1 Iseda Dirava be inai bamona ia hereva, ia gwau,

“Lauegu bese taudia do oi hagoadaia,

idia do oi hagoadaia.

2 Ierusalema dekenai idia noho taudia dekenai,

do oi hereva namo henidia.

Idia do oi hamaoroa,

edia hisihisi bona hekwarahi be ia ore,

bona edia kara dika,

be lau ese lau gwauatao inai.

Edia kara dika ena davana,

be lau ese lau henia momokani vadaeni.”

3 Gado ta be ia boiboi noho, ia gwau,

“Taunimanima idia noho lasi tano dekenai,

Lohiabada ena dala do umui karaia.

Tano kaukauna dekenai,

Dirava ena dala do umui hamaoromaoroa!

4 Koura gabudia ibounai do umui hahonua.

Ororo ibounai do umui hapalakaia.

Ororo maragidia be tano palaka do idia lao,

bona gudu gabudia ibounai,

be manada gabudia do idia lao.

5 Unai neganai Lohiabada ena hairaina be do ia hedinaraia,

bona taunimanima ibounai ese do idia itaia.

Lohiabada sibona ese inai bamona ia gwauhamata vadaeni.”

6 Gado ta ia boiboi, ia gwau,

“Hereva do oi gwauraia.”

Vadaeni lau gwau,

“Dahaka hereva do lau gwauraia?”

Ia gwau, “Oi gwauraia,

taunimanima ibounai be rei bamona,

Bona idia mase haraga noho,

uda tano ena herahera bamona.

7 Rei be ia kakoro,

bona herahera idia mase,

Lohiabada ese lai idia dekenai ia siaia neganai.

Momokani, taunimanima be rei bamona idia noho daudau lasi.

8 Oibe, rei idia kakoro haraga,

bona herahera idia mase noho,

to Dirava ena hereva,

be do ia gini noho ela bona hanaihanai.”

9 Sivarai namona Siona dekenai oi mailaia tauna e,

ororo latana ta dekenai do oi daekau lao.

Sivarai namona Ierusalema dekenai oi mailaia tauna e,

oiemu boiboi do oi habadaia,

mai oiemu goada danu.

Do oi habadaia, do oi gari lasi.

Iuda hanua ibounai do oi hamaoroa,

edia Dirava be ia mai noho!

10 Kamonai! Lohiabada Dirava,

be mai siahu danu ia mai noho.

Ia ese ia hamauria vadaeni taudia,

be ia danu do ia mailaia noho.

11 Ia ese iena mamoe do ia ubua,

mamoe naria tauna ia ubua noho bamona.

Ia ese mamoe edia natudia do ia haboua,

bona iena imana dekenai idia do ia rosia,

idia do ia huaia lao.

Bona edia sinadia bona rogorogo gaudia,

be ia ese metairametaira do ia hakaudia lao.

12 Daika ese iena imana dekenai ranu ia kadoa,

vadaeni unai kara dekena amo,

davara ranu ena bada do ia davaria?

Bona daika ese iena imana kwakikwakina dekenai,

guba ena ataiai ena lata do ia davaria diba?

Daika ese tanobada ena kahu ibounai,

be kapusi tamona lalonai do ia dogoatao diba?

Daika ese ororo badadia bona maragidia edia metau,

be sikele dekenai ia davaria diba?

13 Daika ese Dirava ena Lauma ena dala ia diba?

O daika ese ia dekenai ia hadibaia,

o ia dekenai ia sisiba henia diba?

14 Dirava ese daika dekenai ia nanadaia,

laloa diari do ia abia totona?

Daika ese Dirava dekenai dala maorona ia hadibaia?

Daika ese Dirava dekenai diba ia henia,

bona laloa kehoa dalana ia hedinarai henia?

15 Kamonai!

Tanobada besedia be ranu ena hetuturu tamona bamona,

Lohiabada ena vairana dekenai.

