1 Jesus panginpene Nah sohnpadahk eijek roahmenno, kioang irai manman en kajroahjang ngen jaus apel kemwehuwihla joangjoangoan johmwehu ohroj. 2 Me ioar oadoan woaroak eijek roahmenno: Keiou Simon (ma pel adanki Peter) a riah Andrew; James nihn Zebedee, apel riah John; 3 Philip apel Bartholomew; Thomas apel Matthew, jounrik daksis men; James nihn Alphaeus, apel Thaddaeus; 4 Simon mihn Canaan* Simon mihn Canaan pel Simon mihn Zealot pel Simon ma ngoang, apel Judas Iscariot, ma pangla Jesus.

5 Sohnpadahk eijek roahmenno Jesus kadarla kioang irai kaweid pwiai: “Johpwa inla nehn pwungen mihn likin kan ke inla nehn koaujoan in mihn Samaria kan. 6  A kamwai inlahng jihpw joaloanglahk ipen mihn Israel kan. 7  Kamwai inla padahki pwa: Wein nehnloannge ne koaroan. 8  Kemwehuwihla johmwehu kan, kamourda min mehdi kan, kamwkelehda irai kan ma anki johmwehu lepa, kauj jang ngen jaus kan. Doar amwai oaloa in joh dupkoa, Kamwai pel kihwei in joh dupkoa. 9  Johpwa wa kohl, silper, ke kapa nehn amwai pwuko kan; 10  johpwa wijik pehk nehn oamw jeiloak, ke joakid riau, ke ju ke jokon; pwa sohn doadoahk kan warroang oaloa dahkij arai anahne.

11  “Nehn amwai dilda nehn oau koaujoan ke koujapw, rapahkihda armaj men ma nimen kamwain mine nehn umwahn oaroh kamwai pwur. 12  Nehn amwai en dilda nen umw oau, amwai rahnmwahu en doahroar me; popohl oang sohn ummwoauwe. 13  Ma sohn ummwo kajamwo kamwai, amwai popohl en minmine iparai, a ma joah, amwai popohl en japahldohng kamwai. 14  Ma mine umw oau ke koaujoan oau joah nimen kajamwo kamwai, ke rong amwai padahk, diljang wijahu jiped jang pwirejpar in pwoalkoamwai. 15  Ngoahi pwehng kamwai pwa in mehlel, Rehn in Kadeikko Koahs pirin kajalehda Ah kalahngan oang sohn Sodom apel Gomorrah koalik jang koaujoan pwiai.

16  “Kamwai Rongmwehu Ngoahi kadarwe kamwai doahroar jihppwi nehn pwungen wolf. Kamai uhdahn pirin kanaihoahng kamwai doahroar sinek kan apel maid doahroar mwurei kan. 17  Kamwai mwajahn pwa armaj kan pirin joalihdi kamwai apel pangla kamwai mwohn mwoalen koapwung kan, apel poki kamwai nehn jinakoke kan. 18  Pwa Ngoahi, kamwai nen wijikla mwohn koaun apel nahmwarki kan, pwa kamwai en kadehdehng irai apel mihn likin kan doahr Rongmwehu. 19  Nehn irai pirin panglahng kamwai koapwung, kamwai joah pwunodki da kamwai pirin pwa, ke ia mwomwen amwai pirin pwa; nehn anjoauwo pirin lel, nen mweimweioang kamwai da kamwai pirin pwa. 20  Pwa lal kan ma kamwai pirin pwa jaudi amwai a Ngenin Jamamwaiho pirin kalallali kamwai.

21  “Armaj pirin pangla riarai kan pwa en mehdi, pahpa kan pirin pangla nihrai jerihkan; Jerihkan pirin uhwoangda arai pahpa kan pwa irai en kojkojdi. 22  Armaj ohroj pirin lioassoang kamwai pwa ngoahi ma kahrehda, a emen ma pwojon lel imwin pirin mourla. 23  A ma kamwai koaloklok nehn oau koaujoan, kaulahng nehn oau koaujoan. Ngoahi pwehng kamwai in mehlel, kamwai nen johpwa koarjoahla koaujoan in Israel kan mwohn Nihn‑Armaj pirin pwurdo.

24  “Joh sohnpadahk men laplap jang ah jounpadahk: joh lidu men laplap jang ah koaun. 25  Sohnpadahk men en pel isarki en doahroarla ah jounpadahkko, apel liduhmen en pel doahrla ah koaunno. Ma moangoan peneinei oau poangpoangki Beelzebul, ia woahr nauna in ad ma emen sohn peneineiho en poangpoangki!

26  “Kamwai en joah mijik armaj. Me ohroj ma kin oakkoakla, uhdahn pirin janjalda, ke me rir ohroj pirin janjalda. 27  Da ma Ngoahi pwehng kamwai in rir, kamwai en kajalehda nehn pokon janjal; a me ma Ngoahi ngudngudkihoang kamwai, kamwai en pakairkihda pohn umw kan. 28  Johpwa mijik irai ma kak kojukdi palwar a johkak kojukdi pali ngen. A mijik Ih ma kak koauwehla ara, ngen apel palwar nehn ehl. 29  Send oau kamwai kak dupukda mahn siksik roahmen, a emen joh kak kipdi pohn pwirej likin koajoandi en Jamamwaiho. 30  A pel oang kamwai ohroj, pisen moangoamwai kan ohroj ne pel wadwaddi. 31  A doar joah mijik; kamwai kajampwaljang mahn siksik dihrdir!

32  “Emen ma pohneje Ngoahi mwohn armaj, Ngoahi pel pirin pohneje ih mwohn Joamoaiho nehnloannge. 33  A emen ma kahmahmki Ngoahi mwohn armaj, Ngoahi pel pirin kahmahmki ih mwohn Joamoaiho nehnloannge.

34  “Johpwa lemleme pwa Ngoahi indoahng wahdo moaloailoai pohn jampah. Ngoahi joah indoahng wahdo moaloailoai, a kodlaij. 35  Pwa Ngoahi indoahng ukudla jermwein men en uhwoang jamah, jerpein men en uhwoang ah nohno, lihmen uhwoang inen pahioa. 36  En emen ah imwinsihsi pirin wia sowoa mehlel in nehn umwahu.

37  “Emen ma ipwilki jamah ke inah koalik jang ah ipwilki Ngoahi johpwa warroang Ngoahi; emen ma ipwilki nah jermwein ke jerpein koalik ah ipwilki Ngoahi johpwa warroang Ngoahi; 38  emen ma johpwa wahda ah lohpwu pwili ngoahi johpwa warroang Ngoahi. 39  Emen ma nimen kolkol ah mour nen luhj jang, a emen ma luhj jang ah mour ki Ngoahi nen kolkol ah mour.

40  “Emen ma kajamwo kamwai kin kajamwo Ngoahi, a emen ma kajamwo Ngoahi kin kajamwo ih ma kadardo Ngoahi. 41  Emen ma kajamwo joukohp en Koahs men pwa ih joukohp en Koahs men pirin oaloa kijakij in joukohp men, a emen ma kajamwo armaj pwung men pwa ih armaj pwung men pirin oaloa kijakij in armaj pwung men. 42  Ngoahi pwehng kamwai in mehlel, ma emen kioang mwoak in pil mwolou oau oang pwilihoai siksik pwiai, ih nen uhdahn oaloa dupkoa.”