1 “Lohiabada do umui hanamoa, badina ia be namo.

Iena bogahisihisi bona lalokau be hanaihanai do idia noho.”

2 Lohiabada ese umui ia hamauria taudia ibounai e,

unai bamona hanamoa hereva do umui gwauraia lou, gwauraia lou,

badina umui dekenai idia dagedage taudia dekena amo,

Lohiabada ese umui ia hamauria vadaeni.

3 Lohiabada ese idau bese taudia edia tano dekena amo,

umui ia mailaia vadaeni,

laurabada dekena amo bona lahara dekena amo,

mirigini dekena amo, bona diho kahana dekena amo.

4 Haida be taunimanima idia noho lasi tano dekenai idia loaloa,

bona hanua ta idia davaria lasi do idia noholaia totona.

5 Idia be mai hitolo bona mai ranu mase danu,

bona idia laloa idia be dika vadaeni.

6 To edia hisihisi lalonai Lohiabada dekenai idia noinoi,

bona edia hisihisi dekena amo ia ese ia hamauridia.

7 Lohiabada ese dala maoromaoro dekena amo idia ia hakaua,

vadaeni idia noholaia diba hanua ta dekenai ia hakaudia.

8 Idia ese Lohiabada do idia tanikiu henia be namo,

iena lalokau badana dainai.

badina be ia ese kara namodia momokani idia dekenai ia karaia.

9 Ranu mase taudia be Lohiabada ese ranu ia henidia noho,

bona hitolo taudia,

be Lohiabada ese aniani ia henidia noho, idia bogakunu.

10 Haida be diari lasi lalonai idia noho,

dibura gabuna dekenai.

Idia be dibura noho taudia,

mai edia hisihisi, seini dekenai idia guidia dainai.

11 Unai bamona idia noho,

badina be idia ese Siahu Ibounai Dirava ena hereva,

be idia kamonai henia lasi,

bona iena hadibaia hereva idia ura lasi idia badinaia.

12 Idia be gaukara auka herea momokani dainai idia manoka vadaeni,

bona edia goada ia ore dainai tano dekenai idia moru,

to tau ta ese ia durudia lasi.

13 Idia edia hisihisi lalonai,

idia ese Lohiabada dekenai idia boiboi,

bona ia ese edia hisihisi dekena amo idia ia hamauria.

14 Lohiabada ese edia diari lasi gabuna,

bona edia dibura gabuna dekena amo ia abidia mai.

Ia ese edia seini ia hamakohia maragimaragi.

15 Vadaeni idia ese Lohiabada do idia hanamoa be namo,

iena lalokau badana dainai.

Iena hoa karadia bona kara namodia, idia totona ia karaia dainai,

Lohiabada do idia tanikiu henia be namo.

16 Auri labora dekena amo idia karaia iduara,

be Lohiabada ese ia hamakohia.

Ia ese dibura ruma edia magu auridia ia makohia maragimaragi.

17 Unai taudia haida ese,

sibodia edia kara dika dainai gorere idia abia.

Idia ese kerere idia karaia dainai hisihisi idia davaria.

18 Idia ese aniani idia ura lasi,

unai dainai kahirakahira idia mase.

19 To idia edia hisihisi lalonai,

idia ese Lohiabada dekenai idia boiboi,

bona ia ese edia hisihisi dekena amo idia ia hamauria.

20 Lohiabada ese oda ia gwauraia,

vadaeni edia gorere idia ore.

Ia ese mase ena guri dekena amo idia ia hamauria.

21 Idia ese Lohiabada do idia tanikiu henia be namo,

iena lalokau badana dainai.

Iena kara badadia bona namodia,

idia dekenai ia karaia gaudia dainai,

Lohiabada do idia hanamoa be namo.

22 Boubou gaudia dekena amo,

Lohiabada do idia tanikiu henia be namo.

