69
Suŋuuŋ to tamtoghon to imbaad pataŋani tiina pa Maaron iza
Mbouŋ to David
Ŋgeu to imuuŋ pa mbouŋ irau isaav pa tamtoghon timbou mbouŋ tonene itaghon aliŋa tovene ‘kananaŋ ruŋgu pisosooŋa.’
1 O Maaron, uul ghou lak!
Pasa, ya ivon iza inim imuul luag, ve naghaze nandal tonene.
2 Aazne, agheg putukia ila tiiŋ tiina.
Leg taan ariaŋa eta pa nayoon izala ne maau.
You naneep izila mazovan lolo.
Nepooŋ tiou to aazne, nene inimale yawaaŋa ivot toman tapiri, ve izugua ghou nalaleg.
3 Maaron, you nasami wa.
Taŋiiz tiou iŋaŋarua ghom le ŋgarsuag imar.
You naghur matag payom naghaze yom pale uul ghou. Eemoghon maau.
Tauto tapirig isob.
4 Tamtoghon to tighur koi payou ne, yes ival le ival kat. Irau nanin di maau. Tilib pa dabag raua.
Koiagŋa to tighaze tiwaghamun ghou ne, tapiridi tintina, ve tiŋgal saveeŋ kaarom naol payou.
You nayub mbeb todi eta maau. Eemoghon tisavsaav payou tighaze napamuul mbeb todi.
Pale napamuul sa? Yo 15:25
5 Maaron, yom uwatag: You nagham ŋgar samsamia to borouŋa.
Sosor tiou to naol ne, eta iyooŋ payom maau.
6 Yoova, yom Maaron ariaŋam kat ve uŋgin mbeb tisob. Uul ghou lak!
Pa vene, nagham mayaŋiiŋa pa yes to tinumeer ghom ve tighurghur matadi payom.
Maaron to Israel, you nagham ŋgar tiina pa yes to tizuaria di tighaze le tiwatag katin ghom.
Ighaze yom uul ghou pa pataŋani tiou tonene maau, nene pale mayadi.
7 You nambesmbees payom, tauto tamtoghon tipiyaav saveeŋ velegiiŋ naol payou.
Yes tigham ghou mayag, ve natudtud moghon.
8 Taug siŋ tiou tighita ghou nanimale you ŋgeu sumbu.
Ve toŋvetaz tiou kat to tinamai ee moghon, yes tipul muridi payou inimale you to ndug ite. Mbo 31:11; Yo 7:5
9 Ŋgar tiou iyaryaaŋ naghaze le nagharaat rumai tiom. Eemoghon ŋgar tonene, to aazne inim pughu pa nambaad pataŋani tiina inimale yab ighan ghou.
Yes to tiveleg ghom, tiveleg ghou paam. Yo 2:17; Ro 15:3
10 Sawa to natatan taug, ve naŋgun taug pa ghaniiŋ aniiŋ,
tamtoghon matadi velegin ghou.
11 Ve sawa to lolog ipataŋan, ve nagharaat taug maau, ve nandud uli to moŋiiŋ, yes tiŋiŋ payou.
12 Yes to tiluplup di izi maran ate, tininin avodi payou.
Ve yes ghunuuŋa timboumbou ghou inimale ŋalalaŋ.
13 Eemoghon suŋuuŋ tiou iŋaŋarua ghom moghon.
Yoova, poia tiom, nene tiina kat. Lolom isamin ghou, ve uul ghou lak!
Lolom ineep tuŋia ila to tamtoghon tiom ve uluul di.
Tovenen sawa sine to ughita poia, ulooŋ suŋuuŋ tiou tonene, ve uul ghou. 2Kor 6:2
14 Upas ghou navot pa pataŋani tiina tonene.
Pa vene, agheg putukia ila tiiŋ le malmalig nazila.
Ugham mulin ghou ila koiagŋa nimadi.
Undae ghou naza pa mazovan lolo.
15 Uul ghou. Pa vene, yawaaŋa izugua ghou, ve iweu ghou nalaleg.
Ughita. Paam nandal nazila mazovan lolo.
Aazne, you naneep izila saambu to yes mateeŋa, ve avo ighaze iŋgup tonene. Upas ghou navot.
