50
Lohiabada ena peroveta hereva Babulonia totona
1 Inai be Lohiabada ena hereva, lau peroveta tauna Ieremia dekenai ia henia, Babulonia tano, bona Babulonia taudia totona:
2 “Bese idauidau edia huanai do umui gwauraia,
do umui herevalaia hedinarai.
Pepe ta do umui abia isi,
bona do umui gwauraia hedinarai.
Do umui hunia lasi, do umui gwau,
‘Babulonia be idia halusia vadaeni!
Bel dirava be idia hahemaraia vadaeni.
Merodaka dirava be ia makohia vadaeni.
Babulonia ena kaivakuku be idia hahemaraia vadaeni,
bona iena dirava laulaudia be idia makohia vadaeni.’
3 “Badina be mirigini kahana dekena amo bese ta ia mai vadaeni, Babulonia do ia hadikaia totona. Unai bese ese Babulonia be anina lasi gabuna do ia halaoa, bona tau ta be unuseni do ia noho lasi. Taunimanima bona ubua gaudia ibounai be Babulonia dekena amo do idia heau lao daudau.”
4 Lohiabada ia gwau: “Unai dinadia lalonai bona unai nega dekenai, Israela bona Iuda taudia be do idia haboua tamona, bona mai tai danu, Lohiabada, edia Dirava do idia tahua. 5 Idia be Siona dekenai ia lao dalana totona do idia nanadaia, bona edia vairadia be Siona dekenai do idia henia, do idia gwau, ‘Umui mai, Lohiabada danu do ita gwauhamata hebou, noho hanaihanai gwauhamata taravatuna, tau ta ese do ia laloaboio lasi gauna.’
6 “Egu bese taudia be boio mamoedia, edia naria taudia ese idia hakaudia kerere, vadaeni ororo dekenai edia dala dekena amo idia raka siri vadaeni. Ororo badana dekena amo ororo maragina dekenai idia lao, bona edia magu ia noho gabuna idia laloaboio vadaeni. 7 Idia davaridia taudia ibounai ese idia aladia noho, idia anidia noho. Idia hadikaia gwauraia taudia idia gwau, ‘Ai be kerere lasi momokani, badina be idia ese Lohiabada dekenai idia kara dika vadaeni. Edia sene taudia ese Lohiabada idia abidadama henia, vadaeni idia danu ese ia bema idia abidadama henia be maoro.’
8 “Israela taudia e, Babulonia ena huanai dekena amo do umui heau lao, Babulonia taudia edia tano do umui rakatania! Umui ese rakatania taudia edia gunalaia taudia do umui lao! 9 Badina be lau ese bese badadia mirigini kahana dekena amo lau hatoreisia noho, bona Babulonia hadikaia totona lau hakaudia lao noho. Idia ese Babulonia do idia tuari henia, bona do idia halusia, badina edia peva taudia be labana diba momo taudia, edia diba idia pidia neganai, maka be nega ta idia reaia lasi.
10 “Babulonia tano ena kohu be do idia henaoa, bona edia ura gaudia ibounai do idia abia. Lau inai Lohiabada, lau hereva vadaeni.”
Babulonia ia moru
11 Lohiabada ia gwau: “Babulonia taudia e!
Umui ese egu bese edia kohu umui abia.
Umui be mai moale bada danu,
bona umui sibona umui abia isi.
Umui be lebulebu, boromakau hahine maragina,
rei gabuna dekenai bamona,
o ia boiboi noho hosi tau bamona.
12 To emui tano, emui sinana,
be do idia hahemaraia momokani.
Ia dekenai umui vara hahine, emui tano,
ena sivarai be do ia dika.
Kamonai, ia be bese dikana,
ladana maragi herea besena do lau halaoa,
bese ibounai edia huanai ia be do ia maragi.
Tano kaukau, mai ena ranu lasi gabuna do lau halaoa.
13 Lau Lohiabada egu badu dainai,
tau ta Babulonia dekenai do ia noho lasi,
anina lasi tano sibona do ia lao.
Babulonia do idia raka hanaia taudia be do idia hoa,
mai gari bada danu,
bona iena bero do idia itaia neganai,
do idia hevaseha henia, mai hereva dika danu.
14 “Peva umui veria noho taudia ibounai e,
Babulonia do umui tuari henia,
do umui gini hegegea.
Emui diba do umui pidia lao,
emui diba do idia ore,
to do umui laloa lasi,
badina Babulonia ese,
Lohiabada dekenai ia kara dika vadaeni.
15 Kahana ibounai dekena amo,
Babulonia hanua dekenai tuari umui uini dainai,
kwalimu ena boiboi bada do umui karaia.
Babulonia taudia ese,
edia tuari gaudia idia atoa diho vadaeni,
edia tuari idia hadokoa.
