14
Israela taudia be edia hesiai mai guia dekena amo do idia giroa mai
1 Lohiabada ese Iakobo besena do ia bogahisihisi henia, ia ese Israela do ia abia hidi lou, bona edia tano korikori dekenai do ia atodia lou. Unai neganai idau bese taudia be Israela taudia danu do idia noho hebou, Iakobo besena danu do idia tamona. 2 Idau bese momo taudia ese Israela taudia do idia durua, edia gabu korikori dekenai idia giroa lou neganai. Bona Lohiabada ena tano dekenai Israela taudia ese unai idau bese taudia do idia abia, edia hesiai taudia bona hahinedia do idia halaoa. Vadaeni, guna Israela taudia idia abidia mauri taudia be Israela taudia ese do idia abidia mauri, bona guna idia hisihisi henidia taudia, be Israela taudia ese do idia biagua.
3 Lohiabada ese emui hisihisi bona emui hekwarahi bona emui hesiai gaukara dekena amo laga-ani umui dekenai ia henia neganai, 4 umui ese ane do umui abia, Babulonia ena king do umui kirikirilaia totona, inai bamona:
“Kamonai! Hisihisi henia tauna be ia doko vadaeni.
Iena dagedage kara ia ore vadaeni.
5 Lohiabada ese,
kara dika taudia edia siahu ia hamakohia vadaeni,
bona edia king dagi,
ia ese ia haorea vadaeni danu.
6 Badina be idia king neganai,
idia ese mai badu danu,
basileia idauidau taudia idia alaia ore, doko lasi.
Idia ese mai dagedage danu,
basileia idauidau taudia idia biagua,
idia hisihisi henia,
idia bogahisihisi henia lasi.
7 To hari,
tanobada ena kahana ibounai,
be idia laga-ani noho,
mai maino danu idia noho.
Idia ibounai ese mai moale danu ane idia abia noho.
8 Kasuarina audia bona Lebanona sida audia danu ese,
Babulonia king ia mase dainai,
idia moale noho, idia gwau,
‘Oi moru negana ia mai bona hari,
au utua tauna ta be ai hadikaia totona ia mai lasi.’
9 “Mase gabuna be oiemu henunai ia mareremarere noho,
oi vareai mai neganai,
oi do ia hedavari henia totona.
Mase taudia edia laulaudia ia hanogaia,
idia ese oi do idia hanamoa totona.
Tanobada ena gunalaia taudia edia laulaudia,
bona basileia idauidau edia king ibounai edia laulaudia be,
edia terona dekena amo idia toreisi noho.
10 Idia ibounai ese oi do idia hamaoroa,
do idia gwau,
‘Oi danu oi manokamanoka vadaeni,
ai be manokamanoka bamona.
Oi be ai hegeregere oi lao vadaeni.
11 Oiemu hairaina be,
mase gabuna dekenai ia diho vadaeni,
oiemu gita badadia edia regena danu.
Bodaga ena gaigai maragidia,
be oiemu henunai momo herea do idia noho,
bona biluga momo herea ese oi do idia koua noho.’
12 “Daba ena hisiu e,
daba maragi ena natuna e,
guba dekena amo oi moru vadaeni!
Basileia idauidau oi hamorua tauna e,
hari be tano dekenai oi moru vadaeni!
13 Oi sibona dekenai oi gwau,
‘Guba dekenai do lau daekau lao,
Dirava ena hisiu edia ataiai,
be lau ese egu terona do lau atoa,
bona dirava idia hebou gabuna dekenai do lau helai.
Mirigini kahana dekenai ia noho ororo be unai.’
14 Oi gwau danu,
oi be ori edia ataiai do oi daekau lao,
Siahu Ibounai Dirava hegeregerena do oi lao.
15 To oi be mase gabuna dekenai,
Dirava ese oi ia atoa diho,
mase ena guri ena dobu gabudia lalonai.
16 “Oi idia itaia noho taudia ese,
oiemu dokona idia laloa noho,
bona idia hereva, idia gwau,
‘Inai be tanobada ia hamarerea tauna,
bona basileia idauidau,
be ia dainai idia heudeheude, a?
17 Inai tauna ese tanobada,
be tano kaukau ia halaoa vadaeni, a?
Ia ese tanobada ena hanua badadia ia halusia momokani,
bona ia abia mauri taudia ia guia momokani,
ma idia ia ruhaia lasi momokani tauna, a?’