Mai ane bona mai moale danu,

taunimanima dekenai Lohiabada ena kara namodia do idia gwauraia, be namo.

23 Idia haida be lagatoi dekenai,

davara badana idia heau hanaia.

Idia edia lagatoi dekena amo,

hoihoi gaukara idia karaia moni davana.

24 Idia ese Lohiabada ena siahu karadia idia itaia.

Davara badana dekenai,

Lohiabada ese ia karaia gau badadia idia itaia momokani.

25 Badina be Lohiabada ese ia hereva,

vadaeni lai badana ia toreisi,

davara ena hurehure be bada herea idia lao.

26 Hurehure be guba dekenai idia daekau,

bona dobu gabudia dekenai idia diho,

bona kuru taudia idia hekwarahi bada dainai edia haheauka ia ore.

27 Idia edia matana idia giroagiroa,

bona idia raka mai hekwarahi danu, kekero taudia bamona.

Edia gari dainai edia laloa be ia ore.

28 Vadaeni edia hekwarahi lalonai Lohiabada dekenai idia taitai,

bona ia ese edia hisihisi dekena amo idia ia hamauria.

29 Lohiabada ese lai ia gwauatao,

vadaeni lai ia doko,

bona davara ena hurehure idia diho.

30 Unai neganai kuru taudia idia moale, laga-ani idia davaria dainai,

bona Lohiabada ese edia ura gabuna,

hurehure lasi gabuna dekenai ia hakaudia vareai.

31 Lohiabada dekenai edia tanikiu idia henia be namo,

ia ese iena lalokau bona bogahisihisi bona hoa karadia,

taunimanima dekenai ia hedinaraia dainai.

32 Namona be edia guriguri hebou dekenai ia do idia hanamoa bada,

bona hanua tau badadia edia hebou dekenai danu,

idia ese Lohiabada do idia tanikiu henia be namo.

33 Lohiabada ese sinavai be tano kaukau dekenai ia halaoa,

bona ranu lohilohi gabudia be ia ese ia koua,

ranu lasi gabudia idia lao.

34 Lohiabada ese tano mai ena anina,

be tano anina lasi gabuna dekenai ia halaoa.

Unai bamona ia karaia,

be unai gabu taudia edia kara dika dainai.

35 Bona tano kaukau gabuna, be gohu namona Lohiabada ese ia halaoa.

Tano kaukau be ranu lohilohi gabuna dekenai danu ia halaoa.

36 Lohiabada ese unai gabudia dekenai,

hitolo taudia ia atoa, idia noholaia,

vadaeni idia ese hanua ta idia haginia, unuseni idia noho.

37 Unai taudia ese uma idia karaia,

bona vain umadia danu idia karaia,

vadaeni tano ena anina bada idia davaria.

38 Lohiabada ese ia hanamodia dainai,

unai taudia be bese badana momokani idia lao,

bona edia boromakau bona mamoe idia momo herea lao danu.

39 Gabeai dagedage, o hekwarahi, o hisihisi idia dekenai ia vara,

vadaeni idia momo idia mase ore, orea maragina idia lao.

40 Unai neganai Lohiabada ese,

lohia taudia edia hekokoruku ia hadokoa momokani.

Unai lohia taudia ia siaidia lao,

taunimanima noho lasi tano dekenai do idia loaloa.

41 To ogogami taudia edia hisihisi dekena amo,

Lohiabada ese ia durudia,

bona idia dekenai natuna bona tubuna momo ia henia,

mamoe edia orea badana bamona.

42 Kara maoromaoro taudia ese inai kara idia itaia,

vadaeni idia moale.

to dika taudia be idia hereva lasi, edia uduna idia koua sibona.

43 Daika be mai ena aonega?

Ia ese inai karadia do ia laloa.

Namona be umui ese Lohiabada ena lalokau badana,

noho hanaihanai lalokauna,

be taunimanima dekenai do umui gwauraia hedinarai.