1 Vadaeni king Solomona ese Israela taubadadia bona iduhu edia gunalaia taudia ia boiria, idia mai Ierusalema dekenai, ia dekenai idia haboua. Hebou ena badina korikori be Lohiabada ena Taravatu Maua be Davida ena Hanua dekena amo Dubu Helaga dekenai do idia abia lao totona. 2 Inai hebou be hua namba 7, ena ladana Etanimi, aria badana neganai idia abia.

3 Israela tau badadia be unai neganai Solomona dekenai idia ginidae, vadaeni hahelagaia taudia ese Taravatu Maua idia abia isi, 4 Dubu Helaga dekenai idia huaia lao. Levi taudia bona hahelagaia taudia ese danu Lohiabada ena Palai Dubu, mai ena kohu ibounai danu, be Dubu Helaga dekenai idia abia lao. 5 Vadaeni king Solomona bona Israela taudia ibounai be Taravatu Maua ena vairanai idia hebou, bona mamoe bona boromakau momo herea, duahia diba lasi, boubou totona idia henia.

6 Unai neganai hahelagaia taudia ese Lohiabada ena Taravatu Maua idia mailaia, ena gabu momokani dekenai idia atoa, Helaga Herea Gabuna lalonai, kerubi edia hanina henunai. 7 Kerubi edia hanina ese Taravatu Maua bona iena huaia audia danu idia koua. 8 Unai huaia audia be lata herea dainai, edia duduna be tau ta ia itaia diba, bema Helaga Herea Gabuna ena vairana dekenai ia gini neganai, to Helaga Herea Gabuna ena murina kahana dekena amo ia itaia diba lasi. Unai audia be unuseni idia noho ia mai bona hari. 9 Taravatu Maua lalonai be gau ta lasi, unai nadi palaka rua, Sinai dekenai Mose ese ia udaia gaudia sibona. Unai be Lohiabada ese Israela taudia dekenai Taravatu ia henidia, Aigupito tano dekena amo idia raka mai neganai.

10 Hahelagaia taudia ese Helaga Gabuna idia rakatania neganai, ori ta ese Dubu Helaga ia hahonua. 11 Bona unai dainai, hahelagaia taudia be edia gaukara idia karaia diba lasi, badina be Lohiabada ena hairaina bona diaridiari ese iena Dubu Helaga ia hahonua.

12 Vadaeni Solomona ia guriguri, ia gwau,

14 Vadaeni Israela taudia idia do gini noho neganai, king Solomona be ia giroa, bona hebou taudia ibounai ia hanamoa. 15 Unai neganai ia gwau, “Lohiabada, Israela ena Dirava do ita hanamoa. Ia ese lauegu tamana Davida ena gwauhamata ia badinaia vadaeni, Lohiabada ia gwau, 16 ‘Lauegu bese Israela be Aigupito dekena amo lau hakaua mai dinana ia mai bona hari, Israela iduhu ibounai edia huanai hanua ta lau abia hidi lasi, lau ese do lau noholaia Dubu unuseni do ia gini totona. To lau ese oi, Davida lau abia hidi, oi ese lauegu bese do oi gunalaia totona.’ ”

17 Bona Solomona ia hereva noho, ia gwau, “Lauegu tamana Davida ese ia laloa, Lohiabada, Israela ena Dirava, ena Dubu do ia haginia gwauraia. 18 To Lohiabada ese Davida, ia hamaoroa, ia gwau, ‘Oiemu laloa be Dubu ta, lauegu Ladana do ia noho lalonai Dubuna do oi haginia, unai laloa be maoro. 19 To oi ese Dubu do oi haginia lasi. Oiemu natuna, dohore ia vara merona, ese lauegu Dubu do ia haginia.’

20 “Harihari Lohiabada ese iena gwauhamata ia hamomokania vadaeni, badina be lau ese lau toreisi, tamagu Davida ena gabuna dekenai, Israela ena king lau helai noho, Lohiabada ena gwauhamata hegeregere. Bona lau ese Dubu lau haginia vadaeni, Lohiabada, Israela ena Dirava be ia lalonai do idia tomadiho henia totona. 21 Unuseni danu be Taravatu Maua ena gabu lau karaia vadaeni. Ia lalonai be Lohiabada ena Taravatu, Aigupito tano dekena amo Lohiabada ese ia hakaudia mai neganai, iseda sene taudia dekenai ia henia gaudia.”

