1 Iuda ena natuna be inai: Perese, Hesarona, Karami, Huru bona Sobala. 2 Sobala be Reaia ena tamana. Reaia be Iahata ena tamana. Iahata be Ahumai bona Lahada edia tamana. Unai be Sora hanua taudia edia sene taudia.

3 Etama ena natuna tau be inai: Ieserele, Isima, bona Idibasa. Edia taihuna ena ladana be Haseleleponi.

4 Huru ena natuna tau be toi, Etama, Penuela bona Esere. Penuela ese Gedoro hanua ia hamatamaia, bona Esere ese Husa hanua ia hamatamaia. Huru be Kaleba bona iena adavana Eparata edia natuna vara guna.

Huru ese Betelehema hanua ia hamatamaia.

5 Asahuru ese Tekoa hanua ia hamatamaia. Asahuru ena adavana be rua, Hela bona Nara. 6 Nara ese Asahuru dekenai ia havaraia natuna tau be ibounai 4: Ahusama, Hepere, Temeni, bona Hahasatari. 7 Hela ese Asahuru dekenai ia havaraia natuna tau be ibounai toi: Serete, Isara, bona Etenana.

8 Koso be Anuba bona Sobeba edia tamana. Koso danu be Aharahele, Harumu ena natuna ena iduhu taudia edia sene tauna.

9 Tau ta, iena ladana be Iabese, be kara maoromaoro tauna momokani, ia ese iena tadikakana ibounai ia hereaia. Iena sinana ese iena ladana ia atoa Iabese, anina be “hisihisi,” badina be ia ese ia havaraia mai hisihisi bada danu. 10 To Iabese ese Israela ena Dirava dekenai ia noinoi, ia gwau, “Dirava e, mani emu kara, lau do oi hanamoa, lau dekenai tano momo do oi henia. Lau dekenai do oi noho, bona dika dekena amo lau do oi naria, vadaeni hisihisi do lau davaria lasi.”

Bona Dirava ese Iabese ena guriguri ia kamonai, bona iena ura gauna ia henia.

11 Kelubu, Suha ena tadina, be Mehiri ena tamana. Mehiri be Esetono ena tamana. 12 Esetono be Bete Rapa, Pasea bona Tehina edia tamana. Tehina be Irinahasa ena tamana. Unai be Reka hanua taudia edia sene taudia.

13 Kenasi ena natuna tau be Otoniele bona Seraia. Otoniele ena natuna tau be Hatata bona Meonotai. 14 Meonotai be Opera ena tamana. Seraia be Ioaba ena tamana. Ioaba be Geharasimi taudia edia sene tauna. Geharasimi ena anina be “gaukara taudia,” badina idia be imana gaukara diba momo taudia.

15 Kaleba Iepune ena natuna tau be inai: Iru, Elaha bona Nama. Elaha ena natuna be Kenasi.

16 Iehalelele ena natuna tau be inai: Sipi, Sipaha, Tiria, bona Asarele.

17 Esera ena natuna tau be inai: Ietere, Merede, Epere, bona Ialono. Merede ese Aigupito king ena natuna hahine ia adavaia, bona ia iese ena natuna kekeni, Miriama, bona iena natuna memero, Samai bona Isiba ia havaraia. Isiba ese Esetemoa hanua ia hamatamaia. 18 Ma Merede ese danu Iuda hahine ta ia adavaia, edia natuna tau be inai: Ierede, Hebere bona Iekutiele. Ierede ese Gedoro hanua ia hamatamaia. Hebere ese Soko hanua ia hamatamaia. Bona Iekutiele ese Sanoa hanua ia hamatamaia.

19 Hodaia ese Nahama ena taihuna ia adavaia. Edia natudia ese Gama iduhu taudia bona Makata iduhu taudia idia havaraia. Gama taudia be Keila hanua dekenai, bona Makata taudia be Esetemoa hanua dekenai idia noho.

20 Simono ena natuna tau be inai: Aminona, Rina, Benehanana, bona Tilono.

Isi ena natuna tau be inai: Sohete bona Benesohete.

