1 Wankuyeim Yeisuw mo ininoun ven Galiliy waseg. Nag bininoun Yudiy waseg, peinan mwasanin Yudiy sivines kid bikatimates. 2-4 Kakita bisagals min-Yudiy sisagal towen waseg niwlules tava̱lel. Budan Yeisuw mo idibakes, ilansa, “Kunoun kun Yudiy, va̱gan kid muvamul mo bikines mukwawotet. Kukin kal bisesuna wanven bisowm nawotet, nag bivakaein butun tatonen. Yak ma̱wan, kukin bukutawtoun, kadiloka gamag babaw bikines miwotet.” 5 Budan-vak nag isimounids waseg, mo ilivans ma̱wan.

6 Yeisuw ilana, “Yakamiy bukuneis yam babaw bwein-wan, tage yey nag; igaw tutag waseg mo banoun. 7 Ta-ma̱wan ven watinow gimgilis bikamliweimiy; tage bo ikamliweigs peinan bo akamtel asisinap kalbaleb. 8 Yakamiy kukwatulags kuneis sagal towen, yey bases. Igaw tutag beibwein, mo baw.” 9 Ilivan ikous, isesuna ven to Galiliy.

10 Yeisuw budan ikatulags ineis sagal towen. Yeisuw anmwa̱net mo inoun iva̱pana nein, peinan nag sivinan gamag babaw bikakins. 11 Min-Yudiy ininineivs Yeisuw sagal towen waseg, ilansa, “Avanuy misikey?”

12 Gamag babaw ikatimwa̱lags, liva̱nen Yeisuw illivans. Mwasanin ilansa, “Taw towen kamnat.” Mwasanin gog ilansa, “Nag, peinan ikatidavidav gamag wasigeis.” 13 Tage asilivan kweitan kweitan, nag bilivans kamnat waseg, ikagsowums, peinan iwenes min-Yudiy situwa̱veks.

14 Watapwan sagal Yeisuw mo isiw in Yowbad wanbunatum, ikatimlakay. 15 Min-Yudiy mo isunasun ninous, ilansa, “Ama̱wan nikakin ansinap towen, peinan ta-iskul avakaein.”

16-17 Yeisuw ikatimop asilivan, ilana, “Ta-agusinap tatoneig, nag. Towen nikayabeig nam, ansinap tonen. Kukin sivinam bukuwtel Yowbad nanon, mo bukukwakins avanuy meinoy neim sinap towen, takinew Yowbad waseg, o takinew agusinap tatoneig. Bukuwtel Yowbad nanon mo bukukwakin.

18 “Kavel bilivan ansinap tatonen, sivinan kid bivakaein butun tatonen. Tage kukin kal bikanow natovek aygan, o sivinan butun natovek bivakaein, towen gamag kamnat, didumwal.

19 “Adok Moses nisekeimiy Yowbad nakaleiwag; tage nag teitan yakamiy bivnas nakaleiwag towen? Wawun sivinamiy bukuweigs?”

20 Iweis gamag babaw, ilansa, “Takabala̱wein ya̱koum! Nag kal beiweim! Adok Baloum bo iyousim.”

21 Yeisuw ikatimop asilivan, ilana, “Nawtel gunawotet bwanabwein katanok, Sa̱bat waseg, mo igeg ninoumiy. 22 Tage yakamiy kubwabwes a̱pwaw momwan yam Sa̱bat waseg, peinan Moses nakaleiwag ma̱wan. (Nakabsilamaw sinap towen tammwayas wasigeis, wankuyeim Moses anatut igawa ikokews sinap towen.)

23 “Peinan kubwabwes momwes Sa̱bat waseg, va̱gan nag bukugulekwes Moses nakaleiwag, aveiyag wawun kwavikuns takatoun navag neibwein Sa̱bat waseg? 24 Kakit kukwakins, kwaleiwags, kulansa, ‘Towen bwein; towen kalbaleb.’ Bo ibol mikaleiwag peinan nag kukwakins beibwein. Kadiloka kuneves silawun sinap va̱gan bukwaleiwags bwein.”

25-27 Min-Yelusalem mwasanin iliganes anilivan, ilansa, “Adok gamag towen datuwa̱veks ininineivs mtowen, sivines kid bikatimates. Tut gog towen illivan wamnat, o nag ikatimapus aygan. Tabta mounid ikakins taw towen Mesay Kelis? Adok nag. Adok watinow gamag towen, peinan takakins avanuy meinoy neim; tage igaw Kelis beim, nag kal bikakin avanuy meinoy yay.”