22 Vadaeni Solomona be Lohiabada ena boubou patana ena vairanai ia gini, Israela taudia ibounai edia vairanai. Iena imana ruaosi ia abia isi, 23 bona ia guriguri, ia gwau, “Lohiabada e, Israela ena Dirava, dirava ta oi hegeregerena be lasi, guba ataiai o tanobada henunai. Oiemu gwauhamata oi badinaia noho, bona oiemu bogahisihisi oi hedinaraia noho oiemu bese taudia dekenai, idia ese mai edia kudouna ibounai oi dekenai idia kamonai henia neganai. 24 Oiemu gwauhamata lauegu tamana Davida dekenai be oi ese oi badinaia vadaeni. Hari dina inai gwauhamata oi hamomokania vadaeni.

25 “Bona hari, Lohiabada e, Israela ena Dirava, lau noinoi oi ese oiemu gwauhamata ta, tamagu Davida dekenai oi henia gauna be do oi hamomokania. Unai gwauhamata be inai: Oi gwau, bema Davida ena natuna bona tubuna taudia ese edia kara ibounai dekenai oi idia kamonai henia, Davida ia karaia hegeregerena, idia ta be Israela gunalaia dagi dekena amo do ia moru diba lasi, ela bona hanaihanai. 26 Unai dainai, Israela ena Dirava e, oiemu gwauhamata tamagu Davida dekenai, mani emu kara do oi hamomokania.

27 “To Dirava be momokani tanobada dekenai ia noho diba, a? Guba, bona guba ena ataiai momokani be hegeregere lasi oiemu noho gabuna. Unai dainai inai dubu, lau ese lau haginia gauna be maragi, edena bamona do oi noholaia diba? 28 To Lohiabada, lauegu Dirava e, lau be oiemu hesiai tauna, lauegu guriguri mani do oi kamonai, bona hari dina lau noinoi gaudia do oi henia. 29 Dina bona hanuaboi inai Dubu Helaga do oi naria. Inai Dubu oi herevalaia vadaeni, oi gwau, ‘Lauegu Ladana be unuseni do ia noho.’ Unai dainai bema lau ese inai Dubu Helaga dekenai lauegu vairana lau henia, lau guriguri totona neganai, mani lauegu guriguri do oi kamonai. 30 Lauegu guriguri, bona oiemu bese taudia edia guriguri, inai Dubu dekenai aiemai vairana ai henia neganai, do oi kamonai. Oiemu noho gabuna, guba, dekena amo do oi kamonai, bona aiemai dika do oi gwauatao.

31 “Bema idia gwau tau ta ese iena badibadinai tauna dekenai ia kara dika, sedira oiemu Dubu Helaga ena pata helagana dekenai do idia hakaua mai, ia be kerere lasi do ia gwauhamata totona. 32 Unai neganai Lohiabada e, mani guba dekena amo do oi kamonai, bona oiemu hesiai taudia do oi kota henia. Kerere tauna ena davana do oi henia, iena dika hegeregerena. Bona kerere lasi tauna be maoro do oi gwauraia, iena maoromaoro do ia hedinaraia totona.

33 “Bema oiemu bese Israela be oi dekenai idia kara dika, bona unai dainai tuari dekenai idia lusi neganai, sedira oi dekenai edia lalona do idia giroa, bona inai Dubu Helaga dekenai do idia mai. Bona unai neganai, sedira oi dekenai do idia matauraia, bona oi dekenai do idia guriguri, edia dika do oi gwauatao totona. 34 Mani emu kara guba dekena amo do oi kamonai, bona oiemu bese Israela taudia edia dika do oi gwauatao, bona edia sene taudia edia tano dekenai ma do oi hakaudia lou.

35 “Bona bema idia ese oi dekenai idia kara dika dainai medu ia diho lasi neganai, sedira edia lalona do idia giroa, bona inai Dubu Helaga dekenai oi dekenai idia guriguri, mai manau danu.

