4
Iuda dekenai idia dagedage henia taudia ese Dubu Helaga haginia lou gaukara idia koua gwauraia
1 Iuda bona Beniamina taudia idia ura hadikaia gwauraia taudia ese idia kamonai, inai hesiai mai guia danu dekena amo idia mai taudia ese Dubu Helaga idia haginia lou noho. Inai Dubu be Lohiabada, Israela ena Dirava, ena. 2 Vadaeni unai taudia be Serubabele bona iduhu lohia taudia dekenai idia lao, idia gwau, “Mani emui kara ai ese umui danu Dubu Helaga do ita haginia hebou, badina ai ese emui Dirava ai tomadiho henia noho, umui hegeregerena. Bona Esarahadona, Asuria ena king ese ai ia siaia, iniseni do ai noho totona. Iniseni ai ginidae neganai ia mai bona harihari, ai ese Dirava dekenai boubou gaudia ai henia noho.”
3 To Serubabele bona Iosua bona Israela iduhu lohia taudia ese idia haere, idia gwau, “Ai ese ai karaia noho Dubu, aiemai Dirava ena, be emui gaukara lasi. Ai Israela taudia sibona ese do ai haginia, Lohiabada, Israela ena Dirava, ena, king Sairasi, Parasa ena king, ese ai dekenai ia oda henia hegeregerena.”
4 Vadaeni unai tano taudia ese Iuda taudia edia lalodia idia hamanokaia toho, bona idia hagaridia toho, edia gaukara do idia koua totona. 5 Idia ese danu Parasa gavamani taudia haida dekenai moni idia henia, inai Iuda taudia edia gaukara do idia koua totona. Unai bamona idia karaia noho, Parasa ena king, Sairasi ena nega, ela bona Dariuse, Parasa ena king ena nega lalonai danu.
Ierusalema haginia lou gaukara be haida ese idia koua gwauraia
6 Parasa ena king Ahasuero ese king dagi ia hamatamaia neganai, Iuda bona Ierusalema taudia idia ura hadikaia taudia ese samania pepa idia torea, king dekenai Iuda bona Ierusalema taudia samania totona.
7 Ma danu, Aratasaseta be Parasa ena king neganai, Bisilama bona Miteredata bona Tabele, mai edia bamona taudia ese samania pepa ta king dekenai idia torea. Inai revareva be Arama ena revareva bona gado dekenai idia torea.
8 Ma danu, Rehumu, tuari biaguna, bona Simisai, toretore tauna, ese Ierusalema hadikaia totona revareva ta king Aratasaseta dekenai ia torea, ia gwau:
9 “Inai revareva ai siaia taudia be, Rehumu, tuari orea biaguna, bona Simisai, toretore tauna, bona aiemai gaukara bamona taudia danu, kota biaguna taudia, lohia taudia, gaukara naria taudia, bona Parasa bona Ereke bona Babulonia bona Susa taudia (unai be Elama taudia). 10 Bona lohia tauna badana, mai ladana bada, Osonopara ese edia gabudia dekena amo Samaria hanua dekenai, bona Euperate Sinavai ena dina diho kahanai idia abidia lao taudia danu dekena amo, inai revareva ia mai.”
11 Idia siaia revareva lalonai idia torea hereva be inai:
“Revareva be king Aratasaseta ena. King e, oiemu hesiai taudia, Euperate Sinavai ena dina diho kahanai ai noho ese oi ai hanamoa henia inai:
12 “King e, ai ura oi diba, oiemu tano dekena amo iniseni idia mai Iuda taudia be Ierusalema dekenai idia lao vadaeni. Idia ese unai dagedage bona kara dika hanua be ma idia haginia lou noho. Hanua ena magu idia haginia noho, bona nega sisina lalonai do idia haorea. 13 King e, namona be oi diba, bema inai hanua idia haginia lou, bona ena magu bema idia haorea neganai, inai Iuda taudia ese edia takisi moni oi dekenai do idia hadokoa, bona oi dekenai ia noho kohu be do ia maragi lao. 14 Oi be aiemai king, bona oiemu moni ai abia noho dainai, ai ura lasi mai hemarai danu oiemu kohu do idia maragi lao. Unai dainai inai revareva, oi king dekenai ai siaia inai, 15 vadaeni oiemu sene taudia edia sivarai buka lalonai do idia tahua. Unai sivarai buka lalonai do idia davaria, inai hanua Ierusalema be dagedage hanua, king bona basileia lohia taudia hadikaia gabuna. Nega gunadia dekena amo taravatu utua karadia be inai hanua lalonai idia tubu, unai dainai inai hanua idia hadikaia ore. 16 Unai dainai ai ese oi dekenai ai hadibaia, bema inai hanua idia haginia lou, bona bema hanua ena magu idia haginia haorea neganai, oi ese Euperate Sinavai ena dina diho kahanai gau ta do oi biagua lasi.”
17 King Aratasaseta ese iena haere ia siaia. Iena haere be inai:
“Inai revareva be Rehumu, tuari orea biaguna, bona Simisai, toretore tauna, mai edia gaukara bamona taudia Samaria bona Euperate Sinavai ena dina diho kahana basileia taudia ibounai dekenai ai siaia inai. Ai ese oi ai hanamoa henia inai:
18 “Umui ese umui siaia revareva, be egu vairana dekenai idia duahia hedinarai vadaeni. 19 Vadaeni oda lau gwauraia, bona buka gunadia idia tahua. Momokani idia davaria nega gunadia dekena amo unai hanua ese king taudia ia tuari henia, bona unai hanua lalonai dagedage bona taravatu negea karadia idia karaia vadaeni. 20 Ierusalema dekenai danu be king goadadia ese edia taunimanima idia biagua, bona idia ese Euperate ena dina diho kahanai basileia ibounai idia biagua danu, bona unai basileia noho taudia dekena amo takisi moni bona kohu idia gogoa. 21 Unai dainai umui ese oda do umui gwauraia, unai Iuda taudia ese Ierusalema haginia lou gaukara do idia hadokoa, ela bona lau ese oda hereva ta ma do lau gwauraia. 22 Inai haginia lou gaukara do umui koua haraga. Do umui manoka lasi. Lau ura lasi inai gari gauna do ia tubu noho ela bona ia bada, egu king siahuna do ia hadikaia garina.”
23 King Aratasaseta ena revareva be Rehumu bona toretore tauna Simisai mai edia bamona taudia danu dekenai idia duahia hedinarai, vadaeni idia be Ierusalema dekenai idia lao haraga, bona mai siahu bona goada danu Iuda taudia edia gaukara idia hadokoa.
24 Vadaeni Dirava ena Dubu Helaga haginia gaukara Ierusalema dekenai be ia doko, ela bona Dariuse, Parasa ena king, ena king lagani iharuana neganai.