28 Igawa ikatimlakay Yowbad wanbunatum, aygan avakaein ilana, “Mounid kukwakins yey, o kukwakins avanuy ma̱noy nam; tage teitan nikayabeig mo nam. Yey gunakaleiwag nag. Mtowen ikaleiwag, mounid ansinap kamnat; tage nag kukwakins mtowen. 29 Yey akakin mtowen, peinan soug towen nakases, mo ikayabeig nam.”

30 Iliganes anilivan towen, singaya igeg ninous, iyokons kid biyousis va̱gan biyateles, tage nag kadilokes peinan nag ilouvat Yeisuw inakanig tutan; igaw-wan.

31 Singay babaw gamag ikatilutegs, mwasanin gog isimounids waseg, ilansa, “Igaw Kelis beim, tabta nawotet bitawtoun mo bitamap waseg towen nawotet? Adok nag.”

32 Gamag babaw liva̱nen Yeisuw ikatimwa̱lags ma̱wan; tasiyas Palisiy mo iliganes; mapuna tasiyas Palisiy sisiyas tanuwgwes lun situwa̱veks mo ikayabes siplismans va̱gan biyousis Yeisuw, ya̱tal silma̱nin.

33-34 Yeisuw mo ilana, “Sigwey yakamiy basesun tut nag biveiyov, mo banek towen nikayabeig nam. Bukuneveigs, nag bukuba̱neigs; ta-ma̱wan bukuwekeigs; nag.”

35-36 Min-Yudiy sisiyas mo illivans, ilansa, “Avanuy sivinan bein, mo ya̱kids nag bitaba̱nes. Adok sivinan binekes sidayas min-Yudiy tasiyas misikes sisiyas kadiveiyov ven gimgilis, mo bikatimlakay tobwag ven gimgilis wasigeis. Wawun anilivan towen, ‘Bukuneveigs, nag bukuba̱neigs, ta-ma̱wan bukuwekeigs’?”

37-38 Yam towen, nakabiyokous sagal waseg, Yeisuw mo itamanaw, aygan avakaein ilana, “Kal yak amdak, kadiloka kumekeig kumoum. Kukin bukusimounid waseg yey, ya̱koum liva̱nen Bukitab nises mamagina,

39 Anilivan towen, liva̱nen gog Yowbad Kululuwan, wasigeis tasiyas tasimounids waseg Yeisuw, peinan Yowbad mo bisek Kululuwan wasigeis tasiyas. Igaw Yeisuw bitawtoun avakaein, beiyum binek Taman, Kululuwan mo beibus bimekes gamag tasiyas tasimounids Yeisuw waseg.

40-42 Gamag mwasanin iliganes anilivan towen, ilansa, “Adok mounid towen palopit towen takaymates bimug Mesay waseg.” Tage gamag mwasanin ilansa, “Mtowen Mesay tatonen.” Mwasanin gog ilansa, “Mesay Kelis nag beinoy Galiliy. Adok nag. Peinan liva̱nen nises Bukitab waseg, ilana, ‘Mesay natovek Deibid’ o ‘Mesay mo beinoy Betelem,’ Deibid naven tatonen.”

43 Mapuna gamag babaw ilivis, mwasanin ninous kweitan, mwasanin ninous kweitan. 44 Mwasanin gog sivines biyousis Yeisuw, tage nag teitan iyous; nag.

45 Tasiyas plismans iyum inekes tanuwgwes lun situwa̱veks sisiyas tasiyas Palisiy. Situwa̱veks mo ikatiga̱nes, ilansa, “Aveiyag wawun nag kuyousis Yeisuw?”

46 Iweis tasiyas plismans, ilansa, “Nag kweitan gamag anilivan ma̱wan taw towen anilivan.”

47-49 Tasiyas Palisiy mo idibakes, ilansa, “Adok yakamiy-vak bo ikatidavimiy. Ta-kweitan guyaw isimounid waseg gamag towen; nag. Ta-kweitan Palisiy; nag. Tage tasiyas gamaga babaw, kaleiwag itagouwa̱wes, isiplaves kaleiwag, mapuna Yowbad bimop sikalbaleb.”

50-51 Nikodimos sisiy tasiyas nisesus; kweiboug nilakwen Yeisuw; mtowen mo ilana, “Tab kadilok bitasilkodes taw towen? Adok nag. Dakaleiwags nises mamagina, wanmugwana bitakatiga̱nes gamag, va̱gan kid bitakakins ansinap o nawotet ama̱wan; ikous, mo bweina bitakaleiwags.”

52 Iweis tasiyas, ilansa, “Adok ya̱koum-vak gum-Galiliy ya̱koum! Kunev Bukitab wanuwan; ta-kweitan palopit bisap Galiliy waseg.”

53 Ikous, gamag tatanok tatanok mo inineis wasibwan tatineis.