1 Bere nhini thangunu-ka ngay-ka bamkardu ku angel 4 pedhaneme ngarra da putek ngala kanhi ngarra ngurru ngurru 4. Ku-ka nanhthi wirrirr 4 pubemardabidhaneme pe i nhini nanhthi wirrirr-ka mere warda wurridha pangu wangu ngarra da putek ngala kanhi i ngarra lalingkin i ngarra nanhthi thay.

2 I bamkardu deyida ku angel numi dimmardawith pangu kathu ngarra ngunga pangarnturtuy wurran wunku nanhthi kanthidha wurrini kardu-nu magim marranu purru. I nanhthi nhini-ka ngarra Yile neki thangunu kathu-wa kardu pana-ya ngarra bere matha wangu dim-ya. I ku angel nhini-ka pirrimpirrukayneme lurruth ngala ngarra ku angel 4 nhini ngarra Yile neki lurruth dampirrumutneme da putek ngala i lalingkin-nu pubatnemenu.

3 I mampirruneme, “Nga. Mere nukun nubatneme da putek ngala, lalingkin i thay, mu kardu pana ngadha warra magim nguyemanu wulumu kardu ngarra Yile neki nukunu.”

4 Bere ngay-ka binthepup kardu thangku numa ngarra nanhthi magim pumebaththa purni-yu. Kardu-ka 144,000-wa kardu yek 12 ngarra Jews nukunu-yu. 5 Kardu ngarra yek Judah nukunu-ka 12,000 pumebaththa purni nanhthi magim-yu. Kardu ngarra yek Reuben nukunu-ka 12,000 pumebaththa purni nanhthi magim-yu. Kardu ngarra yek Gad nukunu-ka 12,000 pumebaththa purni nanhthi magim-yu. 6 Kardu ngarra yek Asher nukunu-ka 12,000 pumebaththa purni nanhthi magim-yu. Kardu ngarra yek Naphtali nukunu-ka 12,000 pumebaththa purni nanhthi magim-yu. Kardu ngarra yek Manasseh nukunu-ka 12,000 pumebaththa purni nanhthi magim-yu. 7 Kardu ngarra yek Simeon nukunu-ka 12,000 pumebaththa purni nanhthi magim-yu. Kardu ngarra yek Levi nukunu-ka 12,000 pumebaththa purni nanhthi magim-yu. Kardu ngarra yek Issachar nukunu-ka 12,000 pumebaththa purni nanhthi magim-yu. 8 Kardu ngarra yek Zebulun nukunu-ka 12,000 pumebaththa purni nanhthi magim-yu. Kardu ngarra yek Joseph nukunu-ka 12,000 pumebaththa purni nanhthi magim-yu. Kardu ngarra yek Benjamin nukunu-ka 12,000 pumebaththa purni nanhthi magim-yu.

9 I nhini thangunu-ka memmirl pangu wangu bamkardu dhi wangu kardu wurnangat nimin-ya dinidha-yu, i kardu mere nangkal mani puyntiwudha nhini mani-yu, wurda. Kardu-ka kardu da pana ngangka-re thangunu-wa kardu murrinh wurnangat nhini thangunu kathu, i darripi pankarlparl nhini thangunu kathu. I kardu-ka kumparra warra pidha ngarra da chair ngala nhini i ku Lamb wanku. Kardu-ka pibangurrdha-wa i mulurn nithinu nginipunh nanhthi wath mani pumeyittha pi. 10 I lurruth ngala pikaykaydha i pumedha pi, “Yile neki da matha mannhiyibirnungime-yu. Nukunu-ka ngarra da chair ngala-wa dim-yu. I nukunu ku Lamb deyida wanku mannhiyibirnungime-yu.”

11 I ku angel wurnangat deyida parriniwegattha pi ngarra da chair ngala nhini-yu i ngarra kardu ngalantharr ngalantharr i ku birnu birnu 4-ya. I ku angel wurnangat nhini-ka pubamnawath kumparra warra i parrarntiparl warda Yile neki-yu. 12 I pumedha pirrini, “Murrinh-ka nhini da thathpirr kardu pumamna-yu. I nganki deyida ngariparlnu Pule ngala kanhi dim ngarra da chair ngala kanhi. Nukunu da matha patha thathpirr i nukunu da matha mukmuk ngala thathpirr. Nukunu-ka lurruth ngala i nukunu da matha ngala thathpirr. I nganki-ka bere matha wangu ngariparlnu ngarni nukunu-yu.”

13 I bere kardu ngalantharr numi kathu-ka mamnga, “Thangku kardu kibimkadhuk kanhi-yu, kardu kibimmangurr-yu i ngarra-dha kathu-wa?” Damngidharrpu. 14 Mu ngay-ka mamna, “Pule, mere the mabath ngay-yu, mu nhinhi da matha the nampunmath-yu.”

I nukunu-ka mamnga, “Nga. Kardu pana kibim-ka kardu ngarra da tetemanthay ngala nimin pardidha ngarra da putek ngala pana i mere parniparttha parni Yile neki-yu. I ku Lamb-ka mampunmayerrarr mange wiye pigunu-yu kumulung ngarra nukunu-re-yu, i da-ka nhini weyida kibimmangurr pana-yu.

15 “I kardu-ka kumparra kibim pana-yu ngarra da chair Pule ngala nukunu i wurlk pumamna pumpan bere matha wangu-yu da ngunga i da thipinhi-ya da ngarra patha nukunu thathpirr-yu. I Pule ngala pana ngarra da chair ngala dim-ka bere matha wangu paninu ngarra pigunu pana-yu i pirranpenu pani.

16-17 “I ku Lamb pana ngarra da chair ngala kanganu-ka mannarnanu pani i mankayinu purru da ngarra kura kamarl ngarra birnu nukunu, i nhini kardu-ka bere matha wangu birnu parninu. I kardu-ka mere deyida medeyi parninu i kura mere deyida pentalalnu pani. I kardu-ka mere deyida penturrnu pani ngarra nanhthi ngunga thangunu-yu, i nanhthi dernturr thangku nanhthi kama kathu. I Pule ngala nhini-ka mankayerrarrnu kamarl kakpa du thangunu i kardu-ka mere deyida panmardathinnu i mere deyida yidingurr parninu.” Ku ngalantharr nhini mamnga-yu.