1 Ma Dirava ese Mose dekenai ia hamaoroa, ia gwau, “Inai bamona taravatu Israela taudia dekenai do oi henia: 2 Bema Heberu tauna ta oi hoia, oiemu hesiai gaukara karaia totona neganai, ia be lagani 6 do ia gaukara oi dekenai. Vadaeni lagani namba 7 lalonai hesiai tauna ese iena biaguna dekenai moni do ia henia lasi biaguna do ia rakatania totona, ia be do ia rakatania kava. 3 Sibona oi dekenai ia mai gaukara neganai, sibona oi dekena amo do ia rakatania. To mai adavana danu oi dekenai ia mai gaukara neganai, mai ena adavana danu oi dekena amo do idia rakatania. 4 To bema adavana lasi ia mai gaukara, vadaeni biaguna ese hahine ta ia henia, unai hahine be biaguna do ia rakatania diba lasi. Unai tau be iena biaguna ia rakatania neganai, unai hahine mai ena natuna danu be biaguna ese do ia dogoatao. 5 Sedira hesiai tauna do ia gwau, ‘Lau be egu biaguna, bona egu adavana, bona egu natuna dekenai lau ura henia, lau ura lasi lau rakatania kava.’ 6 Unai neganai unai tau be, iena biaguna ese do ia mailaia Dirava ena vairana dekenai. Iduara dekenai o iduara ena auna dekenai, biaguna ese unai hesiai tauna ena taiana dekenai nila amo matuna do ia karaia. Vadaeni unai tau ese iena biaguna dekenai do ia gaukara noho, ia lao bona ia mase.

7 “Bema tau ta ese iena natuna kekeni ta ia hoia lao hesiai gaukara davana lasi karaia totona, ia ese iena biaguna do ia rakatania lasi, tau ese ia karaia bamona. 8 Bema iena biaguna ese ia hoia badina be do ia adavaia gwauraia, to gabeai ia moale lasi unai kekeni dekenai, vadaeni kekeni ena varavara ese do idia hoia lou. Iena biaguna ia hoia lao diba lasi idau taudia dekenai. Unai be maoro lasi, badina be ia ese iena ura henia inai kekeni dekenai ia makohia vadaeni. 9 Bema ia ura inai kekeni be iena natuna mero dekenai do ia henia, ia ese kekeni iena ravana korikori do ia halaoa. 10 Bema hahine ta ma do ia abia neganai, ia ese iena hahine gunana dekenai ia henia aniani bona dabua do ia hamaragia lasi, bona do idia mahuta hebou noho, guna idia karaia bamona. 11 To bema inai kara ibounai ia karaia lasi iena hahine gunana dekenai, unai hahine ese do ia rakatania diba, bona biaguna dekenai moni do ia henia lasi.

12 “Bema tau ta ese tau ta ia botaia, vadaeni ia alaia mase, unai tau danu do idia alaia mase. 13 To bema alaia mase totona ia laloa guna lasi, to inai kerere ia vara kava, lau ese gabu ta do lau hadibaia oi dekenai, vadaeni unai tau do ia heau lao unuseni, mauri davaria totona. 14 To bema tau ta ese iena badu ia toreisi guna, vadaeni tau ta ia alaia mase, unai ala-ala tauna do umui alaia mase. Bema unai ala-ala tauna ese egu boubou patana dekenai ia heau lao, mauri davaria totona, umui ese boubou patana dekena amo do umui kokia lao, bona do umui alaia mase.

15 “Tamana o sinana do ia botaia tauna be do umui alaia mase.

16 “Bema tau ta ese taunimanima ta ia abia mauri dagedage dala dekenai, do ia hoia totona, o iena hesiai gaukara davana lasi do ia karaia totona, unai tauna do umui alaia mase.

17 “Bema tau ta ese iena tamana o sinana dekenai ia hereva dika henia neganai, unai tau do umui alaia mase.