Motumotu, daudau idia noho gaudia edia metau,

Lohiabada dekenai be tano ena kahu marigidia bamona.

16 Lebanona ena uda lalonai idia noho boromakau ibounai,

be hegeregere lasi Lohiabada ena boubou gauna ta do idia lao.

Bona Lebanona ena uda lalonai idia noho audia ibounai,

be hegeregere lasi Lohiabada ena gabua boubou ena lahi do idia karaia.

17 Bese ibounai be gau ta lasi Lohiabada ena vairanai.

18 Daika be Dirava danu do ia hegeregere diba?

Edena bamona Dirava ena toana ita hedinaraia diba?

19 Dirava be kaivakuku bamona lasi,

badina kaivakuku be taunimanima edia imadia dekenai karaia gaudia.

Golo gaukaralaia taudia ese,

golo dekena amo unai kaivakuku idia koua,

bona siliva dekena amo,

kaivakuku ena gini gabuna idia karaia.

20 Ogogami tauna,

siliva o golo ia abia diba lasi tauna,

be do ia dika haraga lasi au ia abia hidi,

bona au gaukaralaia diba tauna ia davaria.

Ia ese kaivakuku,

do ia moru diba lasi gauna do ia karaia.

21 Umui be umui diba lasi, a?

Idaunegai umui idia hamaoroa lasi, a?

Tanobada ia matamaia dalana be umui diba lasi, a?

22 Tanobada be terona dekenai ia helai Dirava ese ia karaia.

Iena noho gabuna be tanobada ena ataiai,

bona guba unai kahana dekenai.

Henunai ia itadia taudia,

be dimairi hegeregerena ia dekenai.

Ia ese guba ia karaia neganai, ia veria ia lata lao,

uindo koua dabua bamona,

bona palai ruma bamona,

do ia noholaia gabuna.

23 Ia ese lohia goadadia ia hamorua noho,

bona ia ese anina lasi taudia idia ia halaoa.

24 Idia be hadoa gaudia matamatadia bamona.

Idia be tano lalonai edia ramudia idia tubu hamatamaia sibona,

vadaeni Lohiabada ese lai badana ia siaia,

bona idia kakoro haraga,

idia be rei kaukau bamona, lai ese idia ia hodaia lao ore.

25 Dirava Helaga danu,

be daika danu do ia hegeregere diba?

Daika be ia bamona?

26 Emui matana do umui negea,

guba do umui itaia.

Daika ese hisiu ia karaia?

Dirava ese edia orea be ta ta,

dekena amo idia ia mailaia hedinarai,

bona idia ta ta ibounai edia ladana ia atoa noho.

Iena siahu be bada herea dainai,

hisiu ta ia boio diba lasi.

27 Israela taudia e,

badina dahaka umui hereva maumau noho, umui gwau,

Lohiabada ese emui hisihisi,

bona emui laloa hekwarahi ia diba lasi?

Bona umui gwau,

“Ita dekenai idia kota karaia maoromaoro lasi,

be Lohiabada ese ia laloa lasi.”

28 Umui diba lasi, a?

Umui kamonai lasi, a?

Lohiabada be noho hanaihanai Diravana.

Ia be tanobada ena kahana ibounai ia karaia vadaeni Diravana.

Ia be manoka o hesiku diba lasi.

Iena diba be ta ese do ia davaria diba lasi.

29 Manoka bona hesiku taudia be Lohiabada ese ia hagoadaia noho,

bona goada lasi taudia edia goada ia habadaia noho.

30 Uhau taudia idia manoka diba,

bona tau matamatadia edia goada do ia ore,

do idia moru diba.

31 To Lohiabada dekenai idia abidadama henia taudia ese,

edia goada do idia hamatamataia lou.

Idia be hanina dekena amo, do idia roho daekau, ugava bamona.

Idia be do idia heau,

bona do idia manoka lasi.

Idia be do idia raka lao,

bona do idia moru lasi.