1 Lohiabada ia gwau,

“Kara maoromaoro ena dala umui raka noho taudia e,

Lohiabada umui tahua noho taudia e,

lau dekenai do umui kamonai!

Nadi badana,

ia dekena amo umui lau utua gauna do umui laloa.

Guri danu do umui laloa,

ia dekena amo umui lau geia gauna.

2 Emui tamana Aberahamo do umui laloa,

bona umui ia havaraia hahine,

Sara, danu do umui laloa.

Badina Aberahamo be natuna ta lasi neganai lau boiria,

bona lau hanamoa,

iena bese momo herea lau henia.

3 Badina lau Lohiabada ese Siona do lau hagoadaia.

Lau ese Ierusalema idia hadikaia gabudia,

be mai bogahisihisi danu do lau itaia.

Iena nadi kavakava tano,

be Eden bamona do lau halaoa.

Iena tano kaukau,

be Lohiabada ena uma gabuna hegeregerena do lau halaoa.

Moale bona laloa namo be Ierusalema lalonai do ia noho.

Lohiabada hanamoa ane danu,

Ierusalema taudia ese do idia abia.

4 “Egu bese taudia e,

lau dekenai do umui kamonai!

Badina be taravatu ta be lau dekena amo do ia lao.

Egu kota maoromaoro hadibaia hereva,

ese bese idauidau do ia hadiaria.

5 Lau ese karaharaga do lau mai,

bona idia do lau hamauria.

Egu hamauria kara ena kwalimu,

be kahirakahira do ia ginidae.

Lau ese bese idauidau do lau biagua.

Daudau idia noho tanodia ese lau totona idia naria noho.

Idia naria noho,

lau ese idia do lau hamauria totona.

6 Emui matadia do umui negea,

guba bona tanobada do umui itaia!

Badina guba be do ia boio ore,

kwalahu bamona,

bona tanobada do ia dika lao,

dabua gunana bamona.

Tanobada noho taudia be do idia mase,

lao idia mase bamona.

To egu hamauria kara be do ia noho ela bona hanaihanai,

bona egu kara maoromaoro,

be do ia noho nega ibounai, doko lasi.

7 “Kara maoromaoro umui diba taudia e,

egu taravatu be emui kudouna lalonai ia noho taudia e!

Egu hereva do umui kamonai!

Taunimanima ese umui idia gwau henia neganai,

bona umui dekenai idia hereva dika neganai,

do umui gari lasi.

8 Badina idia be do idia boio ore,

pitopito ese ia ania ore dabua hegeregerena,

bona gaigai maragidia ese,

mamoe huina idia ania ore bamona.

To egu kara maoromaoro,

be do ia noho ela bona hanaihanai,

bona egu hamauria kara be nega ibounai do ia noho,

doko diba lasi.”

9 Lohiabada e, do oi noga,

ai do oi durua!

Oiemu siahu dekena amo,

ai do oi hamauria.

Nega gunadia lalonai oi karaia hegeregerena,

mani do oi karaia lou.

Oi ese Rahaba,

unai davara dagedage gauna,

oi utua maragimaragi.

10 Oi ese danu davara oi hakaukaua,

bona davara ena huanai raka dalana oi karaia.

Unai dala dekena amo,

oi hamauridia noho taudia ese idia raka hanaia lao.

11 Bona oi Lohiabada ese oi hamauria vadaeni taudia,

be do idia giroa mai,

Siona dekenai do idia mai,

mai ane abia danu.

Moale hanaihanai be edia kwaradia edia latanai do ia noho.

Idia ese moale bona laloa namo do idia abia.

Edia lalohisihisi bona taitai,

be do idia boio momokani.

12 Lohiabada ia gwau,

“Lau Lohiabada inai,

lau ese umui lau hagoadaia noho inai.

Unai dainai oi be daika,

taunimanima, idia mase noho gaudia,

dekenai oi gari henia noho?

Oi be daika, taunimanima,

rei bamona ia kakoro lao,

bona ia mase ore gauna dekenai oi gari henia noho?

13 Oi be daika, Lohiabada,

oi ia karaia Dirava oi laloaboio vadaeni?

Ia ese guba ia karaia,

bona tanobada ena badina nadidia ia atoa.

Oi be daika,

dina ibounai oi gari noho,

dagedage taudia edia badu garina,

idia ese oi do idia hadikaia garina?

To dagedage tauna ena badu be edeseni?

14 Badina nega sisina lalonai,

hesiai mai guia danu taudia edia seini,

be do idia kokia ruhaia.

Idia be do idia mase lasi,

guri dekenai do idia diho lasi,

bona idia ese aniani hegeregerena momokani do idia abia noho.

15 “Badina lau be Lohiabada, oiemu Dirava.

Lau ese davara lau hamarerea noho,

vadaeni hurehure ese,

edia regena bada idia karaia noho.

Egu ladana be Siahu Ibounai Lohiabada.

16 Lau ese guba ibounai lau karaia,

bona tanobada ena badina nadidia lau atodia.

Bona Siona taudia lau hamaoroa vadaeni, lau gwau,

‘Umui be lauegu bese taudia.

Lau ese egu hadibaia hereva,

be umui dekenai lau henia vadaeni,

bona egu imana ena siahu dekena amo umui lau naria noho.’ ”

17 Ierusalema e, do oi noga!

Oi noga, bona do oi toreisi!

Lohiabada ena panisi ena kapusi,

Lohiabada ena badu ese oi dekenai ia henia gauna,

be oi inua vadaeni.

Oi inua murinai,

oiemu kwarana ia giroagiroa,

oi kekero, oi raka kerere,

18 to tau ta ese oi ia durua lasi.

Oiemu bese taudia ibounai edia huanai,

ta ese oiemu imana ia abia lasi.

19 Dika rua be oi dekenai idia vara, gaudia inai:

Oiemu tano be tuari ese ia hadikaia vadaeni,

bona oiemu bese taudia be idia hitolo noho.

To tau ta ese oi dekenai ia bogahisihisi henia lasi.

20 Oiemu natuna tau be hitolo dainai kahirakahira idia mase.

Idia be ariara ta ta ibounai edia kona dekenai,

idia hekure kava noho,

idia manoka dainai.

Idia be uda dia, labana tauna ena reke lalonai bamona.

Idia ese,

Dirava ena badu ena mamina idia abia momokani vadaeni.

21 Ierusalema dekenai umui hisihisi noho taudia e,

manoka dainai umui raka kerere noho,

to kekero dainai lasi taudia e,

22 Lohiabada emui Dirava ese umui totona ia hereva noho, ia gwau,

“Kamonai, lau ese egu kapusi,

egu badu lalonai umui dekenai lau henia gauna lau kokia noho.

Umui ia hekwakwanai henia kapusi,

be do umui inua lou lasi.

23 To lau ese inai kapusi,

be umui idia hisihisi henia taudia edia imana dekenai do lau atoa.

Badina idia ese umui idia hamaoroa, idia gwau,

‘Do umui hekure diho,

emui vairadia be tano dekenai do umui atodia,

bona ai ese emui latanai do ai raka hanaia.’

Bona unai neganai umui ese emui dorudia,

be tano hegeregerena umui halaoa,

ariara ena tano bamona umui halaoa,

idia ese emui latanai do idia raka hanaia totona.”