18 “Bema taunimanima idia heatu, vadaeni tau ta ese ia dekenai ia heatu tauna ia hodoa nadi dekenai, o imana dekenai ia botaia, to ia mase lasi, ia be davana do umui henia lasi. Bema bero ia abia tauna be iena mahuta geda dekenai ia hekure, 19 to gabeai ia toreisi, sedira raka auna dekenai ia loaloa, inai ia botaia tauna ese iena gorere davana do ia henia, bona iena hanamoa davana do ia henia, ia lao bona ia namo momokani.

20 “Bema tau ta ese iena hesiai gaukara davana lasi ia karaia tauna o hahine ia botaia au dekenai, vadaeni nega tamona ia mase, unai biaguna dekenai iena kerere davana do umui henia. 21 To bema unai hesiai tauna o hesiai hahine nega tamona ia mase lasi, to dina ta o rua murinai ia mase, unai biaguna dekenai davana do umui henia lasi. Badina be iena moni dekenai unai hesiai tauna ia hoia.

22 “Bema tatau idia heatu, vadaeni rogorogo hahine ta idia haberoa, ia mara dika, bona iena natuna ia mase, to hahine ia mase lasi. Vadaeni iena adavana be moni davana hida do ia gwauraia, bona hahine ia botaia tauna ese inai davana do ia henia, kota biaguna ena kota hereva hegeregerena. 23 To bema hahine ia mase, vadaeni ia alaia tauna ena mauri do umui utua. 24 Mata ena davana be mata, ise ena davana be ise, ima ena davana be ima, ae ena davana be ae. 25 Araia ena davana be araia, bero ena davana be bero, bona toto ena davana be toto.

26 “Bema tau ta ese iena hesiai gaukara davana lasi tauna o hahine ena matana ia haberoa, vadaeni ia hakepulua, unai hesiai tauna ese iena biaguna do ia rakatania kava diba, matana ena davana be unai. 27 Bema isena ta ia botaia, vadaeni isena ia moru, unai hesiai tauna ese iena biaguna do ia rakatania kava, isena ena davana be unai.

28 “Bema boromakau ta ese iena doana dekenai tau ta o hahine ta ia alaia mase, unai boromakau be nadi dekenai do umui hodoa mase, bona iena vamuna be do umui ania lasi. To iena biaguna be ia kerere lasi. 29 To sedira unai boromakau ese nega haida taunimanima ia hadikaia, bona biaguna dekenai guna idia sisiba henia vadaeni. To gabeai ia koua namonamo lasi dainai tau ta o hahine ta ia alaia mase, vadaeni unai boromakau be nadi dekenai do umui hodoa mase, bona biaguna danu do umui alaia mase. 30 To unai biaguna be iena mauri ia davaria diba bema davana bada ta, kota taudia ese idia gwauraia gauna, ia henia neganai. 31 Bema mero ta o kekeni ta danu boromakau ese ia alaia neganai, taravatu ena dala be do ia idau lasi. 32 Bema hesiai gaukara davana lasi tau ta o hahine ta be boromakau ese ia alaia neganai, boromakau ena biaguna be unai hesiai tauna o hahine ena biaguna dekenai siliva moni 30 do ia henia. Bona boromakau be nadi dekenai do umui hodoa mase.

33 “Bema tau ta ese guri ta, kehoa gauna ia rakatania, o guri ta ia geia, vadaeni ia koua lasi, gabeai boromakau ta o doniki ta be guri lalonai ia moru, 34 ia ese unai boromakau o doniki ena biaguna dekenai davana do ia henia, bona unai boromakau o doniki, mase gauna be iena. 35 Bema tau ta ena boromakau ese tau ta ena boromakau ia alaia, unai tatau ruaosi be unai boromakau mauri gauna do idia hoia, bona moni do idia haria. Bona mase gauna ena vamu do idia haria danu. 36 To bema biaguna ia diba vadaeni unai boromakau be dagedage inai bamona, bona ia koua lasi, ia ese davana do ia henia. Boromakau ta, mauri gauna, do ia henia, mase gauna ena gabu dekenai, bona mase gauna be iena.”