1 Ma cúxeēn rō nuū tāca tée jéhnu, chi sa cahān vāha ró jíín de jeē ma stɨ́vɨ de, nájnūhun cáhán rō jiín tátá rō. Te tāca tée suchí, suni cahān vāha ró jíín de nájnūhun jíín ñani rō. 2 Te suni súcuan cahān rō jiín táca ñahan jéhnu, nájnūhun jíín náná rō. Te suni súcuan jíín táca ñahan súchí, nájnūhun jíín cuáha ró, te yɨ́ñúhún ndajnūhun ró jiín ña.

3 Te ñayuu cácandíje na cuáha i jeē jíni ñúhún ñahan ni caquendōo ndáhú, te núu ni quendōo ndáhú ndije ña jeē tú na ñayuu condito ña. 4 Chi ɨɨn ñahan ní quendōo ndáhú, núu íyó séhe ña chí séhe chání ña jeē jévāha, te na cóto máá i ña. Chi cánuú cutūhva i jeē xíhna gā nuū ñáyuu vehe i squícu i coto i. Te na nácoto i náná i tátá i sɨquɨ̄ jeē ní cacondito ña i. Chi yāha cúu jniñu váha jeē nújnahan ni Yaā Dios. 5 Te ɨɨn ñahan ní quendōo ndáhú ndije jeē máá ɨɨn na ña, ñúhun ni ña jeē maá Yaā Dios condito ya ña, te tu jécuɨñɨ̄ ña jeē jicán tahú ña nduú ñuú. 6 Te sa suhva núu máni ndɨ́hvɨ́ ni ña sɨquɨ̄ tāca jéē cúsɨɨ̄ ni maá‑ni ña, yūcuán na te vēsú técu ña, te nájnūhun je ni jihī ña. 7 Jniñu yáha ndacu ró núū ñáyuu, návāha ma cóo cuēchi sɨquɨ̄ i. 8 Te núu ɨɨn ñayuu tu ndíto i jnáhan vehe i, te víhyá gā ñayuu ini vehe i, núu súcuan te sáha i jniñu jeē tu quíjnáhan jíín jnúhun cándíje yó, te cúu i ɨɨn jeē neé gá vēsú ñáyuu tu cácandíje.

9 Te ñahan viuda cuu quɨ̄vɨ sɨ́hvɨ́ ña nuū lista ñayuu jeē cáchindéé ñáhán ró jiín xúhun, te núu je ni jīnu ña unī xico cuiyā, te núu ni īyo ɨɨn‑ni yɨɨ ña. 10 Te suni cánuú jéē cuajnúhún ñáyuu ña jeē váha jniñu ni sáha ña, núu jeē ni scuéhnu vāha ña sēhe ña, jíín jéē ní jēhe núu ña vehe nuū ñáyuu cájica, jíín jéē ní jejníñu ña nuū hermano cácandíje, jíín jéē ní chindéé ñáhán ña ñayuu cándoho jnūndóho, jíín jéē ni sáha ña tāca gá jniñu váha.

11 Te tācá ñahan viuda jeē iyó suchí gá, chi ma soó ró sɨhvɨ́ ña nuū lista. Chi sanaa te nducú ña jeē cúsɨɨ̄ ni maá‑ni ña, te ma cóndɨhvɨ̄ ni ña sɨquɨ̄ Cristo, chi cuu ni ña condeca tucu ña tēe. 12 Te súcuan jecondee cuēchi sɨquɨ̄ ña, chi tu ní squícu ña jeē ni jéjnūhun ña ná ni jecosō sɨhvɨ́ ña nuū lista. 13 Te suni caca cuu ña tācá‑ni vehe te quee cúxí ña. Te nasūu máni jeē cáca cúxí ña, chi suni sɨquɨ̄ jeē sajnúhún ña, te quɨ̄vɨ nduu ña cahān ña jnūhun jeē tu íyó váha jeē cahán ña. 14 Jeē yúcuan cúní rī jeē tācá ñahan viuda jeē iyó suchí, na nándāha ña, te scuéhnu ña sēhe, te coto vāha ña vehe ña, návāha ñayuu cácuu contra ma cúu cahān i sɨquɨ̄ ña. 15 Chi sava ñahan viuda je ni cajica yátá ña te sáha ña jniñu jeē cuní Satanás.

16 Te núu ɨɨn tēe chí ɨɨn ñahan cándíje, núu íyó ñahan viuda vehe i, te na cóto máá i ña. Te ma cóndee gasto ña sɨquɨ̄ grupo ñayuu cácandíje, návāha cuu cuāha vāha i nuū ñahan viuda jeē tu ndé ɨɨn coto ña.

17 Te tāca tée jéhnu cándito ñayuu cácandíje, na jécunaā doble yāhu de, te núu cándɨhvɨ̄ ni de cástéén de cánacani vāha de jnūhun ya. 18 Chi cúu nájnūhun cáhán tutu iī: Ma cánda stɨquɨ̄ caxīn tɨ̄ trigo, núu ma cuáha ró jéē cáji tɨ̄. Te suni cáhán: Tēe jeē sájniñu tátú, jíni ñúhún quɨyāhu de, áchí.

19 Ma cuajnúhún ró te núu jéquin ñayuu cuēchi sɨquɨ̄ ɨɨn tēe jéhnu cándito ñayuu cácandíje te núu tu íyó úū chí únī testigo. 20 Te núu cásáha ñayuu cuēchi, te cánuú cuxeēn rō nuū i, jíto jínúū ndɨhɨ ñayuu, návāha na cónso īyo sava ga i. 21 Te cáhán nīhin ri jiín ró, jíto máá Yaā Dios jiín Jítoho yō Jesucristo jiín táca ndajéhé yā jeē ní nacāji ya: Squícu vāha ró jniñu yáha, te ma sáha ró cuenta ndese cúu ɨɨn ɨɨn i, chi ɨnuú‑ni sándaā rō sɨquɨ̄ ndɨhɨ‑ni i. 22 Ma cáni yachī rō ɨɨn tēe jeē condiso jníñu de nuū ñáyuu cácandíje, chi xīhna gā coto ndee rō de. Chi sanaa te stɨ́vɨ de, te cuēchi de suni condee sɨquɨ̄ rō jiín de. Te coto ró máá ró jeē ma quɨ́vɨ ró jíín jniñu néé.

23 Te sɨquɨ̄ jeē núu‑ni núu‑ni cúhú chīji ró, te ma cóho ga rō máni ndute, chi suni coho ró jecu vino.

24 Cuēchi sava ñayuu chi je íyó ndijin nde ná tu quɨ̄vɨ i nuū cúndaā cuēchi i. Te cuēchi sava ga i chi cúcuéé te natūu nahín. 25 Te suni súcuan tācá jniñu váha, chi íyó ndijin. Te vēsú ná tu natūu jniñu váha ún, te ma cúu quɨsāhi nɨ́ɨ́ cáni, chi natūu nahín.