1 King Davida, Solomona ena tamana ese Dubu Helaga haginia gabuna ia abia hegaegae vadaeni. Gabuna be Ierusalema dekenai, Moraia Ororo ena latanai, Lohiabada ese Davida dekenai ia hedinaraia gabuna. Unai gabu be Iebusu tauna, Arauna, ena uiti kwadia gabuna. 2 Solomona ese Dubu Helaga ia haginia hamatamaia dinana be iena lohia lagani namba 4 hua iharuana lalonai.

3 Solomona ese Dirava totona ia karaia Dubu Helaga ena bada be inai: Ena lata be 27 mita, bona ena lababa be 9 mita. 4 Dubu ena vairana kahana dehe ena lata be 9 mita, Dubu ena lababa hegeregerena, bona dehe ena ataiai be 54 mita.

Dehe ena lalonai be golo namo herea dekena amo idia koua. 5 Dubu ena daiutu badana ena lalona habadia be sida au reireidia dekena amo idia koua, bona reireidia be golo namo herea, dekena amo idia koua. Unai golo ena latanai herahera idia koroa, pama audia bona golo seini. 6 Solomona ese Dubu Helaga be mai hairaina totona, davana bada nadi namodia herahera gaudia haba bona gabu ta ta dekenai ia haginia vareai, golo herahera gaudia danu. Unai golo be tano ladana Paravaimi dekena amo. 7 Iena gaukara taudia ese danu Dubu ena guhi ena au latadia, raka vareai audia, iduara dogoatao gaudia, haba bona iduara ibounai be golo dekena amo idia koua, bona kerubi aneru edia laulau be haba dekenai ia noho golo ena latanai idia koroa.

8 Lalona momokani daiutuna, ena ladana be Helaga Herea Gabuna ena lata be 9 mita, ena lababa danu be 9 mita, Dubu Helaga ena lababa be unai. Unai Helaga Herea Gabuna ena haba ibounai be golo namo herea dekena amo idia koua, unai golo ena metau be 20 toni mai kahana. 9 Ikoko danu be golo dekena amo idia karaia, bona ataiai daiutudia danu be golo dekena amo idia koua.

10 King ese danu iena gaukara taudia ia oda henia, kerubi aneru rua do idia koroa, bona golo dekena amo do idia koua. Helaga Herea Gabuna ena lalonai idia atodia. 11 Kerubi ruaosi edia hanidia idia toia roro neganai edia lata ibounai be 9 mita. Kerubi ta ena hanina ta ena lata be 2 mita 20 sentamita, bona unai hanina ese Dubu ena haba dekenai ia kamokau. Iena hanina ta be kerubi ta ena hanina dekenai ia kamokau. 12 Unai bamona danu kerubi iharuana ena hanina ta ena lata be 2 mita 20 sentamita, bona Dubu ena haba ma ta dekenai ia kamokau, bona iena hanina ta be kerubi ginigunana ena hanina dekenai ia kamokau. 13 Inai kerubi aneru ruaosi edia hanina idia toia roro neganai edia lata be 9 mita. Inai kerubi be aedia dekenai idia gini, bona Dubu ena daiutu badana dekenai edia vairana idia henia.

14 Solomona ese Helaga Herea Gabuna ena koua dabua be dabua bulu, kakakaka sisina, bona kakakaka momokani, bona dabua aukana dekena amo ia karaia.

15 King ese du rua ia karaia, edia lata be 16 mita, bona Dubu Helaga ena vairana dekenai ia haginidia. Idia be mai edia kwaradia, bona edia lata be 2 mita 20 sentamita. 16 Du edia ataiai dekenai be reke bamona herahera idia koroa, bona auri laboralabora apolo ibounai 100 danu du ta ta edia ataiai idia koroa.

17 Du ruaosi be Dubu Helaga ena raka vareai gabunai idia atodia, ta be diho kahanai, ena ladana be Iakina, bona ta be mirigini kahanai, ena ladana be Boasi.