1 Peka Remalaia, Israela ena king, ena lohia lagani 17 lalonai Ahasa Iotama ese Iuda ena king dagi ia hamatamaia. 2 Ahasa ese ia lohia hamatamaia neganai, iena mauri lagani be 20, bona lagani 16 lalonai Ierusalema dekenai ia lohia karaia. Ahasa be ia kara maoromaoro lasi iena Dirava, Lohiabada ena vairana dekenai. Ia ese iena sene tauna Davida hegeregerena ia karaia lasi. 3 To Israela ena king edia kara bamona ia karaia. Ia ese danu iena natuna tau be lahi lalonai ia gabua ore. Inai kara be, Lohiabada ese Israela taudia edia vairanai ia lulua lao besedia edia kara dika herea hegeregerena. 4 Ahasa ese danu boubou karadia ia karaia, bona mai bonana namo muramura ia gabua, ataiai idia noho tomadiho gabudia dekenai, bona au namodia ibounai edia henunai danu.

5 Vadaeni Resini, Suria ena king, bona Peka Remalaia, Israela ena king ese Ierusalema tuari henia totona idia raka daekau mai. Idia ese Ierusalema idia koua hagegea, to idia ese Ahasa idia halusia diba lasi. 6 Unai neganai Edoma ena king ese Elata hanua ia abia lou, Edoma ena, bona unuseni idia noho Iuda taudia ia lulua lao ore. Vadaeni Edoma taudia be Elata dekenai idia lao, bona unuseni idia do noho, ia mai bona hari dina.

7 Unai dainai Ahasa ese hereva gwauraia taudia be Tigolata Pilesere, Asuria ena king dekenai ia siaia lao, ia gwau, “Lau be oiemu hesiai tauna bona oiemu natuna. Mani emu kara do oi mai, lau idia tuari henia noho taudia, Suria ena king, bona Israela ena king edia siahu dekena amo lau do oi hamauria.” 8 Ahasa ese danu Lohiabada ena Dubu Helaga dekenai, bona king ena ruma moni haboua gabuna dekenai, edia siliva bona golo ia abia, bona harihari gauna bamona, Asuria ena king dekenai ia siaia.

9 Vadaeni Tigolata Pilisere ese Ahasa ena noinoi ia kamonai henia. Tigolata Pilisere be ia lao, Damaseko hanua ia tuari henia. Asuria taudia idia kwalimu, bona Damaseko hanua idia abia. Idia ese danu king Resini idia alaia mase, bona Damaseko taudia idia abia mauri, Kiri dekenai idia abidia lao.

10 King Ahasa be Damaseko dekenai ia lao, Tigolata Pilesere, Asuria ena king danu do ia hedavari totona. Unai neganai Ahasa ese boubou patana ta ia itaia, Damaseko dekenai. Vadaeni king Ahasa ese unai boubou patana ena laulau ta ia abia, hahelagaia tauna Uria dekenai ia siaia lao. Unai laulau ese unai boubou patana karaia dalana bona iena toana ia hedinaraia namonamo. 11 Vadaeni Uria ese boubou patana ta ia haginia, king Ahasa ese Damaseko dekena amo ia siaia lao hereva ibounai hegeregerena. Bona Ahasa be Ierusalema dekenai do ia giroa mai lasi neganai, unai boubou patana be Uria ese ia karaia haorea vadaeni.

12 Damaseko dekena amo ia giroa mai neganai Ahasa ese inai boubou patana ia itaia, ia raka kahirakahira lao, bona ena vadavada dekenai ia daekau. 13 Unai neganai ia ese iena boubou ia gabua ore, bona iena paraoa boubouna danu. Iena uaina boubouna danu unai boubou ena latanai ia bubua, bona iena maino karaia boubouna ena rarana be boubou patana ena latanai ia negea lao. 14 Unai auri laboralabora boubou patana gunana, Lohiabada ena vairanai ia noho gauna, be Dubu Helaga ena vairana kahanai, bona boubou patana matamatana bona Lohiabada ena Dubu Helaga edia huanai ia gini. Vadaeni Ahasa ese unai gunana ia kokia, bona unai boubou patana matamatana ena mirigini kahana dekenai ma ia haginia.

15 Unai neganai king Ahasa ese hahelagaia tauna Uria ia oda henia, ia gwau, “Inai boubou patana badana, matamata gauna, ena latanai be daba gabua ore boubouna, bona adorahi paraoa boubouna, bona king bona taunimanima edia gabua ore bouboudia, bona edia paraoa bouboudia, bona taunimanima edia uaina bouboudia do oi karaia. Bona gabua ore bouboudia bona boubou ibounai danu edia rarana be boubou patana matamatana ena latanai do oi bubua. To unai auri laboralabora boubou patana be lau ese do lau gaukaralaia, vaira neganai dahaka dohore lau karaia ena dala, Dirava dekena amo do lau tahua totona.” 16 Hahelagaia tauna Uria ese unai kara ibounai ia karaia, king Ahasa ena oda hegeregerena.

17 Vadaeni king Ahasa ese Dubu Helaga ena treila, auri laboralabora gaudia ia utua parara, edia haba gaudia ia kokia, bona idia dekena amo edia tanika maragidia ia abidia lao. Bona tanika badana, ia dekenai ranu ia noho gauna, be boromakau tau 12 edia laulau, auri laboralabora gaudia, edia latanai dekena amo ia abia diho, nadi palaka ena latanai ia atoa.

18 Ahasa ese danu Dubu Helaga dekena amo, king ena helai gabuna ena dehe ia kokia, bona king ese Lohiabada ena Dubu Helaga ia raka vareai gabuna, mai ena guhi danu ia kokia. Inai kara be Ahasa ese ia karaia Asuria king ena ura dainai.

19 Ahasa ena kara orena edia sivarai be Iuda Ena king Edia Sivarai Buka ena lalonai idia torea vadaeni. 20 Vadaeni Ahasa ia mase, bona Iuda ena king edia guria gabuna lalonai idia guria, Davida Ena Hanua dekenai. Ahasa ena gabuna dekenai, iena natuna tau Hesekaia ese king dagi ia abia.