21 Sela be Iuda ena natuna tau ta. Sela ena natuna tau be inai: Ere, Leka hanua ia hamatamaia tauna, bona Lada, Maresa hanua ia hamatamaia tauna. Inai Lada ese ia havaraia iduhu taudia ese dabua aukadia hatua dalana idia diba, bona Bete Asabea hanua dekenai idia noho.

22 Sela ena bese haida be Iokimi, bona Koseba hanua dekenai idia noho taudia. Sela danu be inai tau rua edia sene tauna: Ioasa bona Sarapa. Idia ese Moaba hahine taudia idia adavaia, bona Betelehema hanua dekenai idia noho. (Inai sivarai be gunaguna momokani gauna.) 23 Unai Ioasa bona Sarapa idia havaraia bese taudia be uro karaia gaukara taudia idia lao, bona king dainai unai bamona gaukara idia karaia Netaimi hanua bona Gedera hanua dekenai.

24 Simeona ena natuna tau be inai: Nemuele, Iamina, Iaribi, Sera, bona Saulo. 25 Saulo ena natuna tau be Salumu. Bona Salumu ena natuna tau be Mibisama. Mibisama ena natuna tau be Misima. 26 Misima ena natuna tau be Hamuele. Hamuele ena natuna tau be Sakuru. Sakuru ena natuna tau be Simei. 27 Simei be mai ena natuna tau ibounai 16, bona iena natuna hahine be 6. To Simei ena tadikakana edia natudia be momo lasi, bona Simeona iduhu be ia bada daekau momokani lasi, Iuda iduhu ese ia hanaia momokani.

28 Simeona taudia edia noho gabudia be Bere Sieba, Molada, Hasara Suala, 29 Bileha, Eseme, Tolada, 30 Betuela, Horoma, Sikilaga, 31 Bete Makaboto, Hasara Susimi, Bete Biri, bona Saraimi. Edia hanua badadia be unai, ela bona Davida ese king dagi ia abia negana.

32 Simeona taudia edia hanua maragidia be inai: Etama, Aina, Rimono, Tokene, Asana, hanua ibounai 5, 33 mai edia hanua maragidia haida danu, hanua badadia idia hagegea gaudia, ela bona Balata hanua. Simeona iduhu taudia edia noho gabudia be unai, bona idia ese edia sene taudia edia ladana, bona edia noho sivarai ibounai idia torea namonamo.

34 Simeona iduhu ena iduhu maragidia edia gunalaia taudia be inai: Mesobaba, Iamileka, Iosa Amasaia, 35 Ioela, Iehu Iosibaia, Seraia Asiele ena tubuna, 36 Elioenai, Iakoba, Iesohaia, Asaia, Adiele, Iesimiele, Benaia, 37 bona Sisi Sipi, ia be Alono Iedaia ena tubuna, bona inai Alono be Simiri Semaia ena tubuna. 38 Inai edia ladana idia torea taudia be edia iduhu edia lohia taudia, bona unai iduhu ta ta idia bada lao.

39 Simeona taudia be idia laolao dina ia diho kahanai, ela bona Gedoro kahirakahira, bona edia mamoe be unuseni rei gabudia idia tahua. 40 Unai gabu dekenai rei namo herea idia davaria, bona tano palaka gabu badana, maino bona regerege lasi gabuna. Unuseni idia noho guna taudia be Hamo besena taudia.

41 Unai ladana idia torea vadaeni Simeona iduhu lohia taudia ese Hesekaia, Iuda king ena nega lalonai idia toreisi, Gerara dekenai idia noho Hamo taudia, bona Meunimi taudia edia ruma, bona palai ruma idia hadikaia ore. Simeona taudia ese unai Hamo bona Meunimi taudia idia alaia ore momokani, bona ia mai bona hari be edia tano dekenai idia noho, badina be edia mamoe edia rei gabuna be unuseni.

42 Bona idia haida, Simeona iduhu taudia ibounai 500, be Seiri Ororo dekenai idia lao. Idia edia gunalaia taudia be Isi ena natuna 4, Pelataia, Nearaia, Repaia bona Usiele. 43 Unai gabu taudia, do mauri noho Amaleka taudia be unai Simeona taudia ese idia alaia ore. Bona Simeona taudia be unuseni idia noho ia mai bona hari dina.