16
Moaba taudia edia lalohisihisi
1 Tano kaukau dekenai ia noho hanua, Sela dekena amo,
Moaba taudia ese mamoe idia siaidia.
Edia harihari gaudia be unai,
Ierusalema ena king tauna badana dekenai.
2 Moaba hahine taudia,
be Aranona Sinavai ena isena dekenai idia naria noho.
Idia raka mai, raka lao kava noho,
manu natudia be edia ruma dekena amo idia boio neganai bamona.
3 Moaba taudia ese Iuda taudia idia noia, idia gwau,
“Ai dekenai do umui hadibaia, dahaka do ai karaia.
Ai do umui durua,
au namona ese dina tubua neganai,
iena kerumakeruma ese,
taunimanima ia durua bamona.
Madi, ai be heau mauri taudia,
mani ai do umui hunia,
vadaeni ai idia lulua noho taudia,
ese ai do idia davaria lasi.
4 Madi, ai be Moaba dekena amo ai heau noho.
Mani emui kara, emui huana dekenai ai do umui abia dae,
bona ai hadikaia ore gwauraia taudia dekena amo,
ai do umui gimaia.”
Badina be negana ia mai noho,
hisihisi henia tauna be do ia boio,
bona hadikaia ore kara do ia doko.
Taunimanima idia dagedage henia taudia danu,
be tano dekena amo do idia boio.
5 Unai neganai king ta ena terona,
be bogahisihisi kara dekena amo do ia gini,
bona unai terona ena latanai,
kara maoromaoro tauna ta do ia helai.
Ia be Davida ena bese tauna,
bona ia ese taunimanima do ia biagua noho,
mai ena kota maoromaoro bona momokani danu.
Ia ese karaharaga kara maoromaoro dalana do ia karaia.
6 Iuda taudia idia gwau,
“Moaba taudia edia hekokoroku,
ena sivarai ita kamonai vadaeni.
Momokani idia hekokoroku noho,
bona idia hereva dagedage noho danu,
to edia hekokoroku hereva be koikoi.”
7 Unai dainai Moaba taudia,
be Moaba totona do idia taitai,
mai boiboi bada danu.
Io, do idia taitai hebou,
do idia lalohisihisi noho.
Kiri Haresete ena vain huahua kaukaudia keke totona,
do idia tai bada.
8 Hesebona ena uma gabudia idia kaukau vadaeni,
bona Sibima ena vain audia danu idia dika vadaeni.
Basileia idauidau edia lohia taudia ese,
unai vain namodia idia moia diho.
Unai vain umadia be bada,
idia be guna idia lao ela bona Iasere,
bona edia hetoa ta ia lao ela bona tano kaukau,
ma edia hetoa ta be ia lao ela bona davara.
9 Unai dainai Iasere taudia idia taitai hegeregerena,
lau danu lau tai noho,
Sibima ena vain dainai.
Hesebona bona Eleale e,
egu tai dainai,
egu matana ena ranu ese,
umui ia hapariparia noho,
badina be emui huahua gogoa,
bona emui anina haboua,
ena moale mai boiboi be ia doko vadaeni.
10 Moale bona laloa namo,
be emui uma, mai edia anina dekena amo ia ore vadaeni,
bona vain uma edia lalonai,
ane idia abia lou lasi.
Vain huahua moia gabudia dekenai,
tau ta ese vain ia moia lasi,
bona tau ta ia moale lasi.
11 Unai dainai, Moaba dainai,
egu kudouna ia tai noho,
gita badana ese ia tai bamona.
Kiri Haresete danu dainai lau tai noho.
12 Moaba taudia be mai edia hekwarahi bada danu,
edia ataiai guriguri gabudia dekenai idia lao noho.
Edia gabu helagadia dekenai idia guriguri noho,
to gau namona ta idia davaria lasi.
13 Inai Moaba taudia dekenai idia vara karadia be Lohiabada ese ia herevalaia guna vadaeni. 14 Bona hari Lohiabada ma ia hereva, ia gwau, “Lagani toi sibona idia ore neganai, Moaba ena kohu bada herea do ia boio ore. Iena taunimanima hari be momo, to lagani toi sibona idia ore neganai, idia tamona tamona sibona do idia heau mauri. Bona inai do mauri noho taudia be do idia manoka.”