34
Yoova ipatooŋ poia toni pa Mose
1 Ghoro Yoova isaav pa Mose muul ighaze: “Ugharaat yaam babaŋadi ru, le raratedi tinimale papazogi you nagham payom ve upiyaav di tizi berberia. Leso naŋgeret saveeŋ ila raraate inimale muuŋ naŋgereti. Igham 24:12, 32:19
2 Ugharaat di pataghaaŋ, leso bozo mboŋmaagh, ugham di, ve uza unum tiou sualen izi lolooz daba. 3 Tamtoghon ite paam inim toman ghom malep. Ve lolog pa naghita tamtoghon eta ilaagh taghon lolooz dige maau. Ve ŋgai tovene paam. Tilaagh tigharau lolooz pughu malep.”
4 Yoova isavsaav le isob, ghoro Mose ila igharaat yaam babaŋadi ru, le raratedi tinimale papazogi Yoova igham pani. Mboŋ ndugizau, ndoromaaŋa kat, ve Mose imundig, igham yaam ru tonowen, ve inau izala pa lolooz Sinai daba itaghon Yoova aliŋa. 5 Ghoro Yoova ineep ila yaghur tae lolo, ve izi inim iyoon igharau Mose, ve ivotia tau iza ve gabua. 6-7 Ye ilaagh imbut Mose nagho, ve isaav ighaze:
“You Yoova. Izag tau tonene: Yoova.
You Maaron to lolog isasamin mbesooŋa tiou, ve naghamgham poian di.
Ateg yabyab rikia maau.
Poia tiou, nene tiina kat. Lolog ineep tuŋia ila to tamtoghon tiou ve nauluul di, ve nataghon saveeŋ mbuaaŋ tiou irau sawa isob.
Ŋgar to lolog ineep tuŋia ila to tamtoghon tiou ve nauluul di, nene napatooŋa pa tamtoghon ndiŋndiŋ ndiŋndiŋ.
Ve ŋgar todi to zoraaŋ saveeŋ, toman ŋgar todi pida to iyel pa ataam tiou, sosor todi naol tonowen, moghon moghon you nareureu di.
Eemoghon yes to ledi sosor, you naghurghur di maau.
Naghurghur atia pa yes taudi,
toman ndinatudi, nditimbudi, ve saas todi.” Igham 20:5+, 33:19
8 Mose ilooŋ saveeŋ tonene, le rikia moghon iput aghe, nagho izila pa taan, ve isuŋ. 9 Ighaze: “Aa Yoova, ighaze lolom poia payou, ve ughaze ugham poian ghou, unum toman ghei ve itiŋa tala. Onoon, ival tiina tonowen, dabadi ariaŋa, ve tiloŋlooŋ saveeŋ maau. Eemoghon lolom isamin ghei, ve ureu sosor tiei. Ŋgar tiei naol to tiyel pa tutuuŋ tiom, ureu di tilaledi. Ve ugham ghei ninim lem kat.”
Maaron yesŋa yes Israela timbua saveeŋ muul
10 Mose isavsaav le isob, ghoro Yoova isaav pani ighaze: “Aazne, you naghaze nambua saveeŋ toman yam Israela, leso itiŋa talup ghiit tanim ee moghon muul. You pale nagham mbeb gharatooŋadi tintina ila tamtoghon tiom tisob matadi. Uraat to naghaze nagham di, nene pale ite kat. Muuŋ ve inim, ndug tisob to tineep irau taan isob, tighita mbeb eta tovene pa eta sone. Tovenen ndug ndug to tineep tigharau ne, ighaze tighita di, nene pale matughezaaŋ tiina igham di. 11 Tutuuŋ to aazne naghuri payam, yam asob matamim kisini, ve ataghoni kat. Leso namuuŋ payam, ve nandiir yes Amora, Kanaana, Hita, Peresa, Hivia, ve Yebusa to tineep izi taan Kanaan, tisob taghau tila. 12 Eemoghon matamim imosmoos pa taumim. Yamŋa taan tonowen tamtoghona ambua saveeŋ pa alup gham malep. Aneep saguan padi. Pasa, ighaze yamŋa alup gham, nene pale tinim liis payam, ve tiweu gham ve agham ŋgar samia. Igham 23:32; 1Kor 5:11
13 “Tovenen alup gham toman di malep. Ve mbeb todi naol to suŋuuŋ, areu mbirisan di. Artaal todi, toman yaam todi patabuaŋa to tipayoon di tigharau inadi to suŋuuŋ, yam arab babalagin di. Ve ai to tiluplup di ila sambadi ve tipait maaron liva todi Asera, nakavas ighan suvun di tizi. 14 Yam ambees pa maaron ite paam malep. Pasa, you Yoova to Maaron tiam. Matag pariuuŋ, ve naghaze yam ambees pa you moghon. Tauto tiwatwaat izag tighaze ‘Ye to mata pariuuŋ.’
