1 Lohiabada do ita tanikiu henia,

bona iena ladana badana do ita gwauraia hedinarai.

Tanobada ena bese idauidau ibounai dekenai,

Lohiabada ena kara badadia do ita hamaoroa.

2 Ane do ita abia,

bona Lohiabada ena ladana do ita abia isi.

Iena kara badadia bona namodia,

ia ese ia karaia gaudia do ita gwauraia hedinarai.

3 Ita be Lohiabada ena, unai dainai do ita moale bada noho.

Lohiabada idia tahua taudia edia lalona be do idia moale.

4 Durua totona Lohiabada dekenai ita lao be namo,

bona Lohiabada kahirakahira do ita noho nega ibounai be namo.

5-6 Umui be Aberahamo, Lohiabada ena hesiai tauna ena tubuna.

Umui be Iakobo, Lohiabada ese ia abia hidi tauna,

ena tubuna taudia danu.

Dirava ese ia karaia kara badadia do umui laloa,

bona tau dikadia edia kerere davana be Dirava ese ia henia,

be unai danu do umui laloa.

7 Lohiabada be iseda Dirava.

Iena taravatu be inai tanobada taudia ibounai totona,

ia ese ia karadia.

8 Lohiabada ese ia karaia gwauhamata taravatuna,

be hanaihanai do ia badinaia.

Iena gwauhamata danu be do ia laloa noho uru ibounai 1000.

9 Aberahamo danu Lohiabada ese ia karaia gwauhamata taravatuna,

be ia ese do ia badinaia,

Isako dekenai ia karaia gwauhamata danu do ia hamomokania.

10 Lohiabada ese Iakobo danu gwauhamata taravatuna ia karaia.

Inai be ia noho hanaihanai gauna.

Ia ese inai gwauhamata taravatuna Israela ena bese danu ia karaia,

bona inai be do ia doko diba lasi gauna.

11 Lohiabada ese Iakobo dekenai ia hereva inai bamona:

“Lau ese Kanana tano oi dekenai do lau henia,

bona inai tano be oi bona oiemu tubuna ese do umui biagua.”

12 Dirava ena bese taudia be momo lasi,

bona idia be idau taudia bamona Kanana dekenai idia noho.

13 Tano dekenai idia noho namonamo lasi,

to tano kahana dekena amo idia loaloa, ela bona tano kahana dekenai.

King ta ena tano dekenai nega sisina idia noho,

vadaeni ma idia toreisi,

king ma ta ena tano dekenai idia lao.

14 To Lohiabada ese Israela besena ia naria,

dagedage bona dika momokani dekena amo ia ese ia gimadia.

Bona Lohiabada ese king haida ia sisiba henidia,

Israela taudia do idia hadikaia lasi totona.

15 Lohiabada ia gwau,

“Lau ese lau abia hidi bese taudia,

be do umui hisihisi henidia lasi.

Lauegu peroveta taudia do umui hadikaia lasi.”

16 Lohiabada ese hitolo bada edia tano dekenai ia havaraia.

Edia aniani ibounai idia dekena amo ia kokia.

17 To Lohiabada ese Iosepa ia siaia guna,

Aigupito dekenai ia noho guna.

Idia hoia, hesiai tauna mai guia danu idia halaoa.

18 Iena aena be seini dekena amo idia kwatua,

unai be mai hisihisi,

bona iena aiona dekenai auri dekena amo idia guia.

19 Unai bamona ia noho,

ela bona ia ese ia gwauraia guna hereva be idia vara.

Lohiabada ena hereva ese,

ia hedinaraia Iosepa ena hereva be maoro.

20 Unai neganai Aigupito ena king ese,

dibura ruma dekena amo Iosepa ia ruhaia.

Unai idau bese ena king ese,

Iosepa ena hisihisi dibura ruma lalonai ia haorea.

21 King ese Iosepa dekenai gaukara badana ia henia,

ia ese iena gavamani ena gunalaia tauna ia halaoa.

