1 Tyamdsʉ net nꞌadsoojʉmbíty ja diꞌibʉts xyajtʉʉdʉp yʉꞌʉgyʉjxm ja jeꞌxy diꞌibʉ tʉ yajtukwindsʉꞌʉgʉ agojwinnáx. Nnija̱ꞌa̱m ko nidʉgekyʉ nmʉda̱jtʉm ja jaygyujkʉn. Yʉ jaygyujkʉn yʉꞌʉ dʉꞌʉn yajmʉj yajpátʉp ja ja̱ꞌa̱yʉty, per ja tsojkʉn yʉꞌʉ dʉꞌʉn yajmʉjwiin yajkajaajʉp ja ja̱ꞌa̱yʉ myʉbʉjkʉn. 2 Pʉn ja pʉ́n ñaymyʉjkuyaꞌaxyʉty ko yʉꞌʉ tnijawʉ oynʉꞌʉnʉn, kyaj tnijawʉ éxtʉm dʉn pyaadyʉty tnijáwʉt. 3 Per diꞌibʉ tsyejpy ja Dios, ixyꞌa̱jtʉp ja Dios.

4 Nꞌokmadyákʉm ja jeꞌxy diꞌibʉ tʉ yajtukwindsʉꞌʉgʉ agojwinnáx. Tʉyꞌa̱jtʉnʉꞌʉ ko ni tuꞌugʉ agojwinnáx kyaj ti ttsooty, es tʉyꞌa̱jtʉnʉꞌʉ ko tiꞌigyʉ jeꞌeyʉ Dios, kyajpʉ wiinkpʉ. 5 Oy nijaꞌajʉty jyʉna̱ꞌa̱ndʉ ko ta nimayʉ dios esʉ windsʉ́nʉty tsa̱jpótm es naxwiiñ, 6 ʉdsa̱jtʉm nnija̱ꞌa̱m ko ta tiꞌigyʉ Dios diꞌibʉ nmʉduꞌunʉm es ma̱ tʉgekyʉ tsyondaky diꞌibʉ jaaꞌa̱jtp; es nan nnija̱ꞌa̱m ko ta tiꞌigyʉ Windsʉ́n, yʉ Nindsʉnꞌa̱jtʉm Jesukristʉ diꞌibʉ mʉt tʉgekyʉ oj yajkojy es diꞌibʉ xyajjikyꞌa̱jtʉm.

7 Per kyaj nidʉgekyʉ tnijáwʉdʉ tya̱dʉ dʉꞌʉmbʉ winma̱ꞌa̱ñ. Na̱a̱gʉty dʉꞌʉñʉm tꞌawda̱jttʉ agojwinnáx, kʉꞌʉm tjáwʉdʉ ko pyojpʉty pʉn jyʉꞌxtʉp ja jeꞌxy diꞌibʉ tʉ ñejxy windsʉꞌkʉn ma̱ agojwinnáx. 8 Tʉyꞌa̱jtʉn ko diꞌibʉ njʉꞌxʉm, kyaj yʉꞌʉgyʉjxmʉty xyꞌaxá̱jʉm ja Dios; pes kyaj ndukꞌoybyʉdsʉꞌʉmʉm pʉn njʉꞌxʉm es ni ngaja̱jtʉm axʉʉk pʉn kyaj njʉꞌxʉm. 9 Naygywentʉꞌátʉdʉ ko ti xytyundʉ. Oy miidsʉty ti xytyúndʉt es kyaj xypyekyjyáwʉdʉ, kyajʉ dʉꞌʉn xytyúndʉt pʉn jaꞌagyʉjxm xyajpekykya̱ꞌa̱dʉ ja mmʉguꞌuk. 10 Jaꞌa ko pʉn tuꞌugʉ mmʉguꞌuk myʉbejkypy ko kyaj ꞌyóyʉty ko ja̱ꞌa̱y tjʉꞌxtʉ ja tsuꞌutsy diꞌibʉ tʉ yajtukwindsʉꞌʉgʉdʉ agojwinnáxʉty, es mꞌijxʉp ko mgay mꞌiiky ma̱ agojwinnáxʉty yajwindsʉꞌʉgʉdʉ, ¿kyajʉ da xyonda̱ꞌa̱gʉt es tjʉꞌxtʉt ja tsuꞌutsy diꞌibʉ tʉ yajtukwindsʉꞌʉgʉdʉ agojwinnáxʉty? 11 Es dʉꞌʉn mʉt jaꞌagyʉjxm diꞌibʉ mij mnija̱ꞌa̱p xyajtʉgóy ja mmʉguꞌuk, es mʉt yʉꞌʉgyʉjxm nandʉꞌʉn ꞌyeꞌky ja Jesukristʉ. 12 Es ko dʉꞌʉn xyajpojpʉtúnʉt ja mmʉguꞌuk diꞌibʉ jya̱ꞌa̱p ko kyaj ꞌyóyʉty ko ja̱ꞌa̱y tjʉꞌxtʉ tadʉ tsuꞌutsy, extʉ mbojpʉtuump nandʉꞌʉn mij ma̱ yʉ Jesukristʉ. 13 Pa̱a̱dyʉts ʉj njʉna̱ꞌa̱ñ ko ni na̱ꞌa̱ts nganakyjyʉꞌxʉt jatʉgokʉ tsuꞌutsy pʉn mʉt yʉꞌʉgyʉjxm nyajtʉgóyʉts ʉj ja nmʉguꞌukꞌa̱jtʉm.