15 “Tovenen ambua saveeŋ toman taan tonowen tamtoghona pa alup gham malep. Pasa, ighaze yes tigham watooŋrau pa maaron kaaromŋa todi, ve tilup di ve tighanghan, ve tipoi gham pa ala toman di, nene pale yamŋa aghan aniiŋ to watooŋrau todi tonowen. Ve ighaze agham tovene, yam anim maaron kaaromŋa todi tonowen ledi, ve apul murimim payou. 1Kor 10:20
16 Ndinatumim tovene paam. Tivai ndiran tonowen ndinatudi liva malep. Pasa, ighaze ndiliva tonowen timbees pa maaron kaaromŋa todi, nene pale tiweu ndinatumim tila timbees pa maaron kaaromŋa tonowen, ve tighur muridi payou.
17 “Agham ain, gol, ma silva, ve agharaat mbeb eta inim maaron payam ve apaiti malep. Igham 20:4,23
18 Ve matamim iŋgal lupuuŋ tiina to ghaniiŋ mberet to le yis maau ne. Yam apul Isip pa kaiyo Abib. Tovenen ndaman isob, ighaze kaiyo tonenen ivot, yam alup gham pa ghaniiŋ mberet to le yis maau ne irau mboŋ liim ve ru itaghon aliŋag. Igham 12:17
19 “Ndinatumim nditamoot to aidaba, toman ŋgai tiam ndinatudi to tipoop di muuŋ, nene tisob tinim leg moghon. Tovenen ŋgai tiam ndinatudi nditamoot to tipoop di muuŋ, arab di tisob timatmaat tinim watooŋrau payou. Igham 13:2
20 Eemoghon esele ndinatudi to tipoop di muuŋ, arab di tinim watooŋrau payou malep. Arabolin di pa sipsip, ve arab di tinim watooŋrau payou. Leso agham mulin esele tiam. Ve ighaze arabolin di maau, ghoro arab polin luadi timaat. Ve ndinatumim aidaba tovene paam. Arabolin di pa sipsip, leso agham mulin di.
“Tamtoghon to ighaze isuŋ payou ne, nima ŋginiŋa ve inim ivot naghog malep. Igham 22:29, 23:15
21 “Ndag inim eez, ila imuul ndag inim liim ve eez, yam irau agham lemim uraat. Eemoghon ndag inim liim ve ru, agham uraat malep. Atemim izi. Sawa to vazogiiŋ ve taitaiŋ paam, yam irau matamim iŋgal sawa tonenen ve atemim izi. Igham 20:8+, 23:12
22 “Ndaman isob, sawa to Pasova ighaze isob, ve wik liim ve ru inim ila ve aniiŋ wit mata ivot, ghoro yam asob alup gham pa suŋuuŋ. Ve ighaze ndaman igharau ighaze isob, ve sawa to taitaiŋ ivot, yam asob alup gham pa suŋuuŋ muul. 23 You Yoova to Tiina to yam Israela. Tovenen ndaman isob, ighaze sawa tintina tol tonene tivot, ghoro nditamoot tiam tisob tinim tilup di ila naghog, ve tisuŋ payou. Igham 23:14
24 “You pale namuuŋ payam ve nandiir tamtoghon tisob tighau pa taan to naghaze nagham payam, leso inim lemim. Ve you pale naseeŋ taan tiam ila inim tiina. Ighaze sawa tintina tol tonene tivot, ve yam asob apul ndug tiam tiam, ve anim alup gham ila naghog pa suŋuuŋ, agham ŋgar naol pa taan tiam malep. Pasa, tamtoghon eta irau lolo ipazaagha pa ighami sorok ne maau.
