18
Karajraj in Liohdi apel Jounkoapwung men
1 Jesus pwehng Nah sohnpadahkkok karajraj pase, pwa en padahkihoang irai en kin poaden kapkap, joah koakoahkla. 2 “Jounkoapwung men mine nehn kahnihmw oau, ih johkin mijik Koahs apel joh kin woaunki armaj. 3 Liohdi men pel minehr nehn kahnihmmwo, ma kin pwurpwuroa jounkoapwunngo en rapahki ah pwung, poaki ipoa, ‘Jeuweje ngoahi nehn roapoan pwung oang poalloaiho!’ 4 Anjoau roairoai jounkoapwunngo johpwa nimen wia mehkij, mwuhr ih pein lemehda nehn kapehdin, ‘Mihndahr ma ngoahi joh kin mijik Koahs apel joh kin woaunki armaj, 5 a ngoahi pirin jeuweje lihmene en rapahkihda ah pwung, pwa ih en johla kadroapwoa ngoahi apel johla kin pwurdo koauwehla oai anjoau.’ ”
6 Jesus pel pwa, “Rong da ma jounkoapwung nauna mene pwahpwahpwa. 7 A, imdoahr, Koahs nen joah pirin jeuweje Nah armaj kan ma kin poak jauwaj inrehn apel inpwong? Ih pirin kos in jeuweje irai? 8 Kamwai en kidal pwa ih uhdahn pispis in jeuweje irai ki arai anahn kan. A Nihn‑Armaj pirin diar pwojon nehn jampah nehn Ah indoa?”
Karajraj in Pharisee apel Jounrik Daksis men
9 Jesus pel pwahla karajraj pase oang armaj pwi ma kin akpwungki pein ihr apel lioassoang epwi: 10 “Armaj roahmen inlahng kapkap nehn Umw Joarwiho; emen ira Pharisee, a emen jounrik daksis. 11 Pharisee‑o uhda kapkap ih pwa, ‘Maing Koahs, ngoahi kapingkalahngan kioang koawoa oai joh kin noaroak, oai joh kin mwoarjuwed, oai joh kin kamwahl doahroar armaj kan. Ngoahi pel kapingkalahngan kioang koawoa oai pel johpwa doahroar jounrik daksis mene. 12 Ngoahi kin kaijihjol pehn riau nehn wihk oau, apel ngoahi kin meiroangki eijek kij oau jang nehn meohroj ma ngoahi anki.’ 13 A jounrik daksisso uhda ekij dohlahjang, ih joah nimen jardahlahng nehnloannge, a ioar mehwa ih wihwia, pokpoki nehn pwalah, pwa, ‘Maing Koahs, mahk oang ngoahi, armaj dipan men!’ ” 14 Jesus pwa, Ngoahi pwehng kamwai, “Kamwai en kidal pwa jounrik daksisso pwungla ipen Koahs, ih pwurla in umwahu; a Pharisee‑o joah. Pwa ohroj ma kin aklaplapki pein ihr, pirin siksikla; a ohroj ma kin aksiksikki pein ihr, pirin laplapla.”
Jesus Kapaiahda Jeri Siksik pwi
15 Armaj pwi wahdohng Jesus nihrai jeri siksik pwi pwa en kihdahng poah pohrai. Sohnpadahkkok kapangda ken woarwoarihda irai. 16 A Jesus pangindo jeri siksikkok apel pwehnglahng sohnpadahkkok, “Mweidoahng jerihkan en indoa ipoai. Kamwai joah iroahdi irai; pwa wein Koahs ioar wein joangoan armaj pwiai. 17 Mehlel Ngoahi pwehng kamwai, pwa emen ma jehpirin oaloahda Wein Koahs doahroar jeri siksik men, ih johkak dilda loaloa.”
Woal Koapwoahpwoa men
18 Emen koaun in mihn Jew‑ok idoak ipen Jesus, “Jounpadahk mwehu, dahkij ngoahi uhdahn wia pwa ngoahi en kak oaloahki mour joahsuk?”
