26
Dubu Helaga gimaia taudia
1 Levi taudia, Dubu Helaga do idia gimaia taudia edia orea be inai:
Kora iduhu dekena amo:
Meselemaia Kore, Asapa ena natuna tau ta.
2 Meselemaia ena natuna tau be 7, bona vara guna ela bona vara gabeai, edia ladana be inai: Sekaraia, Iediaele, Sebadaia, Iataniele, 3 Elama, Iehohanana, bona Eliahoenai.
4 Obeda Edoma be Dirava ese ia hanamoa dainai, iena natuna tau be 8, bona vara guna ela bona vara gabeai, edia ladana be inai: Semaia, Iehosabada, Ioa, Sakara, Netanele, 5 Amiele, Isakara bona Peuletai.
6 Obeda Edoma ena vara guna natuna Semaia ena natuna tau be 6, bona idia be mai edia diba momo dainai, idia be edia iduhu kwarana taudia. 7 Semaia ena natuna tau be Otini, Repaele, Obeda, Elisabada, Elihu bona Semakaia. Inai Elihu bona Semakaia be mai edia diba bada herea. 8 Obeda Edoma ena bese dekena amo diba momo bona goada taudia ibounai 62 ese inai gimaia gaukara idia karaia.
9 Meselemaia ena bese dekena amo danu be goada taudia 18 ese inai gaukara idia karaia.
10 Merari iduhu dekena amo, tau ta ladana Hosa danu ena natuna tau be 4: Simiri (ia be vara guna lasi, to iena tamana ese lohia tauna ia halaoa), 11 Hilekaia, Tebalaia, bona Sekaraia. Hosa ena bese dekena amo tau ibounai 13 ese Dubu Helaga gaukara idia karaia.
12 Dubu Helaga gimaia taudia be edia bese hegeregerena, orea haida idia gwauraia, bona inai orea ta ta dekenai Dubu Helaga ena gaukara idia henia, Levi taudia haida dekenai edia gaukara idia henia bamona. 13 Bese ta ta ibounai, badadia o maragidia, ese laki idia gadara, bona inai laki ese ia hedinaraia edena iduara, edena iduara do idia gimaia.
14 Selemaia ese laki dekena amo dina daekau kahana iduara ia abia, bona iena natuna tau Sekaraia ese laki dekena amo mirigini kahana iduara ia abia. Inai Sekaraia ese nega ibounai sisiba namona dekena amo taunimanima ia hagoadaia noho. 15 Obeda Edoma be laki ese ia abia hidi, diho kahana iduara do ia gimaia, bona iena natuna tau be sitoa ruma idia gimaia. 16 Supima bona Hosa be dina diho kahana iduara bona Salekete iduara idia abia. Salekete iduara be ia daekau lao dala dekenai ia noho. Gima taudia ese edia nega, edia nega dekenai gimaia gaukara idia karaia.
17 Dina ia daekau kahana dekenai Levi taudia 6 be dina ta ta dekenai idia gini noho, mirigini kahanai be 4, dina ta ta dekenai, diho kahanai danu be 4, dina ta ta dekenai. Bona sitoa rumadia dekenai gima taudia 4 idia gini, sitoa ta rua, sitoa ta rua.
18 Dina ia diho kahana Dubu ena dehe kahirakahira ia noho dala dekenai be gima taudia 4, bona dehe dekenai be rua.
19 Dubu Helaga gimaia taudia edia orea be unai. Idia be Kora iduhu bona Merari iduhu dekena amo taudia.
Dubu Helaga naria gaukara haida
20 Ahaisa, Levi iduhu tauna, ese Dirava ena Dubu kohu bona harihari gaudia helagadia haboua rumadia ia naria.
21 Ladana be Geresone ena natuna tau ta. Inai Ladana be bese haida edia sene tauna, iena natuna tau, Iehieli ena bese danu.
22 Iehieli ena natuna tau Setama bona Ioela ese Lohiabada ena Dubu Helaga ena moni haboua rumana bona sitoa naria gaukara idia karaia.
23 Inai bamona gaukara danu be Amarama, Isahara, Heberona, bona Usiele iduhu dekena amo taudia dekenai idia henia:
24 Sebuele, Mose ena natuna tau, Geresome ena iduhu tauna ta, ese Dubu Helaga ena moni haboua rumana ena biaguna dagi ia abia. 25 Sebuele be Selomiti ena varavara ta, Geresome ena tadina Eliesere dekena amo. Badina be inai: Eliesere be Rehabaia ena tamana. Rehabaia be Iesaia ena tamana. Iesaia be Iorama ena tamana. Iorama be Sikiri ena tamana, bona Sikiri be Selomiti ena tamana.
26 Selomiti bona iena tadikakana taudia ese Dirava dekenai henia harihari gaudia, be haboua rumana dekenai idia naria. Inai harihari gaudia be king Davida, bese lohia taudia, iduhu lohia taudia, bona tuari biagudia ese idia hahelagaia, Dirava ena. 27 Tuari dekenai idia abia kohu dekena amo, idia ese haida be harihari gaudia idia hahelagaia, bona Lohiabada ena Dubu Helaga lalonai idia atoa. 28 Bona peroveta tauna Samuela, bona Saulo Kisa, bona Abinere Nere, bona Ioaba Seruia ese idia hahelagaia gaudia danu. Unai harihari gaudia helagadia ibounai be Selomiti bona iena tadikakana danu ese idia naria.
Levi taudia ma haida edia gaukara
29 Isahara iduhu dekena amo, Kenanaia bona iena natuna tau idia abia hidi, Dubu ena murimurinai gaukara do idia karaia. Buka torea gaukara, bona kota biaguna gaukara Israela taudia edia huanai idia karaia.
30 Heberona iduhu dekena amo, Hasabaia bona iena tadikakana danu, bona diba momo taudia ibounai 1700, ese Israela tano, Ioridane Sinavai ena dina diho kahanai do idia naria, Lohiabada ena gaukara ibounai totona, bona king ena gaukara totona.
31 Ieraia be Heberona iduhu ena lohia tauna. Davida ena king lagani namba 40 lalonai ia ese Heberona besena edia sivarai ia tahua, bona diba momo bona goada taudia Iasere, Gileada ena hanua ta dekenai ia davaria. 32 Vadaeni king Davida ese Ieraia bona iena varavara taudia danu, diba momo taudia 2700, iduhu kwarana taudia, ia abia hidi. Inai taudia be Davida ese ia siaidia lao, Rubena iduhu, bona Gado iduhu bona Manase iduhu kahana taudia, do idia biagua, Dirava ena gaukara ibounai totona, bona king ena gaukara totona danu.