1 Ai sibona aiemai ladana ai hanamoa lou gwauraia, a? O sedira ai be haida bamona, ai ura umui dekenai revareva ai torea, umui emui hanamoa do ai abia totona. O sedira, haida ese ai idia hanamoa ena revareva umui dekenai do ai henia, a? Lasi momokani. 2 Aiemai ladana ia hanamoa ena revareva be umui sibona. Bona inai revareva ena toretore be aiemai kudouna dekenai ia torea. Ibounai ese inai revareva ena anina idia diba, bona idia duahia diba danu. 3 Taunimanima ibounai idia itaia diba, umui be revareva ta Keriso dekena amo. Aiemai gaukara dekena amo, Keriso ese inai revareva ia torea. Ia be ink dekenai ia torea lasi, to Mauri Diravana ena Lauma ese ia torea. Nadi latanai ia torea lasi, to taunimanima edia kudouna dekenai ia torea.

4 Inai bamona ai hereva diba, badina be Dirava ai abidadama henia momokani, Keriso ese ai ia hakaua noho dainai. 5 Ai sibona inai gaukara ai karaia be ai hegeregere lasi. Unai dainai ai sibona be aonega taudia ai gwauraia diba lasi. Dirava sibona ese aonega ai dekenai ia henia, vadaeni inai gaukara ai karaia diba. 6 Ia sibona ese ai dekenai diba ia henia, vadaeni, taravatu matamata do ai gwauraia hedinarai. Inai taravatu matamata be buka dekenai torea gauna lasi, to ia be Lauma Helaga ese ia hadibaia gauna. Badina be taravatu ena toretore be mase ia havaraia, to Lauma Helaga ese mauri ia havaraia.

7 Taravatu be Dirava ese nadi palakana dekenai ia torea, bona unai ia henia neganai Dirava ena hairai diarina ia hedinarai. Inai Taravatu ena kara taunimanima edia latanai be mase ia havaraia. To Taravatu ia vara neganai, Dirava ena hairai diarina danu ia vara nega tamona. Unai neganai Mose ena vairana ia diaridiari bada herea dainai, Israela taudia ese ia idia itaia noho hegeregere lasi. To unai diaridiari ia noho daudau lasi. 8 Taravatu ena diaridiari be unai bamona neganai, Lauma ena diaridiari ese do ia hereaia, ani? 9 Badina be bema unai taravatu dala gunana, taunimanima edia mase ia gwauraia dalana be mai ena diaridiari, Dirava ena vairanai ita maoromaoro dalana ena diaridiari be namo bada herea, ani? 10 Oibe, inai taravatu dala gunana be guna neganai mai ena diaridiari, to harihari iena diaridiari be lasi bamona. Badina be inai: Inai dala matamata ena diaridiari be namo bada herea momokani! 11 Badina be, bema unai dala gunana, ia noho daudau lasi gauna, be mai ena diaridiari neganai, inai dala matamata, do ia noho hanaihanai gauna, ena diaridiari be namo bada herea momokani, ani?

12 Ai diba momokani inai diaridiari matamata be ia bada lao noho, bona ia noho hanaihanai dainai, ai be gari lasi, ai hereva goada noho. 13 Ai be Mose ia karaia bamona ai karaia lasi. Ia ese iena vairana be muko dekenai ia koua, Israela taudia ese do ia doko diaridiari idia itaia garina. 14 To edia laloa be idia koua noho. Unai dainai Taravatu gunana idia duahia negadia ibounai, inai muko be ia do noho, ia mai bona hari. Idia kokia diba lasi. Badina be Keriso tamona sibona dekena amo Dirava ese unai muko taunimanima dekena amo ia kokia diba. 15 Oibe, Mose ena Taravatu idia duahia negadia ibounai, muko ese edia lalona ia koua noho, ia mai bona harihari. 16 To tau ta bema Lohiabada dekenai iena lalona ia giroa neganai, Dirava ese unai muko do ia kokia. 17 Lohiabada be Lauma Helaga. Bona bema Lohiabada ena Lauma be tau ta dekenai ia noho neganai, gau ta ese unai tau ia koua diba lasi. Lasi momokani, badina ia dekenai ura kwalimu ia noho. 18 Ita Keristani taudia ibounai, iseda vairana be muko ese idia koua lasi. Unai dainai Lohiabada ena diaridiari be ita ese ita hedinaraia, hevarivari bamona, taunimanima ibounai dekenai. Nega ibounai inai diaridiari ita dekenai ia bada lao noho, bona ia ese ita ia senisia noho, vadaeni iseda toana be, Lohiabada ena toana bamona do ita lao. Lohiabada be Lauma, bona ia ese inai kara do ia karaia.