25 “Siŋ to watooŋrau to yam aghaze agham payou, alupi toman mberet to yis ineep ila ne malep. Ve sawa to alup gham pa ghanghaniiŋ to Pasova, ve arab mbeb pida tinim watooŋrau, apul alulu ineep le ndugizau malep. Ighaze alulu ineep, aghuri ila yab ighan suvuni le isob, ghoro ndugizau. Igham 12:10
26 “Aniiŋ mata to tivot ila taan tiam, yam avureer popoia moghon, ve agham di tinim rumai to Maaron tiam Yoova. Igham 23:19.
“Ighaze anaz mekmek natu eta, yam anazi toman tuz to tina malep.” Igham 23:19
Yaam papaghu ru to tutuuŋ ineep ila
27 Yoova isaav muul pa Mose ighaze: “Saveeŋ tiou isob tonene, taum umbood di. Pasa saveeŋ to itiŋa tambua pa talup ghiit tanim ee moghon, nene iyoon izala saveeŋ tonene.” 28 Mose ineep toman Yoova izi lolooz daba irau mboŋ tamoot ru (40). Sawa tonenen, ye ineep sorok. Ighan aniiŋ eta maau, ve ighun ya maau. Ve iŋgeret tutuuŋ saaŋgul ila yaam babaŋadi ru. Tutuuŋ tonowen isavia ataam to titaghoni, leso lupuuŋ todi toman Maaron ineep ariaŋa. Igham 24:18; Mt 4:2
Mose nagho isul
29 Mose igham yaam babaŋadi ru to tutuuŋ saaŋgul ineep ila, ve imuul izila. Yaam ru tonowen, nene pa ipalot yes Israela, leso matadi kisin saveeŋ mbuaaŋ todi toman Yoova ve titaghoni kat. Sawa to Mose ipul lolooz Sinai daba ve izila, nagho isul kat. Eemoghon ye tau iwatagi maau. Nagho isul pasa, yesuru Yoova tilup di ve tisavsaav.
30 Mose ila ivot to yes Israela, ve Aron toman ival tiina tighita nagho isul. Tovenen timatughez pani, le tila tigharaui maau. 2Kor 3:7
31 Eemoghon ye ipoi di ighaze tinim, tauto Aron igham yes daba to Israel, ve yesŋa tila to Mose. Ghoro Mose isavsaav toman di. 32 Le isob, ghoro ival tiina anadi tinim tigharaui, ve ye ipaesia saveeŋ isob to Yoova isavia pani izi lolooz Sinai daba, ve avo iyaryaaŋ padi leso titaghon katin saveeŋ tonenen. 33 Isavsaav padi le isob, ghoro ipoon nagho pa uli. 2Kor 3:13
34 Eemoghon sawa isob to ye ighaze ilooŋ ila mbeez to Yoova, ghoro igham uli tonowen ighau pa nagho, ve yesuru Yoova tisavsaav. Tisavsaav le isob, ghoro ivot ila pumuri, ve ipaesia saveeŋ to Yoova isavia pani ne pa yes Israela ve tilooŋa. 35 Sawa to ye ivot ila pumuri, yes Israela tighita nagho isul. Tauto Mose iponpoon nagho, ve inepneep le sawa to ighaze imuul ilooŋ ila mbeez, ghoro igham uli tonowen ighau pa nagho, ve yesuru Yoova tisavsaav.