Badina edia gabu aukadia idia makohia vadaeni,
bona hanua ena magu be idia veria diho vadaeni.
Inai be lau Lohiabada egu davana henia karana.
Unai dainai ena dika davana do umui henia.
Ia ese ia karaia hegeregerena,
be ia dekenai do umui karaia.
16 Aniani hadoa kara Babulonia dekenai do umui hadokoa,
bona anina haboua kara danu do umui koua.
Tuari taudia edia dagedage garina dainai,
taunimanima ibounai ese edia bese korikori taudia,
dekenai do idia giroa lou,
bona ibounai be edia tano korikori,
dekenai do idia heau lao.”
Israela taudia ese edia tano dekenai do idia giroa lou
17 Lohiabada ia gwau, “Israela be laiona ese ia lulua gabu idauidau mamoe oreana ta. Guna Asuria ena king ese ia ania, bona harihari, inai nega dokona lalonai Nebukanesa, Babulonia ena king, ese edia turiana ia ania ore. 18 Unai dainai, lau, Siahu Ibounai Lohiabada, Israela ena Dirava ese king Nebukanesa bona iena tano edia dika davana do lau henia, Asuria ena king ena dika davana lau henia hegeregerena. 19 Israela taudia dekenai, edia tano do lau henidia lou. Idia ese Karamele Ororo bona Basana kahana dekenai idia vara aniani do idia ania. Bona Eparaima ororodia bona Gileada dekenai idia vara aniani dekenai edia bogadia do idia kunu. 20 Unai neganai, bona unai dinadia dekenai, kara dika do idia tahua Israela bona Iuda dekenai. To do idia davaria lasi, badina be do mauri noho taudia, do lau rakatania taudia, be edia dika do lau gwauatao. Lau inai Lohiabada lau hereva vadaeni.”
Dirava ese Babulonia ena dika davana ia henia
21 Lohiabada ia gwau:
“Merataimi tano do umui tuari henia,
bona Pekodo dekenai noho taudia danu.
Do umui aladia,bona do umui hadikadia ore momokani.
Lau ese umui lau oda henia karadia ibounai,
do umui karaia.
Lau Lohiabada lau hereva inai.
22 Tuari ena regena be tano dekenai do idia kamonai,
bona tano hadikaia kara badana ena regena danu.
23 Babulonia ese tanobada ena kahana ibounai ia botaia,
bona ia makohia maragimaragi,
hama badana ena kara bamona,
to harihari unai hama,
be ia makohia maragimaragi vadaeni.
Babulonia e, madi ia be dika vadaeni.
Ia be bese idauidau edia huanai,
gari bada bona hoa gauna ia lao vadaeni.
24 Babulonia e!
Oi ese lau Lohiabada oi tuari henia vadaeni.
Unai dainai tarapu lau atoa,
oi do lau abia totona,
vadaeni tarapu ese oi ia abia,
to oi diba lasi.
25 Lau Lohiabada ese egu tuari gaudia haboua ruma,
be lau kehoa vadaeni.
Egu badu dainai,
unai tuari gaudia lau abidia hegaegae,
badina be lau, Siahu Ibounai Lohiabada,
be mai egu gaukara ta,
Babulonia taudia edia tano dekenai do lau karaia.
26 “Kahana kahana ibounai dekena amo,
do umui tuari henia!
Iena uiti haboua rumadia do umui hamakohia, bona kehoa.
Umui abia kohu do umui haboua bada,
uiti haboua noho bamona.
Babulonia do umui hadikaia ore momokani.
Iena taudia ibounai do umui alaia ore,
ta do ia mauri noho lasi.
27 Iena tuari taudia ibounai do umui alaia mase.
Alaia mase gabuna dekenai do idia diho lao.
Madi, idia mase!
Badina be idia edia dina ia ginidae vadaeni.
Edia dika ena davana abia dina be ia ginidae vadaeni.”
28 Unai neganai heau mauri taudia be Babulonia tano dekena amo idia heau mai, Siona, Ierusalema dekenai, bona idia gwau, “Lohiabada, iseda Dirava ese Babulonia taudia edia dika davana ia henidia vadaeni, iena Dubu Helaga idia hadikaia dainai.”
29 “Peva taudia do umui boiria, peva idia veria diba taudia ibounai ese Babulonia do idia tuari henia totona. Emui palai ruma umui haginia neganai, Babulonia hanua do umui hagegea, tau ta do ia heau mauri lasi totona. Babulonia ena kara davana do umui henia, iena kara ibounai hegeregerena be ia dekena do umui karaia, badina be mai ena hekokoroku danu, Lohiabada, Israela ena Helaga Dirava ia dagedage henia. 30 Unai dainai, Babulonia ena eregabe taudia be hanua ena ariara dekenai do umui alaia mase, bona iena tuari taudia ibounai be do umui hadikaia ore unai dina dekenai. Lau inai Lohiabada lau hereva vadaeni.