18 “Bese idauidau edia king taudia ibounai,
be hairai dekenai idia hekure noho,
ta ta edia guria gabudia,
edia guria gabudia dekenai.
19 To oi be oiemu guria gabuna dekena amo,
oi idia negea daudau,
vara dika merona,
taunimanima ese idia negea ore bamona.
Tuari kaia dekena amo idia alaia mase taudia,
ese oiemu tauanina idia koua noho.
Oi be idia danu mase gurina,
ena dobu gabudia nadidia lalonai.
Unuseni oi bona idia,
emui tauanidia idia moia diho,
moia diho noho,
20 Oi be king haida hegeregerena,
oi do idia guria lasi,
badina be oi ese oiemu tano oi hadikaia,
bona oi ese oiemu tano ena taunimanima oi alaia mase vadaeni.
“Kara dika taudia edia bese taudia edia ladadia,
be do idia gwauraia lou lasi, ela bona hanaihanai.
21 Inai king dikana ena natudia tau alaia mase dalana,
be do umui karaia hegaegae!
Edia tamana ena dika dainai do idia mase!
Idia ta do ia toreisi lasi,
inai tano do ia gunalaia totona,
tanobada ena kopina,
be hanua badadia dekena amo do idia hahonua lou garina.”
Dirava ese Babulonia do ia hadikaia ore
22 Siahu Ibounai Lohiabada ia gwauhamata vadaeni, ia gwau, “Lau ese Babulonia do lau tuari henia, bona do lau hadikaia ore. Lau ese Babulonia taudia ibounai do lau alaia ore, ta do ia heau mauri lasi, natuna ta danu do ia mauri lasi. Lau, Lohiabada ese lau hereva vadaeni.” 23 Siahu Ibounai Lohiabada ese danu ia gwau, “Lau ese Babulonia do lau hadikaia, vadaeni ia be suampa gabuna do ia lao. Hanuaboi manu kepoto be unuseni do idia noho. Lau ese Babulonia do lau daroa momokani, egu daroa gauna dekena amo. Inai be gau ibounai ia hadikaia ore ena daroa gauna.”
Dirava ese Asuria taudia do ia hadikaia ore
24 Siahu Ibounai Lohiabada ia gwauhamata vadaeni, ia gwau,
“Lau ese lau palania gauna,
be momokani do ia vara,
bona lau gwau do lau karaia gauna,
be egu hereva hegeregerena do ia vara.
25 Lau ese Asuria taudia,
egu tano dekenai noho taudia do lau hadikaia ore.
Egu tano ena ororo dekenai,
idia do lau moia diho momokani.
Egu bese taudia be Asuria ena siahu dekena amo do lau ruhaia.
Idia ese maduna metaudia do idia huaia lou lasi.
26 Egu palani be inai,
lau laloa vadaeni gauna,
tanobada ibounai dekenai do lau karaia gauna.
Egu imana lau abia isi noho,
bese idauidau do lau panisia totona.”
27 Siahu Ibounai Lohiabada ese,
inai bamona ia laloa dainai,
daika ese iena ura do ia koua diba?
Iena imana ia abia isi vadaeni,
be daika ese ia atoa lou diba?
Dirava ese Pilistia taudia do ia hadikaia ore
28 King Ahasa ia mase lagani dekenai,
inai peroveta hereva ia ginidae:
29 Pilistia taudia ibounai e,
umui ia botaia auna be ia makohia vadaeni.
To do umui moale lasi,
badina be gaigai ta ia mase neganai,
gaigai dikana momokani ese,
iena gabu ia abia noho.
Gaigai ena gatoi dekena amo,
roho diba gaigaina do ia vara.
30 Lohiabada ese,
iena bese ogogami taudia do ia naria namonamo,
bona edia noho do ia hanamoa.
To ia ese umui Pilistia taudia,
emui latanai hitolo do ia siaia,
bona umui do mauri noho taudia,
be do umui mase momokani.
31 Umui Pilistia hanua ibounai e,
do umui tai!
Durua totona do umui boiboi!
Pilistia taudia ibounai e,
do umui gari maragi lasi!
Badina tuari ena kwalahu,
be mirigini dekena amo ia mai noho,
bona unai tuari orea lalonai,
gari tauna ta be lasi.
32 Pilistia dekena amo hereva mailaia taudia dekenai,
be edena bamona do ita haere henidia?
Do ita gwau,
“Lohiabada ese Siona ia haginia vadaeni,
bona Siona lalonai,
iena hisihisi noho taudia ese mauri do idia davaria.”