16 Yoova, yom poiam. Lolom ineep tuŋia ila to tamtoghon tiom ve uluul di irau sawa isob. Tovenen ulooŋ suŋuuŋ tiou tonene, ve uul ghou.
Yom lolom isamin ghei kat. Tovenen matam imuul inim payou.
17 You mbesooŋa tiom. Uŋgooz matam payou malep.
Pasa, aazne naneep ila pataŋani tiina lolo.
Tovenen ulooŋ suŋuuŋ tiou, ve uul ghou rikia.
18 Unum uyoon ila digeg, ve uul ghou.
Ugham mulin ghou ila koiagŋa nimadi.
19 Ŋgar to koiagŋa tigham payou ne, yom uwatagi wa.
Yes tiveveleg ghou, ve tipamayaŋin ghou, ve tiwaghamun izag kat.
20 Saveeŋ velegiiŋ to tipiyaava payou, nene igham lolog ipataŋan kat. Naghita naghaze irau poiag muul maau.
You naghaze pale tamtoghon lolodi isamin ghou, ve tinim tirab ateg.
Eemoghon maau. Eta inim peria tiou maau.
21 Sawa to pitool ghou, koiagŋa tighur mbeb lili ila aniiŋ tiou.
Ve sawa to murun ghou, tigham ag vaen papaii. Mt 27:34,48; Yo 19:29
22 Tovenen suŋuuŋ tiou iŋarua ghom naghaze: Sawa to koiagŋa yesŋa nditadi tilup di ve tighanghan, ugham toŋ to aniiŋ todi ineep izala, inim liis padi, ve iwaghamun di. Ro 11:9+
23 Ugham matadi ipis, leso tighita ndug muul sob.
Ve ugham tapiridi isob, ve aghedi ipaspas.
24 Naghaze uŋgal matadi, ve tiyamaan katin mbalmbali tiom.
Mbalmbali tiom iza todi, ve iwaghamun di kat, ghoro poia!
25 Inadi to nepooŋ pale balim.
Tamtoghon eta irau ineep ila mbeez todi muul maau. Mbaŋ 1:20
26 Pasa, tamtoghon to yom ulosi ve ughur pataŋani pani,
ndiran samsamia tonowen tighur pataŋani iza toni muul, ve tinin avodi pa pataŋani to ivot pani.
27 Sosor to ndiran tonowen, lolom imaagh pani malep.
Matam kisini, ve ughur atia padi le tiyamaana kat!
Ughurghur di malep.
28 Umus izadi pa rau to nepooŋ mataad yaryaara.
Rau to tamtoghon deŋiadi izadi tineep ila, ndiran tonowen izadi ila toman di malep. Igham 32:32+; Syg 20:12+, 21:27
29 O Maaron, aazne nambaad pataŋani ve nayamaan yabyabuuŋ tiina.
Tovenen unum uul ghou.
Uŋguaaz ghou nazala sala. Leso naneep pooi.
30 You pale nambou ve napait Maaron iza. Pasa, ye igham lolog poia kat.
Tovenen you naghaze napaiti.
31 Ŋgar tovene, nene igham Yoova lolo poia kat le ilib pa makau katindi to tighamgham di pa watooŋrau. Mbo 50:9+; 51:16+
32 Yes to tinumeer Maaron ve timbadbaad pataŋani, ighaze tighita Maaron iuul ghou, nene pale tinidi iza.
Ve yes to tizuaria di pa Maaron ne paam. Ighaze tighita ulaaŋ to ye igham payou, nene pale ipalot di. Mbo 34:2
33 Pasa, yes to timbadbaad pataŋani ve tinumeer Yoova, ye iloŋlooŋ suŋuuŋ todi.
Tamtoghon toni to tineep ila koiadi nimadi, ye irau lolo imaagh padi maau.
34 Sambam paroŋania, taan, ve te, toman mbeb tisob to tineep ila, yam asob apait Maaron.
35 Pasa, ye pale igham mulin ndug Zion, ve ipamundigin ndug tisob to Yudea muul.
Leso tamtoghon toni timuul tila tonowe, ve tigham mulin taan todi, ve tineep ila.
36 Ve muri, taan todi pale izi pa papaghu todi, ve tighami inim ledi, ve tineep ila.
Tovenen yes to lolodi pa Maaron, pale tineep pooi tonowe.