19 Jesus pwehng ih, “Amwda koawoa ke panginki Ngoahi jounpadahk mwehu? Joh emen ma mwehu, Koahs kalahpwuk. 20 Koawoa ne kidal kojonned kan: ‘Joah kamwahl; joah kojukdi armaj; joah pirap; joah likamw; woaunki joamoamw apel inoamw.’ ”
21 Woallo japoang Jesus, “Ngoahi ne kapwaihahda kojonned pwiai jang nehn oai siksik.”
22 Nehn en Jesus rong, Ih pwa, “Pel mine mehkij koawoa anahne wia. Noaskihla meohroj koawoa anki, kioang dupkoa kan armaj joamwoahmwoa kan, oamw pai nehnloannge nen koalikla; indoa pwilihla Ngoahi.” 23 Nehn en woallo rongda me, ih inenin injinjuwedla, pwa ih woal inenin koapwoahpwoa men.
24 Jesus kapang doahroar ah injinjuwed, Ih pwa, “Ia woahr apwal in armaj koapwoahpwoa en dilda nehn Wein Koahs! 25 Apwal oang armaj koapwoahpwoa men en dilda nehn Wein Koahs jang kamel men en dilda nehn pwokin sihpas.”
26 Iraihok ma rongrong Jesus kalelpoak pwa, “A doar inje ma kak mourla?”
27 Jesus japoang, “Mehkij ma johkak ipen armaj, a uhdahn kak ipen Koahs.”
28 Peter pwehng Jesus, “Maing, kapang! Kamai ne injang umwamai kan, pwa kamai en pwilihla koawoa.”
29 Jesus pwa, “Ngoahi pwehng kamwai in mehlel, ma emen injang umwah, pahioa, riah, jamah, inah, nah jerihkan ki Wein Koahs, 30 pirin oaloa dupkoa koalik nehn mour oauwe, apel nehn mour joahsuk ma allaluhdo.”
Kajilpak in en Jesus sikoa doahroar Ah pirin Loklok apel Mehdi
31 Jesus kalahpwukihla Nah sohnpadahk eijek roahmenno, pwehng irai, “Kapang! Pwa kisai allaluhlahng Jerusalem, wijahu ma meohroj joukohppok ne insingehdi doahr Nihn‑Armaj, pirin pwoaida. 32 Ih pirin likliklahng ipen mihn likinnok, ma pirin kapiski Ih, kihjang woaun in Ih, apel andipoa Ih. 33 Irai pirin poki apel kojukdi Ih, a rehn kajiluh Ih pirin iejda.”
34 A sohnpadahkkok johpwa woahwoahki da Ih pwa; woahwoahn lal pwiai rirjang irai, irai joh kak en woahwoahki dahkij Jesus pwahpwahpwa.
Jesus Kemwehuwihla Woal Majkun men
35 Nehn en Jesus ne allaluhla koaroanlahng Jericho, mine woal majkun men minmine imwin allo mehlahn poakpoak mwani. 36 Nehn ah rongda pokonno daulihla ih, ih idoak, “Dahkij wiawi?”
37 Irai pwehng ih, “Jesus mihn Nazareth ma allaluhla.”
38 Woallo rahulahng, “Jesus! Nihn David! Jeuweje ngoahi!”
39 Armajjok ma mine mijen pokonno woarwoarihda ih, apel pwehng ih en nennenla. A ih kapwa kakoalikihla ngiloa, pwa, “Maing, koawoa ma nihn David! Jeuweje ngoahi!”
40 Jesus uhdi ruwoj woal majkunno en wijikdo ipoa. Nehn en woallo koaroando ipoa, Ih idoak oang, 41 “Da koawoa nimen Ngoahi en jeuwejehki koawoa?”
A ih pwa, “Maing, ngoahi anahne pwuroahng kapangda wija.”
42 Jesus pwehng ih, “Ken kapangda! Oamw pwojon en ma kemwehuwihla koawoa.”
43 Nehn anjoauwohr ih kak kapangda wija, ih ken pwilihla Jesus apel kapkapnga Koahs. Nehn en pokonno kapang manman oauwe, irai ohroj pel kapkapnga Koahs.
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.