7
Isaia ena gwau-kau herevana Ahasa enai
1 Ahasa Iotam, Usia tubuna, Iuda pavapavana, ena nega ai, Resini, Suria pavapavana, bona Peka Remalia, Israel pavapavana, na Ierusalem e dae lao, bae tuari henia totona, a asie hadarerea diba. 2 Bena David garana e kamonai Suria na Efraim ida vada e henega hebou negana ai, ia bona ena orea taudia kudoudia e hetaha, uda audia na lai ai e helado-heladomu na heto.
3 Bena Iehova ese Isaia e hamaoroa, eto, Ahasa ihedavari-henina totona a raka lasi, oi bona natumu Seara-iasubu, atai gohuna dadairana dokona ai, Dabua-huri Tauna ena tano lao dalana ai, Dabua-huri Tauna ena tano lao dalana ai, ia ida ba hedavari. 4 Ba hamaoroa, baoto, Nahuamu ba tohoa, lalomu basine hekwarahi; basio gari bona basio kudou-hetaha ini lahi tutututudia ruaosi, e ara oremu ḡaudia, hari Resini bona Suria bona Remalia natuna, edia badu-ḡaraḡara dainai. 5 Badina be Suria, Efraim bona Remalia natuna ida, oi ihadikamu dalana vada e laloa hata, e tomu 6 “Iuda ihadikana totona baita dae lao, baita hagaria, bena baita hadarerea bona baita abia iseda, bona Tabele natuna na pavapava ai baita halaoa ia bogaraginai”. 7 Una dainai Ḡaubada Iehova na ini e gwau tomamu:
Una na basine gini,
bona anina basine vara;
8 badina be Suria kwarana na Damasko,
bona Damasko kwarana na Resini.
(Laḡani tauratoi-ahui ima bae lao henia lalonai Efraim na baine makohirohoroho, bona basie gwauraia bese ta.)
9 Bona Efraim kwarana na Samaria,
bona Samaria kwarana na Remalia natuna.
Bema basio kamonai,
momokani umui na basio gini tutuka-tutuka.
Emanuel
10 Iehova ese Ahasa ma e hereva henia, eto, 11 Iehova, emu Dirava, enai toa ta ba gwauraia; baine dobu, Mase Gabuna na heto, eiava baine dae, guba na heto. 12 A Ahasa eto, Ḡau ta basina gwauraia bona Iehova basina dibaḡania. 13 Bena Isaia eto, Benaini, David garana e, a kamonai! Taunimanima o hahekwarahidiamu na ḡau pipikina dainai egu Dirava danu o hahekwarahiamu a? 14 Taunabunai Ḡaubada sibona ese toa ta baine henimu. 15 A itaia, haneulato ta baine rogorogo, natuna baine havaraia, mero ta; bena ladana baine hatoa Emanuel*“Emanuel” anina be “Dirava na ita dekedekedai”.. Dika idadaraina bona namo iabi-hidina baine diba negana ai, ia ese rata-hetarina bona bada-ranuna baine ani. 16 Badina be una mero na dika idadaraina bona namo iabi-hidinado basine diba hekada hanai, hari o gari henidiamu pavapavadia raruosi edia tano na bae vahu. 17 Iehova ese nega ta baine havaraia, oi bona emu bese audia bona tamamu ena iduhu latadiai; nega unuhetomana ta se vara, Efraim ese Iuda e rakatania negana amo ema bona hari. Asuria pavapavana bunai.
18 Una dina ai Iehova ese Aigupto sinavaidia badidia laodia bona Asuria tanona labolabona loḡora baine hioga henidia. 19 Bena iboudiai bae roho mai, koura dobudobudia ai bona haga nadidia kohuadia ai bona au ḡiniḡini ona rei gabudia iboudiai lalodiai bae noho.
20 Una dina ai Ḡaubada ese vasiga ta Sinavai Badana unukahana amo baine vatua, Asuria pavapavana bunai; bena kwara bona ae baine naudia, bona auki-huina danu.
21 Una dina ai tau ta ese boromakau hahinena matamatana ta bona mamoe hahinedia rua baine ubudia; 22 bena rata momo herea bae heni dainai, ia ese rata-hetarina baine ania; badina be tano ai do bae noho taudia iboudiai ese rata-hetarina bona bada-ranuna bae ani.
23 Gunaguna vine audia daha-ta, davadia silver sekeledia daha-ta† Silversekeledia daha-ta = silvermetauna 31 Ibs sisivana. ḡaudia, e varava gabudia iboudiai na una dina ai ava ḡiniḡini bona au ḡiniḡini ese bae habubunidia. 24 Taunimanima na mai pevadia bona mai dibadia ida unu gabu baela; badina be tano idoinai ava ḡiniḡini bona au ḡiniḡini ese bae habubunia. 25 Ororo danu, gunaguna isiva amo avadia e rau; a unu basiola, ava ḡiniḡini bona au ḡiniḡini na garidia. A unu na boromakau heruhadia bona mamoe edia hemoimoilai gabudia ai baela.