1-2 Mɨgügtɨjc ajcxy, cham nyajmɨɨdmɨydaaccɨxy je xɨɨ je tiempo co anajty ajt nHuindzɨn Jesucristo huimbidaanɨ jadüg'oc ya naaxhuiñ, etz naybadaanɨm mɨɨd yɨ'. Nmɨnucxtaacpyɨch miich ajcxy, ca' mhuinma'ñytɨgooygɨxy co pɨnjaty ymɨna'ñ co Jesucristo tɨ yhuimbity. Ca' mmɨbɨjccɨxy, ca' jada ayuc yjanchɨty. Ca' mdungɨxy cuendɨ yɨ jäy ajcxy y'ayuc huɨdibɨ mɨnamb co tüg espíritu tɨ yajnejhuɨɨygɨxy co yjadu'nɨty, o co muum a'ijxnaxy amɨdoonaxy capxy ayuc, o co muum ijxpɨdzɨmy jada ayuc ma tüg necy huɨdibɨ ajcxy ytijpy co ɨɨch nnecy'adyii. 3 Ca' myajhuin'ɨɨngɨx janch ni nej. Jayɨjp ca'nɨ anajty je xɨɨ je tiempo yhuaad'atyñɨ ma anajty Jesucristo ymiina'ñ jadüg'oc ya naaxhuiñ, mayjäy ajcxy mɨdziptzona'ñ Dios tɨydudägy co ñayguëxɨ̈gɨɨyb tüg jɨbɨc jäy mɨc jäy huɨdibɨ Dios yajcödɨgoyamy tüccɨ'yɨ. 4 Jada jɨbɨc jäy ymɨdziptzonamyb tüg'ócɨy tijaty huɨdibɨ jäy Dios'ajtpy, e nañ ymɨdziptzonamyb huɨdibɨ jëbɨ yaj'ojadaty. E nañ yɨ' naybɨdägɨɨb amɨj agɨx jadu'n nejhuɨ̈y yjacmɨjɨty ca'ydɨ Dios. E nañ yɨ' ypɨdägamb y'ane'mdac ma Dios ytɨjc, e naybɨdägaanɨp nejhuɨ̈y Diosɨty.

5 ¿Nej ca' mjäymejtzcɨxy co jadu'n nimɨydacyɨch tüg'ócɨy jada tɨy'ajt jayhuin je taab anajty n'ityɨch ma miich ajcxy? 6 Jadachambɨ miich ajcxy mnejhuɨɨyb pɨn yajhuäcxɨjp jada mɨc jäy jada jɨbɨc jäy, jɨgɨx ca'ydɨ ñayguëxɨ̈gyii jayɨjpnɨ ma ca'nɨ tiempo yhuaad'atyñɨ mɨna Dios a'ɨxɨ̈huɨp co ymiinɨpy. 7 Je mɨc jäy je jɨbɨc jäy cham ñi'ixɨɨyb ameech je jɨbɨcpɨ huɨdibɨ ytunamyb, jëyɨ ytɨgoy'ityñɨ mɨna je tü'aa y'ahuächyii, je huɨdibɨ yajhuäcxɨjpɨp. 8 Co anajty je jɨbɨc jäy ytü'aa y'ahuäch, chi ajt nHuindzɨn Jesús yajcödɨgoyɨpy mɨɨd tüg puxujɨn. Jesús yajcödɨgoyɨpy je jɨbɨc jäy mɨɨd yɨ' y'oy'ajtɨn etz ymɨj'ajtɨn co anajty yhuimbity ya naaxhuiñ. 9 Je jɨbɨc jäy, yɨ' je' ymɨɨd je mujcu' yhuinma'ñ etz ymɨc'ajt, e ytunamyb mɨjhuinma'ñ etz ijxpejt huɨdibɨ anɨɨjɨp. 10 Je jɨbɨc jäy ytunamyb tüg'ócɨy tijaty jɨbɨc-huinma'ñ jɨgɨx jëbɨ huin'ɨɨnɨp yɨ jäy ajcxy huɨdibɨ y'alma tɨgoyɨpy, mɨɨd co ca' ajcxy cöbɨjccɨxy, e nañ ca' tzojccɨxy Dios y'ayuc ytɨy'ajt huɨdi mɨɨd jëbɨ y'alma ñïdzooccɨxy. 11-12 E je' ycɨxpɨ co ca' ajcxy cöbɨga'ñ Dios ytɨy'ajt, paady Dios y'ixmadzáanɨgɨxy huen yajhuin'ɨɨngɨxy, huen mɨbɨjccɨxy je mujcu' y'anɨɨ, e mɨɨd jada ycɨxpɨ jëbɨ Dios yajtɨgooyɨ yɨ' ajcxy y'alma nidüg'ócɨy huɨdibɨ ca' mɨbɨga'ñ Dios ytɨy'ajt. Jacjotcujc ajcxy co jɨbɨc-huinma'ñ tungɨxy.

13 Mɨgügtɨjc ajcxy huɨdibɨ ajt nHuindzɨn Jesucristo ooy tzocy jɨhuɨ̈y, jabom jabom nyajnaxyɨch jäygɨdaacɨn ma Dios mɨɨd miich ajcxy ycɨxpɨ, mɨɨd co Dios tɨ xyhuin'ijxcɨxy oga'n'aty, jɨgɨx jëbɨ m'alma ñïdzooccɨxy mɨɨd Dios yjɨhuɨ'ñ ymɨc'ajt, etz nañ mɨɨd Dios y'ayuc ytɨy'ajt huɨdibɨ tɨ mmɨbɨjccɨxy. Je Dios yjɨhuɨ'ñ ymɨc'ajt xyajhuaatzɨp ajcxy mjɨbɨcjot mjɨbɨc-huinma'ñ. 14 Paady ycɨxpɨ Dios tɨ xyhuin'ijxcɨxy, e nañ xyajmɨbɨjccɨxy mɨɨd yɨ' y'ayuc ytɨy'ajt huɨdibɨ ɨɨch ajcxy ngapxhuäcxyp, jɨgɨx jëbɨ mbáatcɨxɨpy oy'ajtɨn ma ɨɨch ajt nHuindzɨn Jesucristo.

15 Paady mɨgügtɨjc ajcxy, mɨbɨjccɨx tɨydudägy, ca' m'ixtɨgɨ̈huäccɨxy, e ca' mjäydɨgooygɨxy je tɨy'ajt huɨdibɨ ɨɨch ajcxy tɨ ngapxhuäcxy ma miich ajcxy, etz jadu'n nej tɨ nnɨmaaygɨxy necyjoty. 16-17 Huen ɨɨch ajt nHuindzɨn Jesucristo cɨ'm etz ajt nDios Teedy may'ajt oy'ajt tunɨpy mɨɨd miich ajcxy, e xyajjotmɨcpɨ́jccɨxɨpy etz xyajmɨbɨ́jccɨxɨpy tɨydudägy, jɨgɨx oybɨ ayuc mgápxcɨxɨpy etz mdunɨpy ajcxy tüg'ócɨy oybɨ huinma'ñ. Ɨɨch ajt nDios Teedy etz ɨɨch ajt nHuindzɨn Jesucristo xychojcɨm xyjɨhuɨɨyɨm, e tɨ xymooyɨm jotcujc'ajtɨn huinɨxɨɨbɨ, e nañ tɨ tuñ may'ajt oy'ajt mɨɨd ɨɨch ajt ycɨxpɨ, jaydëbɨ njɨjp'ijxɨm oy'ajtɨn jiiby tzajpjoty.