1 Besalele ese akasia au dekena amo Taravatu Maua ia karaia. Maua ena lata be 110 sentamita, ena lababa be 66 sentamita, bona ena ataiai be 66 sentamita. 2 Maua ena lalona bona ena murimuri kahana ibounai be golo namona momokani dekenai ia koua, bona Maua ena hetoana be golo dekenai ia hagegea, herahera toana bamona. 3 Bona Besalele ese rini ibounai 4, golo dekena amo ia karaia, Maua do idia huaia totona. Inai rini 4 be Maua ena aena maragidia 4 dekenai ia kwatua auka. Rini rua be Maua kahana dekenai ia kwatua, ma rini rua be Maua kahana dekenai ia kwatua. 4 Maua huaia audia rua danu akasia au dekenai danu ia karaia, bona inai au ruaosi be golo dekenai ia koua. 5 Inai au ruaosi be rini lalonai ia toia vareai, Maua kahana kahana dekenai, Maua do idia huaia totona.

6 Maua ena koua gauna, kara dika gwauatao gabuna, danu golo namo herea momokani dekena amo ia karaia. Iena lata be 110 sentamita, bona iena lababa be 66 sentamita. 7 Ma golo, hama dekenai ia botaia golo dekena amo kerubi aneru rua danu ia karaia. Inai kerubi be Maua ena koua gauna ena duduna duduna dekenai do umui koroa kau. 8 Koua gauna ena duduna ta dekenai be kerubi aneru ta ia atoa, ma duduna ta dekenai be kerubi aneru ma ta ia atoa. Koua gauna bona kerubi ruaosi be golo tamona dekena amo ia karaia, idia be gau tamona, parara lasi.

9 Inai kerubi aneru ese edia hanina dekena amo koua gauna idia hunia bamona, bona inai kerubi aneru ruaosi ese ta ta dekenai edia vairana idia itaia noho.

10 Pata ta danu Besalele ese ia karaia, akasia au dekena amo ia karaia. Pata ena lata be 88 sentamita, bona iena lababa be 44 sentamita. Iena ataiai be 66 sentamita. 11 Golo namo momokani dekena amo ia koua, bona pata ena hetoana be golo dekenai ia hagegea, herahera toana bamona.

12 Pata ena isena be ia ese ia habadaia 8 sentamita dekenai, bona inai isena be golo dekenai ia koua. 13 Pata huaia totona rini ibounai 4 ia karaia, bona pata ena kona 4, aena gabudia dekenai ia kwatua auka. 14 Inai rini be pata ena isena kahirakahira ia kwatua auka. Inai rini lalonai pata huaia audia idia toia vareai. 15 Pata huaia audia be akasia au dekenai ia karaia, bona golo dekenai ia koua.

16 Pata dekenai atoa gaudia danu, mereki, kapusi, disi bona uro, uaina boubou totona gaudia be golo namo momokani dekena amo ia karaia.

17 Lamepa dogoatao gauna ta danu be golo namo herea dekena amo ia karaia. Iena badina bona iena du be golo, hama dekenai idia botaia gauna, dekena amo ia karaia. Iena rigi mai edia herahera ibounai danu be golo tamona dekena amo ia karaia.

18 Iena rigi be ibounai 6, kahana toi, kahana toi. 19 Inai rigi ta ta ibounai be mai edia herahera toi, edia toana be alamono au huahua bamona. 20 Lamepa ena du danu be mai ena herahera, herahera 4, edia toana be alamono au huahua bamona. 21 Rigi rua rua dekenai danu be herahera matamata ta ta ia koroa, rigi rua, herahera ta, rigi rua, herahera ta, bona rigi rua, herahera ta, rigi edia henuna kahadia dekenai. 22 Inai rigi ibounai, bona edia herahera gaudia ibounai, be lamepa patana danu golo tamona dekena amo ia koroa.

23 Lamepa ibounai 7 ia karaia, bona edia gabudia dekenai ia atoa. Lamepa hagoevaia gaudia bona momoru udaia mereki ibounai danu be golo namo herea dekena amo ia karaia. 24 Inai lamepa dogoatao gauna, mai ena kohu ibounai totona ia gaukaralaia golo ena metau be ibounai 35 kilogaram.

25 Pata helagana ta ia karaia, muramura mai bonana namona gabua gauna. Akasia audia dekena amo ia karaia. Pata ena lata be 45 sentamita, bona iena lababa danu be 45 sentamita, bona iena ataiai be 90 sentamita. Pata ena kona 4 dekenai be doa 4 ia koroa karaia. Inai doa be pata danu au tamona dekena amo ia karaia. 26 Pata ena kopina be golo namo herea dekena amo ia koua, iena ataiai, iena kahana 4, bona iena doa 4 danu. Pata ena isena be golo herahera dekena amo ia ese ia koua hagegea. 27 Rini rua be golo dekena amo ia karaia, bona pata ena isena henunai ia kwatua, ta pata ena kahana dekenai, ma ta pata ena kahana dekenai. Pata huaia totona au rua be inai rini rua lalonai ia toia vareai. 28 Pata huaia audia rua be akasia audia dekena amo ia karaia, bona golo dekena amo inai au ia koua.

29 Bona ia ese dehoro helagana ia karaia, Dirava dekenai idia helaga taudia edia kwarana dekenai idia bubua dehoro be unai. Ma ia ese mai bonana namona muramura pauda, idia gabua gauna, ia mikisi namonamo.