Vadaeni Iosepa be Aigupito ena gavana badana ia lao.

22 Ia ese king ena opesa taudia ia biagua,

bona ia ese,

king idia sisiba henia taudia ia hadibaia dahaka do idia gwau.

23 Gabeai Iakobo be Aigupito dekenai ia lao,

Aigupito dekenai ia noho.

24 Lohiabada ese,

natuna bona tubuna momo herea Iakobo dekenai ia henia,

bona idia edia goada ese,

idia dagedage henidia taudia edia goada ia hereaia.

25 Vadaeni Lohiabada ese Aigupito taudia edia laloa ia haidaua.

Idia ese Israela taudia idia badu henia,

bona idia ese edia hesiai taudia, Israela taudia,

idia koia noho.

26 Lohiabada ese Mose ia siaia,

Arona danu, ia abia hidi tauna, be Lohiabada ese ia siaia.

27 Idia ese Dirava ena kara badadia idia karaia,

Aigupito dekenai hoa karadia idia karaia.

28 Dirava ese Aigupito dekenai dibura ia siaia,

tano ibounai ia dibura.

To Aigupito taudia ese iena oda hereva idia kamonai henia lasi.

29 Aigupito taudia edia ranu gabudia,

be rara dekenai Dirava ese ia halaoa,

bona edia gwarume ibounai idia mase.

30 Edia tano be Lohiabada ese paroparo dekena amo ia hahonua.

Edia king ena ruma dekenai danu paroparo idia noho.

31 Dirava ese ia oda,

vadaeni lao momo idia mai,

bona nemo momo danu ese edia tano ibounai idia hahonua.

32 Dirava ese medu momokani ia siaia diho lasi,

to aisi nadi bamona ia siaia diho,

bona kevaru danu Aigupito tano dekenai ia havaraia.

33 Aigupito taudia edia vain audia,

bona edia fig audia Dirava ese ia hadikaia ore,

bona au ibounai danu ia hamakohia ore.

34 Lohiabada ia hereva sibona,

vadaeni kwadi momo herea idia hedinarai.

Idia be momo herea, duahia diba lasi.

35 Kwadi ese tano ena ava bona au edia raudia idia ania ore.

Uiti bona koni ibounai danu idia ania ore.

36 Bona Dirava ese Aigupito edia famili ibounai,

edia vara guna natuna tau ia alaia mase.

37 Unai neganai Dirava ese Israela taudia ibounai,

be Aigupito dekena amo ia hakaua.

Idia ese siliva bona golo idia huaia mai,

bona idia ibounai be mai edia mauri namo,

bona mai edia goada danu.

38 Aigupito taudia be Israela taudia dainai idia gari.

Vadaeni Israela taudia idia toreisi, idia raka siri neganai,

Aigupito taudia idia moale.

39 Dirava ese iena bese taudia,

be ori dekena amo ia koudia,

bona hanuaboi lalonai ia ese lahi badana ia atoa,

diari do idia abia totona.

40 Idia be aniani totona idia noinoi,

vadaeni Dirava ese kibi manudia ia siaia diho,

bona aniani momo be guba dekena amo ia siaia, ia henidia.

41 Nadi badana be Dirava ese ia kehoa,

bona ranu be ia heau lao.

Tano kaukau dekenai ia heau, sinavai bamona.

42 Badina be Dirava ese iena gwauhamata helagana ia laloa noho,

iena hesiai tauna Aberahamo dekenai ia henia gauna.

43 Unai bamona be Dirava ese,

iena abia hidi bese taudia ia hakaudia mai.

Idia ese mai ane bona mai moale bada danu idia raka lao.

44 Bese idauidau edia tano be Dirava ese ia henidia,

vadaeni idia ese unai bese taudia edia tano ena anina,

be idia abia.

45 Lohiabada ese unai bamona ia karaia,

Israela taudia ese iena oda hereva ibounai,

bona iena taravatu ibounai,

do idia kamonai henia totona.

Lohiabada do ita hanamoa bada!