8
Jesus Kamwinge Armaj Pahkid
1 Pokon koalik oau pel pwuroahng wiawi ipen Jesus rehnnok, a joh me irai en kang. Ih ken panginpene Nah sohnpadahkkok pwehng irai, 2 “Ngoahi ipwilkihda armaj pwiai pwa irai minminehki Ipoai rehn jiluh, doahr ne pel rojla kanrai mwinge. 3 Ma Ngoahi kadarla irai in umwaraihok joah kang mehkij, irai kak oar mwehlehlla nehn al kan, pwa epwi irai indoahjang wija doh.”
4 Nah sohnpadahkkok idoak, “Armaj pirin kihjang ia nehn japwsoahn oauwe mwinge ma pirin isar oang kamwingehla joangoan koalik in pokon oauwe?”
5 Jesus idoak oang irai, “Lopwon in pilahwa doapoa mine ipamwai?”
A irai japoang, “Lopwon ijuh.”
6 Jesus ken pwehng pokonno en mwindi pohn mohk. Ih ken pwoakda lopwon in pilahwa ijuhwo, kapingkalahnganki oang Koahs, sipwangpijoang, kioang Nah sohnpadahkkok pwa irai en nehk oang pokonno. Irai ken nehkpijoang. 7 Mwumw pwi pel mine iparai; Jesus pel kapkapki, pwehng sohnpadahkkok irai en pel nehk oang pokonno. 8 Pokonno ken mwinge oaroh moad — ihr ohroj dapwa armaj pahkid. 9 Sohnpadahkkok audohda kiam ijuh oaroh dir, luhwen mwingehk. Jesus ken kadarpijoang pokonno, 10 Ih ken doauda pohn pohs pas pwili Nah sohnpadahkkok dauluhllahng nehn wein Dalmanutha.
Pharisee‑ok Poaki Manman oau jang ipen Jesus
11 Pharisee pwi indoa sapda akpwung oang Jesus. Irai nimen widingehdi, ioar ihr poakihki en wiahda oau manman jang nehnloannge. 12 Jesus pwuriamweikihla pwa, “Da armaj in anjoau kije poakihki manman oau jang nehnloannge? Ngoahi pwehng kamwai in mehlel, johpwa manman pirin aluhwoang di oauwe.”
13 Ih ken injang irai pwuroahng doauda pohn pohsso japahllahng oaloap jeddo.
Ihs in Pharisee‑ok apel Ihs in Herod
14 Sohnpadahkkok moalkoahla wahda kanrai pilahwa; ioarroar pilahwa pas mine iparai pohn pohsso. 15 Jesus koahkoahlik oang irai pwa, “Kamwai kalke kamwai jang ihs in Pharisee kan apel ihs in Herod.”
16 Irai sapda siksikoahpene nehn pwungarai, pwa, “Pwa joh pilahwa ipasai ioar Ih pwahki me.”
17 Jesus kidal pwa da irai pwahpwahpwa, Ih idoak iparai, “Dahkij kamwai siksikoa pwa joh pilahwa ipamwai? Kamwai kahjikkoar marainkihla joang kan? Kamwai inenin nehn kapehd rosros! 18 Mine pwoaroan mijamwaikan — a da kamwai joah kapangki wija? Mine siamwaikan — a da kamwai joah rongki wija? 19 Kamwai moalkoahla lopwon in pilahwa limoauwo ma Ngoahi kamwingehkihla armaj limekiddo? Kiam doapoa kamwai audohda jang luhwen mwingehk?”
Irai pwehng Ih, “Min eijek riau.”
20 “A lopwon in pilahwa ijuhwo ma Ngoahi kamwingehkihla armaj pahkiddo? Kiam doapoa kamwai audohda jang luhwen mwingehk?”
Irai pwehng Ih, “Min ijuh.”
21 A Ih idoak iparai, “A kamwai kahjikkoar woahwoahkihla?”
Jesus Kemwehuwihla Woal in Bethsaida Majkun men
22 Irai lel Bethsaida; wijahu armaj pwi ukdohng Jesus woal majkun men poaki en pukkoang. 23 Jesus oaloa poahn min majkunno uklahng likin koaujoan. Mwerin Ah andipoahdi pohn pwoaroan mijoahk, kihdahng poah pohn woallo, Jesus idoak ma ih ne kapang wija ke joah.
24 Woal majkunno poahdpijoang pwehng Jesus, “Maing, ngoahi kak kapang armaj kan, a doahrma ma pwen suhkoahpwi allaluhjili.”
25 Jesus pel pwuroahng kihda poahk pohn pwoaroan mijen woallo, woallo pwuroahng poahdpijoang; a me ne mwehula, ih ne kak kapang me ohroj mwehu. 26 Jesus ken kadarla ih in umwahu, pwehng, “Alwe in umwoammwo, koawoa johpwa pwurla nehn koaujoanno.”
En Peter ah Kajalehda doahroar Jesus
27 Jesus apel Nah sohnpadahkkok inlahng nehn koujapw pwi ipen Caesarea Philippi. Ih idoak iparai nehn allo, pwa, “Inje ma armaj kan kin pwahki Ngoahi?”
28 A irai japoang, “Epwi kin pwa koawoa John jounpoapdaij, epwi pwa koawoa Elijah, a epwi pwa koawoa emen joukohp in mehjjok.”
29 A Ih idoak iparai, “A kamwai, inje kamwai pwahki Ngoahi?”
Peter japoang, “Koawoa ioar Messiah.”
30 Jesus kainoapwihdi irai en johpwa pwehng emen.
Jesus pwa doahroar Ah pel Loklok apel Mehdi
31 Jesus sapda kawoahwoahng Nah sohnpadahkkok doahroar Nihn‑Armaj uhdahn pirin loklok koalik, jekenkenla pehn koaunnok, jamwrou laplappok apel jounpadahk in Kojonneddok. Ih pirin kojkojdi, a mwerin rehn jiluh Ih pirin iejda. 32 Ih pwehng irai mehpwiai in janjal. Peter kalahpwukihla Jesus wijahu, sapda koapwung oang Ih. 33 A Jesus pwurla kapang Nah sohnpadahkkok, koapwung oang Peter, “Alwe jang Ngoahi Jehsen, pwa oamw lamlam en, jaudi jang ipen Koahs a jang ipen armaj.”
34 Jesus ken kapokonpene armaj dir apel Nah sohnpadahkkok, pwehng irai, “Ma emen in kamwai nimen indoa pwili Ngoahi, en uhdahn moalkoahla pein ih, wahda ah lohpwu, pwilihla Ngoahi. 35 Pwa emen ma nimen doaroahla ah mour ih pirin luhj jang; a emen ma mihndahkihla ah mour ki Ngoahi, apel rongmwehuwo, ih pirin mourla. 36 Pirin mine kaspoan oamw en ankihla jampah pwon, a luhj jang oamw mour? 37 Joh douluhl, joh mehkij koawoa kak kihda pwa en japahl oang oamw mour. 38 Ma emen pirin mehkki Ngoahi apel Oai padahk ipen armaj in di nauna apel dipan oauwe, ioar Nihn‑Armaj pirin pel mehkki ih nehn Ah pirin indoahki lingin Jamahu pwilihki Nah sohnloang joarwi kan.”
This is a DRAFT translation. Please email comments and suggestions for improvement to peter_knapp at sil dot org, giving the translation, book, chapter, verse, current reading, and suggested reading.