1 Dirava be do ia toreisi,

ia dekenai idia tuari henia gwauraia taudia do ia lulua ore.

Dirava dekenai idia dagedage taudia,

be iena vairana dekena amo do idia heau.

2 Lai ese kwalahu ia hodaia ore hegeregerena,

unai bamona danu Dirava ese idia do ia hodaia ore.

Kandolo be lahi ena vairanai ia veve ore bamona,

kara dika taudia be unai bamona do idia mase,

Dirava ena vairana dekenai,

3 to kara maoromaoro taudia be do idia moale,

Dirava ena vairana dekenai do idia moale bada.

Mai boiboi danu edia moale do idia hedinaraia.

4 Dirava dekenai ane do umui abia,

iena ladana be ane dekenai do umui hanamoa.

Ori dekenai ia guia noho Diravana,

be ane dekenai do umui hanamoa bada.

Iena ladana be Lohiabada,

bona iena vairana dekenai do umui moale.

5 Dirava, iena noho gabuna helagana dekenai ia noho Diravana,

ese ogogami taudia ia naria noho,

bona vabu taudia danu ia gimaia noho.

6 Dirava ese mai edia turana lasi taudia dekenai,

bese taudia ia henidia,

bona dibura ruma noho taudia,

be dibura dekena amo ia kokia ruhaia,

mauri namona idia dekenai ia henia noho.

To ia dekenai idia dagedage taudia,

be tano kaukau dekenai do idia noho.

7 Dirava e, oiemu bese taudia oi hakaudia neganai,

oi ese taunimanima noho lasi tano oi raka hanaia neganai,

8 tano be ia mareremarere,

bona guba ese medu bada ia siaia diho,

Sinai Ororo ena Dirava ia mai noho dainai,

Israela ena Dirava ia mai noho dainai.

9 Dirava e, momokani oi ese medu bada herea oi siaia diho,

bona oiemu tano kaukau oi hanamoa lou.

10 Vadaeni oiemu bese taudia be unai tano dekenai,

edia noho gabuna idia davaria,

bona oiemu hariharibada dainai,

ogogami taudia dekenai aniani bona gau oi henidia.

11 Lohiabada ese iena oda ia gwauraia,

vadaeni taunimanima momo ese,

unai hereva idia gwauraia hedinarai, idia gwau,

12 “King taudia bona edia tuari taudia idia heau lao noho!”

Ruma dekenai idia noho hahine ese,

edia bese tuari taudia ese idia abia kohu idia haria.

13 Pune manu laulau gaudia,

edia hanina be siliva dekena amo idia koua,

bona pune manu hanina edia huina be golo namo herea,

ia diaridiari gauna,

dekena amo idia koua.

To umui haida, badina dahaka tuari dinana dekenai,

mamoe edia magu murinai umui hunia?

14 Siahu Ibounai Dirava ese,

Salamona Ororo dekenai king taudia ia lulua lao ore neganai,

ia ese sinou unuseni ia siaia diho.

15 Basana Ororo be ororo badana momokani.

Basana Ororo be mai ena dorina momo.

16 Dorina momo ena ororo e,

badina dahaka mai mama danu,

Dirava ia ura do ia noholaia Ororo umui itaia noho?

Lohiabada be unuseni do ia noho ela bona hanaihanai.

17 Lohiabada be Sinai Ororo dekena amo,

iena helaga gabuna dekenai ia mai,

mai ena kariota goadadia momo herea danu.

18 Iena ororo badadia dekenai ia daekau lao,

bona ia ese ia abia mauri tuari taudia momo ia hakaudia daekau.

Dagedage taudia momo dekena amo harihari gaudia ia abia noho.

Unai ororo dekenai Lohiabada Dirava be do ia noho.

19 Lohiabada do ita hanamoa.

Ia ese dina ibounai iseda maduna metaudia ia huaia noho.

Ia ese ita ia hamauria noho.

20 Iseda Dirava be taunimanima ia hamauria Diravana.

Ia be Lohiabada, iseda Dirava,

bona ia ese mase dekena amo ita ia hamauria noho.

21 Dirava ese ia dekenai idia dagedage taudia,

edia kwaradia do ia hamakohia.

Edia kara dika daladia idia karaia noho taudia,

be Dirava ese edia kwaradia,

mai huidia bada danu do ia hamakohia momokani.

22 Lohiabada ia hereva vadaeni, ia gwau,

“Oi dekenai idia tuari henia taudia,

be Basana dekena amo do lau mailaidia lou.

Davara dobu gabudia dekena amo do lau mailaidia lou.

23 Vadaeni emui aedia be rara dekena amo do umui hadigua,

bona emui sisia ese edia maladia dekena amo,

umui idia tuari henia taudia edia rarana do idia ania.

24 Dirava e,

mai oiemu hairaina danu oi raka hanaia noho,

be ibounai ese oi idia itaia.

Egu Dirava, egu King, mai ena orea,

be gabu helagana dekenai idia raka vareai noho,

mai edia hairaina danu.

25 Ane idia abia taudia be orea ena vairana dekenai idia raka noho.

Idia edia murinai be miusiki idia gadaralaia noho taudia.

Bona idia edia huanai,

be kekeni ese tareko idia botaia noho.

26 Iena bese taudia edia hebou badana lalonai,

Dirava do ita hanamoa.

Israela besena taudia ibounai e,

Lohiabada do umui hanamoa.

27 Beniamina iduhu,

iduhu maragina momokani,

ese idia ia gunalaia.

Idia edia murinai be Iuda iduhu lohia taudia,

mai edia orea taudia momo herea.

Idia edia murinai be Sebuluno bona Napatali edia lohia taudia.

28 Dirava e, oiemu siahu do oi hedinaraia.

Oiemu goada be ai dekenai do oi hedinaraia,

gunaguna ai durua totona oi hedinaraia goada bamona.

29 Vadaeni oiemu Dubu Helaga Ierusalema dekenai dainai,

king taudia ese harihari gaudia oi dekenai do idia mailaia.

30 Aigupito, unai siriho dekenai ia noho uda boroma,

be do oi gwau henia.

Bese idauidau, unai boromakau tau oreadia,

mai edia boromakau natudia danu do oi gwau henia,

ela bona oi dekenai do idia tomadiho henia,

bona edia siliva be oi dekenai do idia henia.

Tuari dekenai idia moale bada bese taudia,

be do oi lulua lao ore.

31 King taudia ese oi dekenai harihari gaudia do idia henia.

Aigupito dekena amo auri laboralabora do idia mailaia.

Etiopia taudia ese imadia do idia abia isi,

bona Dirava dekenai do idia guriguri.

32 Tanobada basileia ibounai e,

Dirava hanamoa totona ane do umui abia.

Lohiabada dekenai hanamoa ane do umui abia.

33 Badina ia be guba dekenai ia guia loaloa noho,

gunaguna momokani ia noho guba be unai.

Do umui kamonai,

Dirava ena gadona be guba dekena amo ia boiboi noho.

34 Taunimanima ibounai e,

Dirava ena King siahuna do umui gwauraia.

Ia be Israela ena King,

mai ena siahu danu.

Iena siahu danu be guba edia lalonai.

35 Dirava be iena helaga gabuna lalonai.

Ita ese ia dekenai ita gari bona matauraia be namo.

Ia be Israela ena Dirava.

Ia ese siahu bona goada,

iena bese taudia dekenai ia henia noho.

Dirava do ita hanamoa!