1 Oiemu aniani be davara ena kopina dekenai do oi negea lao, badina be dina momo murinai do oi davaria lou.

2 Oiemu harihari gaudia be taunimanima momo dekenai do oi henia, badina be oi diba lasi edena negai dika oi dekenai do ia ginidae.

3 Bema ori be ranu dekenai idia honu neganai, medu be do ia diho. Bona au ia moru neganai, diho kahanai o mirigini kahanai, ia be unai ia moru gabuna dekenai do ia hekure noho.

4 Bema oi noho kava, noho kava, ela bona lai bona medu idia namo neganai, oi be gau ta do oi hadoa lasi, bona tano ena anina ta do oi davaria lasi.

5 Dirava ese gau ibounai ia karaia, bona oi ese iena kara ena dala oi diba lasi. Lai ena vara dalana oi diba lasi. Mero matamata be sinana ena bogana lalonai iena mauri ia hamatamaia dalana danu oi diba lasi.

6 Daba neganai, bona adorahi neganai danu, uhe do oi hadoa. Badina be oi diba lasi, do ia tubu namonamo o lasi. Sedira daba gauna, bona adorahi gauna ruaosi do idia tubu namonamo.

7 Diari be namo, bona mai moale danu ita ese dina ita itaia noho.

8 Tau ta ena mauri dinadia bema idia momo, ia ese idia ibounai do ia moalelaia. To do ia laloa, iena mase dinadia edia momo ese iena mauri dinadia edia momo do idia hanaia momokani. Do idia vara gaudia ibounai be anina lasi.

9 Uhau tauna e, oiemu eregabe dinadia lalonai do oi moale. Oiemu eregabe dinadia lalonai oiemu kudouna ese oi do ia hamoalea. Oiemu ura gauna do oi karaia, oiemu kudouna ena ura danu. To do oi laloaboio lasi, inai kara ibounai dainai Dirava ese oi do ia kota henia.

10 Unai dainai laloa hekwarahi oiemu kudouna dekena amo do oi atoa siri, bona hisihisi be oiemu tauanina dekena amo do oi abia siri danu, badina be uhau bona eregabe negadia be idia daudau lasi.