1 Iehu, Israela ena king ena lohia lagani namba 7 neganai, Ioasa be Iuda ena king dagi ia abia hamatamaia. Ioasa be lagani 40 lalonai Ierusalema dekenai ia lohia karaia. Ioasa ena sinana be Sibaia, ia be Bere Sieba hanua hahine.

2 Ioasa be Lohiabada ena vairanai ia kara maoromaoro iena mauri dina ibounai lalonai, badina hahelagaia tauna Iehoiada ese ia hadibaia. 3 To gau tamona, ataiai idia noho tomadiho gabudia be Ioasa ese ia kokia lasi, bona taunimanima ese boubou karadia idia karaia, bona mai bonana muramura unai gabudia dekenai idia do gabua noho.

4 Ioasa ese hahelagaia taudia ia hereva henia, ia gwau, “Harihari gaudia helagadia moni ibounai, Lohiabada ena Dubu Helaga dekenai taunimanima idia mailaia gaudia, boubou totona idia henia moni, bona ura namona dainai taunimanima idia henia moni, be do umui haboua. 5 Hahelagaia taudia ta ta ese edia hesiai gaukara dainai taunimanima haida ese idia henidia moni, be do idia haboua namonamo, bona unai moni be Dubu ia dika gabudia hanamoa totona do idia gaukaralaia.”

6 To king Ioasa ena lohia lagani namba 23 lalonai, hahelagaia taudia ese Dubu Helaga hanamoa gaukara ta idia do karaia lasi. 7 Unai dainai, king Ioasa ese hahelagaia tauna Iehoiada bona hahelagaia taudia orena ia boiria hebou, idia ia gwau henia, ia gwau, “Badina dahaka Dubu Helaga umui hanamoa lou lasi? Hari ia lao, umui davaria moni be do umui dogoatao lasi. Umui ese unai moni Dubu Helaga hanamoa totona do umui henia.” 8 Vadaeni hahelagaia taudia idia laloa tamona, taunimanima edia moni do idia abia lou lasi, bona idia gwau danu, idia ese Dubu Helaga hanamoa gaukara do idia karaia lasi.

9 Unai neganai hahelagaia tauna Iehoiada ese maua ta ia abia, bona matu ta be maua ena koua gauna lalonai ia budua. Vadaeni Iehoiada ese boubou patana ena idiba kahana dekenai maua ia atoa, Dubu Helaga ena raka vareai gabuna dekenai. Vadaeni Dubu ena iduara idia naria hahelagaia taudia ese unai Dubu dekenai ia vareai moni ibounai be unai maua lalonai idia udaia, taunimanima idia henia moni be unai. 10 Bema idia itaia, moni momo be maua lalonai ia noho neganai, king ena toretore tauna, bona Hahelagaia Tauna Badana idia mai, bona idia ruaosi ese Lohiabada ena Dubu Helaga dekenai idia atoa moni idia duahia, bona puse edia lalonai idia udaia.

11 Moni ena bada idia diba namonamo neganai, idia ese Dubu Helaga hanamoa lou gaukara naria taudia dekenai idia henia. Inai moni dekenai, Lohiabada ena Dubu Helaga dekenai idia gaukara kamuta bona ruma haginia taudia edia gaukara davana idia henia, 12 bona nadi gaukaralaia bona utua taudia edia davana danu. Ma idia ese au bona nadi namodia idia hoia, Dubu hanamoa totona. Bona Dubu Helaga hanamoa lou gaukara ma haida edia davana be unai moni dekena amo idia karaia.

13 To unai Dubu dekenai idia mailaia moni be siliva kapusi, lamepa hagoevaia gaudia, disi, kibi, bona golo o siliva uro hoia totona idia gaukaralaia lasi. 14 Badina unai moni be Lohiabada ena Dubu Helaga hanamoa lou gaukara sibona totona, bona gaukara taudia dekenai idia henia. 15 Unai moni edena bamona idia gaukaralaia, be idia henia taudia dekena amo idia tahua lasi, badina be idia ese unai moni idia gaukaralaia, mai maoromaoro bona momokani danu.

16 To kara dika totona bouboudia bona kara kerere totona bouboudia moni be Lohiabada ena Dubu Helaga dekenai idia atoa vareai lasi. Unai moni be hahelagaia taudia edia.

17 Unai neganai Hasaele, Suria ena king, be ia lao, Gata hanua ia tuari henia, bona ia abia. To Hasaele be Ierusalema dekenai ia raka lao, do ia tuari henia totona neganai, 18 Ioasa, Iuda ena king, ese harihari gaudia helagadia ibounai, Iehosapata bona Iehorama bona iena tamana Ahasaia, Iuda ena king, ese Lohiabada dekenai idia henia gaudia, bona ia ese ia henia gaudia, bona Dubu Helaga, bona king ena ruma lalonai ia noho golo ibounai be king Hasaele dekenai ia siaia lao. Unai neganai king Hasaele ese iena tuari taudia Ierusalema dekena amo ia hakaudia lao siri.

19 Ioasa ena kara orena, iena kara ibounai, be Iuda Ena King Edia Sivarai Buka lalonai idia torea vadaeni.

20 King Ioasa ena hesiai taudia be idia toreisi, Ioasa do idia alaia mase totona dala idia tahua. Vadaeni idia ese Milo kohoro dekenai, Sila dekenai ia diho lao dala ena badinai Ioasa idia alaia mase. 21 Ioasa ena hesiai taudia rua, Iosaka Simeata bona Iehosabada Somere, ese Ioasa idia alaia mase.

Vadaeni Ioasa be Davida ena Hanua dekenai idia guria, king edia guria gabuna dekenai. Ioasa ena gabu dekenai, iena natuna Amasaia ese king dagi ia abia.