5
Naaman, lepra tauna
1 Naaman, Suria pavapavana ena tuari oreana lohiana, na biaguna ena tau badana ta, bona e lalo namo heniava; badina be iena amo Iehova ese kwalimu na Suria e henia. Ia na goada dikadika bona boga-auka tauna; to ia na lepra tauna. 2 Edia tuari ta ai, Suria taudia ese kekeni ta e abia mauri, Israel tanona ai; bena una kekeni ese Naaman adavana isiaina e lao heniva. 3 Bena ia ese biaguna hahinena e hereva henia, eto, Una egu lohia na bema Samaria peroveta tauna dekenai, ia ese ena lepra bema hanamoa. 4 Taunabunai, Naaman e raka vareai, ena lohia e hamaoroa, eto, Israel kekenina na unu ini e gwau tomamu. 5 Bena Suria pavapavana eto, Vada aola, revareva ta baina siaia, Israel pavapavana ena.
Taunabunai, ia na ela, silver talent gwauta* Talentgwauta = 500 kilograms sisivana. Sekele daha tauratoi = 98 kilograms sisivana. bona gold sekele daha tauratoi bona dabua ḡoeva-daedia gwauta e abi kau, e laohai. 6 Israel pavapavana dekena e laohaia revarevana ai ini e torea toma:
Ina revareva ba davaria negana ai ba diba,
lau ese egu hesiai tauna Naaman vada na siaia vasi,
ena lepra ba hanamoa totona.
7 Israel pavapavana ese revareva e duahia, bena ena dabua e dare, eto, Lau na Dirava, bona taunimanima baina hamasedia bona baina hamauridia, a? Una dainai ina tau ese lepra tauna ta ihanamona herevana egu ai e siaia mai a? Mani a haeroa, a itaia, iheai-henigu dalana e tahuamu. 8 Elisaia, Dirava ena tau, e kamonai Israel pavapavana ese ena dabua vada e dare; bena ia ese hereva e siaia lao, hanua pavapavana enai, eto, Dahaka dainai emu dabua vada o dare? Ia na dekegu ainema, baine diba, peroveta tauna ta na Israel ai e nohomu.
9 Taunabunai, Naaman na mai hosina bona mai kariotana ida ela, Elisaia ena ruma iduarana vairanai e gini. 10 Bena Elisaia ese gwaukau tauna ta ia dekena e siaia lao, eto, Aola, Ioridane sinavaina ai ba digu nega hahitu, bena taumu baine namo lou, bona vada ba ḡoeva. 11 A Naaman na e badu, e raka oho, eto, Lau banava nato ia korikorina ese baine mai henigu, bena baine gini, Iehova, ena Dirava, ladana baine hahanea bona hisi gabuna baine daroa, unu amo lepragu baine hanamoa nato. 12 Damasko sinavaina Abana bona Farapara, ese Israel sinavaidia iboudiai na asie hereadiamu a? Idia lalodiai basinama digu basinama ḡoeva diba a? Bena e raka muri, mai lalo-ḡaraḡarana ida e raka oho.
13 A iena hesiai taudia na e raka kahira, e hereva henia, eto, Tamagu e, peroveta tauna ese kara aukana ta bema haḡanilaimu, boma karaia ani? Matogana, ia e gwaumu “Ba digu bena ba ḡoeva” be edeheto? 14 Taunabunai, ia na e diho ela, nega hitu Ioridane sinavaina ai e heuru utu, Dirava ena tau ena hereva heḡereḡerena. Bena tauna vada e namo lou, mero karukaruna heḡereḡerena ai ela; bena vada e ḡoeva.
15 Bena e lou lao, Dirava ena tau dekenai, ia bona ena orea idoinai. E kau, bena vairanai e gini, eto, Harihari lau dibagu tanobada idoinai latanai na asi Dirava ta, a Israel ai mo; taunabunai emu hesiai tauna ena amo herahia ḡauna mani avabia. 16 A Elisaia eto, Iehova, isiaina na lao henimu Diravana, e maurimu heḡereḡerena, ḡau ta basina abia. Bena e ha-uraia, baine abia, to se ura. 17 Bena Naaman eto, Bema lasi be lau na noimumu, emu hesiai tauna na tano taina ba henigu, doniki rua edia huahua heḡeregeredia; badina be harihari bainela emu hesiai tauna na ḡole-oho boubouna ḡauna eiava boubou ḡauna ta basina hahelaḡaia dirava ta ena, a Iehova mo ena. 18 Ina kara tamona ai Iehova ese emu hesiai tauna bema bogagu hisi: biagugu na toma-diho totona Rimon†“Rimon” na Suria taudia edia dirava ta ladana. ena dubu ai baine dae kau, bona lau imagu ai baine hetao kau, bena una negana ai lau ese Rirnon ena dubu ai baina igo diho, Iehova ese una kara ai baine bogagu hisi. 19 Elisaia ese e hamaoroa, eto, Mai mainomu ida aola.
A Naaman na do se raka daudau ai, 20 Gehasi, Dirava ena tau Elisaia ena hesiai tauna, eto, Ia, lau biagugu ese Naaman tau Suria, vada e bogaia hisi, e mailai gaudia na ia imana amo se abidia. Iehova e maurimu heḡereḡerena, lau na ia murina amo baina heau, ḡau ta iena amo baina abia. 21 Taunabunai, Gehasi na Naaman murina amo ela. Naaman ese tau ta e itaia, murina amo e maimu, bena ena kariota amo e diho, ia ihedavari-henina totona; eto, Edeheto, namo eiava? 22 Ia eto, Namo. Biagugu ese vada e siaigu, e tomu, Peroveta oreana tau-eregabedia rarua na ina harihari Efraim ororodia amo vada ema; bena e noimumu, silver talent ta‡ Silver talentta = 50 kilograms sisivana. bona dabua herea-daedia rua ba henidia. 23 Naaman eto, Mani emu kara talent rua bavabi. Bena ia ese e ha-uraia, bena silver talent rua na puse rua ai e uda, bona dabua herea-daedia rua danu; bena puse na ena hesiai taudia rarua e hahualaidia; bena raruosi ese e hua, Gehasi vairanai. 24 Ororo ai e kau, bena ia ese idia imadia amo e abidia, ruma ai e atodia; e siaidia, bena e raka oho.
25 Ia na e raka vareai, biaguna vairanai e gini. Bena Elisaia ese e nanadaia, eto, Gehasi e, ede ola? Ia eto, Emu hesiai tauna na gabu ta asinala. 26 A ia ese e gwau henia, eto, Lauma ai oi ida asita lao hebou, una tau na ena kariota amo e hegiro oi ihedavari-henimu totona negana ai a? Una na moni bona dabua, eiava olive bona vine imeadia, eiava mamoe bona boromakau, eiava hesiai taudia bona hahinedia, iabidia negana buna a? 27 Taunabunai, Naaman ena lepra na oiemu ai baine kau, bona oi garamu ediai danu, ela bona hanaihanai. Taunabunai, ia na ia vairana amo e raka lasi mai leprana; kopina e kuroka-kuroka danu, snow na heto.