36 “Unai neganai Lohiabada e, mani guba dekena amo do oi kamonai. King bona Israela taudia edia kara dika do oi gwauatao. Kara maoromaoro dalana idia dekenai do oi hadibaia. Bona unai neganai oiemu tano, oiemu bese taudia dekenai oi henia do idia biagua tano dekenai, medu do oi hadihoa.

37 “Sedira tano dekenai hitolo o gorere dikana ia ginidae, o bema uma ena anina be lai dikana o kwadi momo ese idia hadikaia. O sedira oiemu bese be tuari taudia ese do idia tuari henia, o gorere dikana do idia davaria. 38 Unai neganai edia guriguri do oi kamonai. Bema oiemu Israela taudia ta ese, mai lalohisihisi momokani danu be Dubu Helaga dekenai iena imana idia duduia neganai, 39 iena guriguri do oi kamonai. Guba dekena amo do oi kamonai, iena kara dika do oi gwauatao, bona ia be oi ese do oi durua. Badina be oi sibona ese taunimanima ibounai edia laloa oi diba noho. Idia ta ta dekenai edia kara, edia kara hegeregerena, durua do oi henia. 40 Unai dekena amo oiemu bese taudia ese oi do idia gari henia, edia sene taudia dekenai oi henia tano lalonai idia noho dinadia ibounai.

41 “Unai bamona danu, idau tauna ta, oiemu bese Israela tauna ta lasi, bema oiemu ladana namo herea sivarai ia kamonai dainai, bona oiemu siahu dainai, tano daudau dekena amo do ia mai, 42 bona bema inai Dubu Helaga lalonai do ia guriguri neganai, 43 unai neganai iena guriguri do oi kamonai, bona ia noinoi gauna do oi henia. Unai dekena amo tanobada bese ibounai ese oiemu ladana do idia diba, bona oi dekenai do idia gari, oiemu bese Israela taudia idia karaia hegeregerena. Bona unai neganai danu, bese ibounai do idia diba, inai lau ese lau haginia Dubu Helaga, be oi dekenai do idia tomadiho henia gabuna momokani.

44 “Sedira oiemu bese be oi ese do oi oda henia, idia ese idia dekenai tuari henia taudia do idia tuari henia. Bema oiemu bese ese inai hanua, bona inai lau haginia Dubu Helaga dekenai edia vairana idia henia, bona oi dekenai idia guriguri neganai, 45 edia noinoi do oi kamonai, bona guba dekena amo edia guriguri ena anina, kwalimu, idia dekenai do oi henia.

46 “Sedira oi dekenai oiemu bese taudia do idia kara dika, badina be dika ia karaia lasi tauna ta be lasi, vadaeni oi ese edia dika dainai do oi badu. Bona unai dainai idia dekenai tuari taudia oi koua lasi, vadaeni oiemu bese be tuari do idia lusi. Unai neganai kwalimu taudia ese oiemu bese taudia do idia guia, tano ta, kahirakahira o daudau dekenai do idia hakaua lao. 47 To unuseni, bema oiemu bese taudia ese mai edia lalona giroa danu oi dekenai do idia noinoi neganai, Lohiabada e, edia guriguri mani do oi kamonai. 48 Oibe, sedira oiemu bese taudia ese edia lalona do idia giroa momokani, bona aiemai sene taudia oi henia tano dekenai, bona inai hanua, bona inai, lau haginia Dubu Helaga dekenai edia vairana do idia henia, oi dekenai do idia guriguri. 49 Unai neganai edia noinoi do oi kamonai. Oiemu noho gabuna, guba lalonai, edia guriguri do oi kamonai, bona do oi bogahisihisi henidia. 50 Edia kara dika bona edia kerere do oi gwauatao, bona idia do oi bogahisihisi henia, idia guia taudia edia vairana dekenai. Vadaeni idia guidia taudia ese danu do idia bogahisihisi henia. 51 Badina idia be oiemu bese korikori, oi ese Aigupito tano dekena amo, unai amu mai hururuhururu danu dekena amo idia oi hakaua mai.

