46
Maaron inim inaad ariaŋa to yoŋgaaŋ
Mbouŋ to yes Kora
1 Maaron inim inaad ariaŋa to yoŋgaaŋ, ve ipapalot ghiit.
Ighaze pataŋani eta ivot pait, ye pale ineep digeed ve iuul ghiit.
2 Tovenen irau tamatughez maau.
Ighaze yoŋgyoog itok taan, ve lolooz tipolpol tizila te lolo,
3 ve te isami, ve dibom tipaparab
ve tighelghel naari to lolooz pughu le lolooz tirur, nene poia. Irau tasaŋeeŋ maau.
4 Maaron Tiina To Ilib Pa Ndimaronŋa Tisob Ne, ndug toni patabuaŋ, ye le ya to moghon moghon irereer.
Ya tonowen igham tamtoghon to ndug toni tineep pooi toman tinidi iza. Mbo 36:8; Ezek 47:1-9; 7:37-39; Syg 22:1
5 Maaron inepneep ila ndug tonowen ve iŋginŋgini.
Tovenen mbeb eta irau itok ndug tonowen maau.
Ighaze pataŋani eta ivot padi, Maaron irau isaŋan le mboŋmaagh maau. Pale iuul di rikia moghon.
6 Ndug ndug, matughezaaŋ tiina igham di ve tisaŋeeŋ.
Kinik to taan tapiridi isob, le ndug todi tiwaghamgham.
Ve Maaron isaav aliŋa tiina inimale lalaav avolutu, le taan ituntun ve ireer inimale ya. Mbo 97:5; 2Pe 3:10+
7 Yoova, ye Maaron ariaŋa ve iŋgin mbeb tisob. Ye ineep toman ghiit irau sawa isob.
Maaron to Yakop inim inaad ariaŋa to yoŋgaaŋ. Ro 8:31
8 Anim aghita uraat tintina to Yoova igham di.
Uraat toni igham tamtoghon timatughez ve avodi ikaak.
9 Ye ipasob malmal irau taan dige to naol ne.
Ve iŋgor polpolin pane ve iiz, ve isad sigeu to malmal, ve isuruuv di tizala yab.
10 Ye isaav pa tamtoghon ighaze: “Aparab iraua!
Atemim izi, ve aghilaal ghou. You moghon to Maaron.
Ndug ndug pale tipait ghou,
ve izag inim tiina irau taan isob.”
11 Yoova, ye Maaron ariaŋa, ve iŋgin mbeb tisob.
Ye ineep toman ghiit irau sawa isob.
Maaron to Yakop inim inaad ariaŋa to yoŋgaaŋ.