1-2 Siva̱tan tut, Sa̱bat waseg, Yeisuw in beikams son guyaw teitan, mtowen Palisiy. O takatoun towena, won bo ilelol. O tasiyas Palisiy ikinbunikes Yeisuw, bivag takatoun beibwein, o nag.

3 Yeisuw idibakes tasiyas tassinaps sisiyas tasiyas Palisiy, ilana, “Tab kadilok bitavag beibwein Sa̱bat waseg, o nag?”

4 Tasiyas gog isesus-wan ikika̱pays. Yeisuw mo ivag ibwein; ikous, mo ilana, “Bweina kunoun.”

5 Mo idibakes tasiyas, ilana, “Tage yakamiy, kukin a̱leim mwanatan bikalivatow bein wa̱leg Sa̱bat waseg, adok donkiy, o bulumakaw, adok bukuyous ne? Sa̱bat waseg, bukunup, bukusem wanakaew?”

6 Tasiyas iliganes. Ta-ma̱wan bikatimapus aygan towen nilivan.

7-9 Yeisuw ikines gamag mwasanin imeis silma̱nin sagal, mo sivines guyawaw abes wanakaew. Yeisuw ikines, mo ikabebay, idibakes, ilana, “Bukun silma̱nin veivay sigeilin, awoum kusin guyaw a̱ban waseg. Adok guyaw avakaein beim, mo tanuwagan bidibakeim, bilana, ‘Guyaw a̱ban towen. Kum, kusin watinow.’ Ammwasin, mo bukubus bukun watinow.

10 “Tage bukun wasagal, kadiloka kusin watinow. Wankuyeim tanuwagan beim, adok bidibakeim, bilana, ‘Gwa, kum kusin wanakaew, a̱bam towena.’ Mamagina bukumliguyaw wamtes simwayas tasiyas takamsagals.

11 “Kukin kal sivinan bimliguyaw mo beibus bein watinow; tage kukin kal biseib tatonen igaw mo biguyaw.”

12 Peinan tanuwagan sagal nidow Yeisuw im silma̱nin sagal; o Yeisuw bo idibek, ilana, “Igaw bukusagal, awoum kudawes veiyom babaw, o taliwom o simwayas guyawaw mwasanin. Peinan tasiyas bisagals mo bidaweims yak mo bimapus.

13-14 “Tage ya̱koum bukusagal, kudawes tasiyas tasimavs, o tasiyas toupams sisiyas takagayals, o tasiyas toukwaws, mo bukumwa̱saw. Peinan tasiyas ta-ma̱wan bimapus. Igaw anatut tadidumwals beikits vayuwein mo maysan bukuban.”

15 Nisinis sagal waseg, son teitan iligen, mo idibek Yeisuw, ilana, “Kukin kalisiy beikams Yowbad nakabkaleiwag wanuwan, singay bimwa̱saws tasiyas!”

16 Iw to Yeisuw, ilana: Tamwey teitan inasagal avakaein, bidawes gamag babaw bimeis.

17 Kan ikatineg ikous, mo idibakes natouwats, ilana, “Kukines tasiyas nadawes, kulansa, ‘Kumeis, tamwey bo ikatineg kaeimiy, kumeis kukwams.’ ”

18 Tage asibabaw ipiyaves. Teitan ilana, “Bo agimwel pwepway kweitan, bo ban akin; adok awoum ban wasagal.”

19 Tayuwein ilana, “Bo agimwel bulumakaw sinawatan, va̱gan bibteilis plaw kweinim. Bo ban ayakwanes mwanay mwanay bibteilis; babiweis sinawatan mansiyas bulumakaw; adok awoum ban wasagal.”

20 Tatounun ilana, “Bo a̱vay soug gunakwav. Ta-ma̱wan baw.”

21 Natouwat iyum idibek natovek, ilana, “Bo ipiyaves, babaws.” Natovek iligen, ikavikun, idibek natouwat, ilana, “Nuwanaw kun ven babaw wasigeis kukines tasiyas tasimavs, toupams, toukwaws, takagayals, kudibakes bimeis ikams.”

22 Natouwat ikanow aygan, in ivag ma̱wan, mo iyum, idibek natovek, ilana, “Bo adawes tasiyas nimeis beikams, tage gamag nag mana̱nan.”

23 Iwa̱ge natovek, ilana, “Kun ked babaw wasigeis, kun-o wanawoud kuba̱nes gamag, kwabutus bimeis, ikams. Kadiloka gunbunatum bika̱lawt.

24 “Mounid adibakeim tasiyas wanamug nadawes nag beikams gunsagal.”

25-26 Siney Yeisuw singay babaw gamag ibukunis. Itouvin, idibakes, ilana, “Kukin kal yak bukumlavag gunavamul, kadiloka kupiyev tamam, inam, mukwav, nitum, budam, nimut, o mwamovam tatoneim, mo bukumlavag gunavamul. Kukin gog nag, bo nag.

27 “Kukin nag tatonen bikow anklos, ma̱wana bibkunig, mtowen nag gunavamul.

28 “Kal yak bukuwlul bunatum bunaveiyov, adok wanamug bukusin, kunuw maysan, kadilokeim? o nag?

29-30 “Kukin nag bukunuw maysan, adok kwativtow kakol, bo misinak. Peinan mumoney bo ikous. Tasiyas bikines mo bisiba̱weims, bilansa, ‘Taw towen biwlulay nabunatum, tage ta-ma̱wan biyakous.’

31 “E, kuninuways guyaw teitan siney natakanaviy bikanaviys wasigeis tayuwein guyaw siney natakanaviys; adok wanamug bisin binuway, nanon bilana, ‘Guyaw towen natakanaviys sinawey tawsan, o yey guntakanaviys sinawatan tawsan; adok kadilokeig batagagay wasigeis? o nag?’

32 “Kukin nanon adok nag kadilok, o tayuwein guyaw siney natakanaviy nimimeis kadiveiyov, adok mo bikayeb nagamag mwasanin bikines guyaw towen bilivans va̱gan bibwabwes kanaviy.

33 “E, kadiloka kupiyaves mivavag babaw mo bukumlavags gunavamul. Kukin gog nag, bo nag.

34-35 “Sol magat yayan, bwanabwein. Kukin gog nag, ta-ma̱wan bisabal. Sol towen kalbaleb nag bileb bag; nag ivag nawotet. Deisa talev. Yakamiy tigamiy sam bweina kuliganes.”