52 “Lohiabada Dirava e, oiemu bese taudia Israela bona edia king dekenai nega ibounai do oi laloa namo, bona edia guriguri bona edia taitai do oi kamonai henia. 53 Badina be, oi ese tanobada bese ibounai dekena amo idia oi abia hidi, oiemu bese korikori do idia lao totona. Inai be oi ese oiemu hesiai tauna Mose oi hamaoroa, aiemai sene taudia Aigupito dekena amo oi hakaudia neganai.”

54 Solomona be inai guriguri ia gwauraia noho neganai ia be ia tui diho, bona iena imana ia abia isi noho. Iena guriguri ia haorea neganai, boubou patana ena vairana dekena amo ia toreisi. 55 Unuseni ia gini, bona ia ese unuseni idia gini Israela taudia ibounai ia hanamoa, mai boiboi bada danu. 56 Ia gwau, “Lohiabada do ita hanamoa, badina be ia ese iena bese Israela dekenai maino ia henia, iena gwauhamata ibounai hegeregere. Iena gwauhamata namodia ibounai, iena hesiai tauna Mose ena uduna dekenai ia gwauraia gaudia, be Lohiabada ese ia badinaia vadaeni. 57 Lohiabada, iseda Dirava, be ita danu ia noho, iseda sene taudia danu ia noho hegeregerena, ia ese ita do ia rakatania lasi, ita do ia negea lasi. 58 Ia ese ita do ia hamanadaia ia dekenai, iena dala ibounai do ita raka, bona iena Taravatu bona oda ibounai, iseda sene taudia dekenai ia henia gaudia, be do ita badinaia. 59 Bona inai, lauegu guriguri bona noinoi, Lohiabada ena vairana dekenai lau gwauraia gaudia, lau ura Lohiabada iseda Dirava ese do ia laloatao nega ibounai. Lauegu noinoi danu be, Lohiabada ese nega ibounai Israela taudia bona edia king do ia bogahisihisi henia, bona dina ta ta ibounai edia mauri totona gaudia do ia henia. 60 Unai dekena amo tanobada besedia ibounai do idia diba, Lohiabada be Dirava, dirava idauna ta be lasi. 61 To umui, iena bese taudia ese mai emui lalona ibounai Lohiabada iseda Dirava do umui badinaia namonamo. Iena Taravatu bona oda ibounai do umui kamonai henia, hari dina umui karaia noho hegeregere.”

62 Vadaeni king Solomona, bona Israela taudia ia danu idia noho ese, boubou gaudia Lohiabada dekenai idia henia. 63 Solomona ese maino karaia boubouna totona boromakau 22,000 bona mamoe 120,000 ia henia. Unai dekena amo king bona Israela taudia ibounai ese Lohiabada ena Dubu Helaga idia hahelagaia.

64 Unai dina tamona dekenai king ese danu Dubu ena magu ena lalona gabuna, Dubu Helaga ena vairanai ia noho gabuna be ia hahelagaia. Unuseni king ese boubou vamuna ia gabua, bona paraoa ena boubou bona digara, maino karaia boubou gaudia danu ia henia. Inai bamona ia karaia, badina be auri laboralabora boubou patana, Lohiabada ena vairanai gauna, be bada lasi, hegeregere lasi unai boubou gaudia ia latanai do idia atoa dainai.

65 Unai dala dekenai Solomona ese unai neganai aria ia karaia, bona Israela taudia ibounai ia danu, hebou bada herea, Hamata ia raka vareai gabuna dekena amo ela bona Aigupito tano ena hetoa gabuna dekena amo taunimanima idia mai. Lohiabada iseda Dirava ena vairanai Au Raurau Ruma Maragidia Aria ta idia karaia, dina 7 lalonai. 66 Dina namba 8 dekenai Solomona ese taunimanima ia siaia lao. Idia ibounai ese Solomona idia hanamoa, bona edia ruma dekenai idia lao, mai edia moale bona mai edia lalona namo danu, Lohiabada ese iena hanamoa ibounai, be iena hesiai tauna Davida, bona iena bese Israela dekenai ia hedinaraia dainai.