1 Ere ye ti nəhuk nihi ni ti nəhuk kè meleher ge Melefit ; nəhuk kè meleher ga Yezu *Krist daya, naŋ ya ti amara magrafəŋa seriya kà ndam ya nday tə̀bu àna sifa na akaba kà ndam ya tə̀məta na. Nəhuk ti aɗaba amaŋgazlivu ana leli, aməgur mis ɗek. Ere ye ti nəhuk ni ti nihi : 2 hioru ma ge Melefit ana mis. Ku mis tawayay miceni, ku tàwayay do nəŋgu ni, hi ana tay, kə̀mbrəŋ ba. Hiiki ma ana tay ka zlam gatay ya tagudar ni, ləgi ana tay, vi njəɗa ana tay. Ku tamal tìciaba zlam ya ti kacahi ana tay na ɗek ndo nəŋgu ni, kə̀zumki ɓəruv ka tay ba, ɓesa. 3 Aɗaba sarta nahaŋ amara ; ka sarta gani nani ti mis ndahaŋ atawayay ma ge jiri ya macahi ana tay ni va do. Ataɗəbay ere ye ti məɓəruv gatay awayay ni ciliŋ, atəzalakabu mʉsisi ndahaŋ kay ga macahi ma ya tawayay miceni ni ana tay. 4 Atəbi slimi ana ma ge jiri va do ; atəbi slimi ana ma masakani sawaŋ. 5 Ay nak ti njəhaɗ njaŋ-njaŋ ; ka ya ti mis təgruk daliya ni ti ɓesa ; hi *Ma Mʉweni Sulumani ana mis kəlavaɗ. Tamal kagray nahkay ti, kəgri tʉwi ana Melefit akaɗa ya àdaba kur a àwayay ti kâgray ni.

6 Nu ti sarta goro ènjia wuɗak. Nara nəvi ahàr goro ana Melefit akaɗa ga zum ya tabəhaɗi ni. 7 Nàkaɗva àna tʉwi goro ya nàgray na lala. Nèndeveriŋaba tʉwi ya Melefit àhu nâgray na ɗek akaɗa ge mis ya acuhway, ènjʉa ka məlaŋ mədukana ni. Nə̀mbrəŋ məfəki ahàr goro ka Yezu ndo simiteni. 8 Ku nihi Melefit àslamatuva zlam a, Bay geli aməvu azuhva tʉwi goro ya nə̀gri ni ; aməvu ti àna jiri gayaŋ. Aɗaba Bay geli Yezu ti agrafəŋa seriya kè mis àna jiri a : aməvu zlam ti ana nu ciliŋ do ; aməvi ti ana ndam ya tajəgay mara gayaŋ àna məmərani ni ɗek daya.

9 Zay njəɗa gayak ɗek ga marana afa goro ke wecewecena, 10 aɗaba Demas ti awayay zlam ga duniya, àmbrəŋa nu a, àsləka àdoru a Tesalonik. Kreskens day àdoru ka haɗ Galasi, Tit ti ni àdoru ka haɗ Dalmasi. 11 Maslaŋa ya ti naŋ àbu akaba nu ni ti Lʉk ciliŋ. Nahkay kara nahəma zubiya Mark a ju, aɗaba Mark ti esliki məjənaki nu ke tʉwi ge Melefit tata. 12 Tisik ti nə̀sləroya naŋ e Efez a. 13 Ka ya ti nàsləkabiya a Truwas afa ga Karpus a ni ti nə̀mbərbiya mugudi goro a ; zubiya ji. Həlubiya wakita goro a daya ; wakita ya ti ga ambəl ni tàgəjazlkukbiya ahàr ba.

14 Eleksender zal gəzaŋ ni àgrua cuɗay a dal-dal ; ere ye ti àgru ni ti Bay geli amatraɓ naŋ bilegeni. 15 Eleksender ti àgray ti mis tə̀gəskabu ma geli ya məhi ana tay ni ba simiteni ; nahkay nak day bavu slimi àna naŋ.

16 Ka ya ti tàgrafua seriya enjenjena, nə̀həŋgrifəŋ ana ndam ge seriya ni ti, maslaŋa ya àjənaki nu ka ma gani ni ti àbi ; mis ɗek tə̀mbrəŋa nu a. Melefit mə̂mbərfəŋa zlam gatay ya tàgray na kà tay a ! 17 Ay Bay geli àjənakia nu a, àvua njəɗa ; nahkay nə̀hia ma gayaŋ ana mis a àndava, ndam ya tə̀fəki ahàr do ni ɗek tìcia. Seriya àgəs nu ndo ; àhəŋgafəŋa nu kà mazlahku a. * Ka sarta gani nani ti ndam ga Yezu ya tə̀wəl tay àna seriya ni ti tə̀bi tay ana mazlahku ti tâhəpəɗ tay. Nahkay bi Pol awayay aɗəm tàkaɗ naŋ ndo ; ay bi awayay aɗəm Yezu àhəŋgafəŋa naŋ kè Setena ahkay do ni kà ndam ezir gayaŋ na ciliŋ. 18 Bay geli amahəŋgafəŋa nu kè mis ya təgru cuɗay na ɗek ; amahəŋgay nu ti nə̂huriyu a Məgur gayaŋ ya e melefit bu ni vu. Naŋ ti mis ɗek tâzləbay naŋ ga kaŋgay-kaŋgayani ! Aya nahkay.

19 Gri sa goro ana ata Prisil nday ata Ekiles. Gri sa goro ana ndam ga huɗ ahay ga Onesifor daya. 20 Erest ti ànjəhaɗiya a Koreŋ a. Trofim ti èɓesey do, nə̀mbərbiya naŋ e Milet a. 21 Wuɗaka ahar kusi ti zay njəɗa gayak ɗek ga marana afa goro a.

Ata Ewbʉl, Pʉdeŋ, Liŋ, Klodiya akaba bəza ga məŋ geli ndahaŋ ni ɗek tə̀gruka sa.

22 Bay geli mə̂ləbu akaba kur, mə̂gri sulum gayaŋ ana kʉli ɗek ti.