1-2 Wankuyeim Pawl mo ilisow Atens in Kolinit; iban gum-Yudiy yagan Akwil, naven Ponit. Kweiboug nises Ita̱liy, o peinan Sisal Kalodiw nakaleiwag va̱gan min-Yudiy babaw bilisawes naven towen Lom, mapuna ilisow Ita̱liy; e, mwana nimeis Kolinit son nakwav Piliskil.

3 Towen nawotet, ikow man kulivis mo ibsibas ivag bunatum. O peinan Pawl ikakin sinap towen, mo inekes, sisiy nisesus, iwwotets.

4 Tapwa̱loul waseg, Sa̱dad katanok katanok illivans siney Min-Yudiy, o mina-Gilis, isimkakin va̱gan bisimounids waseg Yeisuw.

5 Wankuyeim Saylas son Timotiy meinoy nimeis Masidoniy isaps Kolinit, igawa Pawl ivvalut wotet towen, ikatimlakes min-Yudiy va̱gan bikakins beibwein mtowen Yeisuw mounid Kelis.

6 Wankuyeim tasiyas mo ipiyaves Pawl anilivan, itawyages, asilivan kalbaleb waseg; mapuna ikatsap anakweim va̱gan bikakins bo ipiyaves tasiyas, ilana, “Deis! Peinan kupiyaves livan towen, igaw bukumta̱mats; takaleiwag yakamiy. Bweina bo batouvin basekes livan towen tobwag ven gimgilis, va̱gan bo biliganes.”

7 Ikous, mo ilisawes, isiw wanbunatum tavna̱sein Yowbad teitan, yagan Titos Yusitos, nabunatum nises sinagog wadadan.

8 Tanuwagan sinagog, yagan Kilisip, bo iliganes liva̱nen Guyaw Yeisuw, sen angamags babaw; o min-Kolinit babaw bo iliganes, mo ibapta̱yses.

9-10 Kweitan tut, boug waseg, Pawl immasis, anmikon waseg mo ikin naguyaw Yeisuw, ilana, “Pawl, awoum beivag ampwa̱yat, kusimkakin liva̱neig waseg; awoum kukwa̱pay, peinan agugwamag namagleis nisesus ven towen. Ta-kweitan gamag beiweim o biyagageim, peinan soum yey tases.”

11 Mapuna Pawl isesuna katanok bweilim ikous, mo tibukon kweinim katanok. Misumkwey towen waseg ikatimlakes ven towen gimgilis va̱gan kid bikakins liva̱nen Yowbad.

12-13 Mitiya̱mun towen, min-Akay sigabman avakaein, yagan Galiyon, nises ven towen. Min-Yudiy ninous katanok-wan mo itamanaws iyousis Pawl itokes inawes Galiyon wankabkaleiwag, a̱ban towen wamatan, ilansa, “Taw towen sivinan bibob dakaleiwags, ikatimlakay tobwag tapwa̱loul va̱gan bitateiy gamag ninous.”

14-15 Pawl sivinan bisilamaw anilivan, tage Galiyon mo idibakes min-Yudiy tasiyas, ilana, “Min-Yudiy yakamiy, magat towen ansinap kalbaleb, o magat biyageg son, bweina baligen amilivan; o peinan sinap towen yakamiyana amisinap, sinapun imiven, o liva̱nen imiven, kadiloka yakamiyana bukwaleiwags; yey apiyev.”

16 Ilivan ma̱wan, mo ikayabes, ilisawes nakabkaleiwag towen.

17 Gamag babaw mo iyousis tanuwagan sinagog yagan Sositen, iwaways-wan kabkaleiwag towen wamatan; tage Galiyon nag igeg nanon sinap towen waseg.

18 Wankuyeim Pawl isesuna ven towen, yam mwasanin. Ikous, mo ilisawes Yeisuw nagamag, itanouys siney Piliskil son Akwil; ikuks, bineis Siliy. Isaps ven Kenikil waseg, Pawl iduy kunun peinan anilivan ka̱tout Yowbad waseg.

19 Ikuks ee... ilugs Epesos, Pawl mo ilisawes tasiyas, isiw wanuwan sinagog mo illivans sisiyas min-Yudiy; va̱gan bivag ninous bikanavin.

20-21 Tasiyas mo idibakes Pawl, ilansa, “Kadilok kadiveiyov tut ya̱koum simey yak tasesus.” Ilana, “Nag; bo banoun. Kukin nanon Yowbad ma̱wan, igaw mo ba̱yum bam.” Mo itouw wa̱wag, ikuks, itanes min-Epesos.

22 Ilugs Sisaliy, ikatulag in Yelusalem, imulouls siney tasiyas tayakelesiys; mo inoun in Antiyok.

23 Isesuna yam mwasanin waseg; ikous, mo inoun ilakwanes tayakelesiys ven katanok katanok wasigeis; isilamaw ven katanok katanok wawnuwan ven Galetiy; iyakous, mo ikanapel in ilakwanes ven katanok katanok wawnuwan Piligiy; ilabes tayakelesiys va̱gan kid bitawtouns.

24 Gum-Yudiy tassinap teitan mo isap Epesos, towen yagan Apolos, naven Aleksanidel, singay ikakin Bukitab, o itawtoun geiguy waseg.

25 Kweiboug mwasanin gamag bo ikatimlakes, mapuna ikakin Yowbad inaked. E, bo iseiw nuwan liva̱nen Yeisuw bilivan, anilivan mounid-wan. Ikatimlakes gamag mwasanin anilivan towen. E, ikakin sinapun tabapta̱ysein gamag towen Yon. Tage sinapun Yeisuw nag iyakous.

26 Anilivan kamnat mo isilamaw sinagog wanuwan. Piliskil son Akwil iliganes, mo idawes im wasibunatum, ikatimlakes Yowbad inaked, mo ikakin bwein.

27-28 Iyakous nawotet ven towen, mo ivag sivinan kid bein Akay. Yeisuw nagamag ilivans, “Bwein;” mo ilelels let silma̱nin ven towen tayakelesiys-nen, va̱gan bivna̱ses mtowen Apolos, anbwabwal tasiyas. Isap wasiven, mo ikatimweis asisinap tayakelesiys tasiyas. Kweiboug-o Yowbad nilabes mo isimounids Yeisuw waseg, misiya̱mun towen asisinap mo ikatimweis peinan Apolos ilabes; o anilivan itamap wasigeis min-Yudiy asilivan, peinan anilivan tawtoun waseg ikatimlakes silawun Bukitab, va̱gan bikakins kid mounid Kelis mtowen Yeisuw.