31 “Babulonia e,
oi be hekokoroku dekenai oi honu,
unai dainai lau, Siahu Ibounai Lohiabada,
ese oi do lau tuari henia.
Badina be oiemu dina ia ginidae vadaeni,
oiemu dika davana do lau henia negana,
be ia ginidae vadaeni.
32 Hekokoroku besena e, oi be do oi hekwakwanai,
bona do oi moru,
bona tau ta ese oi do ia abia isi lou lasi.
Lau ese oiemu hanua ibounai,
be lahi dekena amo do lau gabudia,
bona oi idia hagegea gaudia ibounai,
do lau gabua ore.”
33 Siahu Ibounai Lohiabada be inai bamona ia hereva, ia gwau, “Israela bona Iuda taudia be bese ta ese ia hisihisi henidia noho. Idia abidia mauri taudia ese idia dogoatao auka, idia ura lasi do idia ruhaia. 34 To ta ese idia do ia hamauria, bona ia be mai goada danu. Iena ladana be Siahu Ibounai Lohiabada. Ia ese idia totona do ia hereva goada, bona ia ese tanobada dekenai maino do ia henia. To ia ese Babulonia taudia dekenai hekwarahi bada do ia henia.”
35 Lohiabada ese ma ia gwau:
“Babulonia tano dekenai mase do ia vara!
Babulonia taudia do idia mase.
Babulonia ena lohia taudia bona ena aonega taudia danu,
be do idia mase.
36 Ena peroveta koikoi taudia do idia mase,
idia be kavakava taudia momokani.
Ena tuari taudia be do idia mase,
idia be idia gari bada herea momokani.
37 Iena hosi bona kariota,
be do idia hadikaia ore.
Babulonia ese tuari totona ia hoidia taudia,
idau bese taudia, be do idia mase,
idia be manoka herea taudia momokani.
Babulonia kohu do umui hadikaia ore,
bona haida do umui abia lao, emui!
38 Babulonia tano ena ranu gabudia do umui hadikaia,
do idia kaukau lao!
Badina be ia be dirava idauidau edia laulaudia tano,
bona Babulonia taudia ese,
kaivakuku idia laloa momo noho,
mai gari danu.
39 “Unai dainai, uda boromadia bona uda sisiadia be Babulonia lalonai do idia noho hebou, bona kokokoko danu be unai gabu lalonai do idia noho. Tau ta ese unuseni do ia noho lasi, ia lao bona hanaihanai. 40 Sodoma bona Gomora bona edia hanua maragidia be lau Lohiabada ese lau hadikadia ore neganai, tau ta ese unuseni ia noho lou lasi. Inai bamona kara danu be Babulonia dekenai do ia vara. Lau inai Lohiabada lau hereva vadaeni.
41 “Itaia, bese ta taudia,
be mirigini kahana dekena amo idia mai noho.
Basileia badana ta, bona king taudia momo,
be tanobada kahana ibounai dekena amo,
idia toreisi noho.
42 Idia ese peva bona io idia abia mailaia noho.
Idia be mai edia dagedage,
mai edia bogahisihisi lasi.
Idia edia regena be davara ena hurehure ena regena bada bamona.
Idia be hosi idia guia noho,
bona edia tuari gaudia idia abia mailaia noho,
idia ese Babulonia do idia hadikaia totona.
43 Babulonia ena king ese,
idia mai noho sivarai ia kamonai,
bona iena imana be idia manoka lao.
Lalohisihisi bada ese,
king ia dogoatao auka,
ia hisihisi noho,
natuna ia havaraia noho hahine ena hisihisi bamona.
44 “Kamonai, laiona ta be Ioridane Sinavai ena isena ena uda gabuna dekena amo mamoe edia magu aukana do ia hadikaia totona ia mai noho hegeregerena, lau Lohiabada ese do lau toreisi, bona karaharaga Babulonia taudia ibounai do lau lulua lao, edia tano dekena amo. Unai neganai lau ese do lau abia hidi tauna ese edia tano do ia biagua. Badina daika be lau hegeregerena? Daika ese lau dekenai ia hepapahuahu diba? Edena tano ena king be egu vairana dekenai do ia gini diba? 45 Unai dainai, lau Lohiabada ese Babulonia hanua do lau hadikaia dalana ena palani do oi kamonai, bona Babulonia taudia edia tano hadikaia totona do lau karaia gaudia danu. Babulonia taudia edia natudia danu be tuari taudia ese do idia guia, do idia abia lao, bona taunimanima ibounai be do idia gari bada, mai hoa danu.
46 “Babulonia do ia moru neganai, regena bada do ia vara, bona tanobada be do ia heudeheude, bona Babulonia taudia edia tai regena be idau bese edia gabudia dekenai do idia kamonai.”