ya na ba al: wasa waiwaisana iyaka ku ahe, inoke ebo gamagal etega wasa gegetogana ni wasaan eliyamiu, he binimala Yehoba gamagal o ni apapanak-an Gehena elana.
10 Ku nuwatu tage ya ba ola o ge gamagalau nihi awa wawaisi-agau? Nigeya, he nuwau te Yehoba ni awa wawaisi-agau. O tage gamagalau na ba paluviluvi-agil? Nigeya! Binimala nuwau gamagalau na ba paluviluvi-agil, he nau nige Keliso wana totuwalali i oola.
Wasa Waiwaisana Pol I Papaatena-an I Neem Yeisu elana
11 Taliwau ge nuwau, nuku atena te wasa waiwaisana toto ya papaatena-an nige i nenem gamagalau wali nuwatu elana. 12 Nige ya aaheya gamagal etega elana, ge nige gamagal etega i papankiteyau, yaa Yeisu Keliso te i pamasalem eliyau.
13 Yawaliu wasana iyaka ku hago, saugena o nau iyoho ya tapwatapwalolo Yudiya wali tapwalolo elana. Yehoba wana ekelesiya ya papalomwan-an nabiyan, ge ya labose tage na pwamowasi hoti. 14 Yudiya bolo no pan ha ya lakel Yudiya wali tapwalolo paganina elana, ge ya logasisi nabi panpankiti toto i noem tubumeyau elal ya toulil. 15 Yaa mulaa abwe hi abau Yehoba i hileyau ge na tabwa wana totuwalali. Inoke wana mulolu bwagabwaga eliyana i yogaagau, 16 ge totona wana nuwatu eliyana Natuna i pamasalem eliyau inoke wasana waiwaisana na wasaan bolo nige Yudiya i oola elal. He saugena o, nige ya nonok gamagal etega elana ge tage no mwananal na aheya elana. 17 Nige ya nonok Yelusalema ge gamagalau ya kikitel bolo houwa hi tabwa apostolo mulaa abwe nau, yaa etimwawa ya nok ya na labi Alebiya, yaka mulaa abwe ya sikal Damasiko elana.
18 Baliman eton i mowasi abwe ya nok ya na Yelusalema ge Pita ya kite, inoke wik labui ya alou ha mina. 19 Nige apostolo etega al ya kikite, iyai te Yemesa toto Babala talina. 20 (He Yehoba i atena hauna toto ya lelelian eliyamiu i tunahot, nige ya kakakawi.) 21 Yaka mulaa abwe ya nok labi Siliya ge labi Silisiya elal. 22 Saugena o Keliso wana toekelesiya labi Yudiya elana nige maniniu hi kikite. 23 Wasau ya te hi hago avaliyau hi wasaan elal hi ba, “Tau toto valila i papalomwan-agila, sauga ya wasa tutunahotina toto kila ta abulilek-an i papaatena-an, yaa age valila i labose tage wala abulilek o ni pwamowasi.” 24 Inoke nau kaiweu toekelesiya bolo o Yehoba hi tobalan.