1 Lohiabada do umui hanamoa!

Ane dekenai Dirava do ita hanamoa be namo.

Lohiabada do ita hanamoa be kara namona bona kara maorona.

2 Lohiabada ese Ierusalema ia haginia lou noho.

Israela taudia be guna mai guia danu idia noho,

idau bese taudia edia gabu dekenai,

to Lohiabada ese hari ia mailaidia lou noho.

3 Edia kudoudia idia makohia taudia,

be Lohiabada ese ia hagoadaia lou noho,

bona edia bero ia kumia noho.

4 Lohiabada ese hisiu edia namba ia gwauraia vadaeni,

bona ia ese idia ibounai edia ladana ia atoa.

5 Iseda Lohiabada be bada, bona mai siahu danu.

Iena aonega be mai ena hetoana lasi.

6 Lohiabada ese manau taudia ia abia isi noho,

to kara dika taudia be tano dekenai ia negedia diho noho.

7 Mai ane danu Lohiabada do umui tanikiu henia.

Gita dekena amo,

iseda Dirava hanamoa totona miusiki do umui gadaralaia.

8 Guba dekenai ori momo ia atodia noho,

bona tano hanamoa totona medu ia havaraia noho.

Ororo dekenai rei ia hatubua noho.

9 Boroma idauidau dekenai aniani ia henia noho,

bona galo manudia idia boiboi neganai,

aniani idia dekenai ia siaia noho.

10 Hosi ena goada be Dirava ese ia moalelaia lasi,

bona tau ena aena danu ia moalelaia lasi.

11 To Lohiabada ese,

ia dekenai idia gari henia taudia ia moalelaia noho.

Iena noho hanaihanai lalokauna dainai,

ia idia abidadama henia taudia,

be Lohiabada ese ia moalelaia noho.

12 Ierusalema taudia e,

Lohiabada do umui hanamoa bada.

Siona taudia e,

emui Dirava do umui hanamoa.

13 Ia ese Ierusalema ena magu iduara auridia ia hagoadaia noho,

bona ia ese Ierusalema idia noho taudia ia hanamoa noho.

14 Emui tano hetoadia dekenai Dirava ese maino ia karaia noho,

bona uiti namo herea emui uma dekenai ia hatubua noho.

Unai dekena amo umui boga kunu noho.

15 Tanobada dekenai oda ia siaia lao,

bona iena hereva gauna be idia karaia haraga noho.

16 Ia ese sinou ia siaia,

tano ia koua noho, bilankesi bamona,

bona ia ese hanuaboi ranu ia hakerua, aisi bamona ia lao.

Bona unai aisi ia negea kava,

tano ena kahu bamona.

17 Medu, aisi bamona gauna,

be tano dekenai ia siaia diho noho, aisi nadi bamona,

bona iena lai ena keru dekenai daika ia gini diba?

18 Ia ese iena oda hereva ia siaia,

vadaeni aisi ia veve noho.

Ia ese lai ia havaraia,

vadaeni ranu ia heau diho noho.

19 Iena hereva be Iakobo dekenai ia hedinaraia vadaeni.

Iena taravatu bona iena oda,

be Israela dekenai ia henia vadaeni.

20 Bese haida dekenai unai bamona ia karaia lasi.

Unai idau bese taudia ese iena taravatu idia diba lasi.

Lohiabada do umui hanamoa!