1-2 Iliganes anilivan, tasiyas babaw itamanaws, itokes Yeisuw, inawes Paylat waseg; mo iyateles, ilansa, “Yakamey min-Yudiy yakamey, o taw towen bimgwayem ked kalbaleb waseg. Nakaligen anilivan, ilana, ‘Awoum kutams Sisal nata̱kis waseg.’ Peinan ilana, ‘Yey Kelis, king yey.’ ”

3 Paylat ikatugan, ilana, “Ya̱koum min-Yudiy siking ya̱koum, ne?”

Iwa̱ge Yeisuw, ilana, “Nukulivan ma̱wan.”

4 Paylat mo idibakes tanuwgwes lun situwa̱veks sisiyas gamag babaw, ilana, “Nag kweitan aban ansinap kalbaleb.”

5 Singay gog illivans, ilansa, “Bo ikabiyun gabman nakaleiwag. Ikatimlakes gamag ma̱wan. Bo isilamaw Galiliy o ven babaw Yudiy ikous, mo im ven towen, waseg anilivan towen kalbaleb.”

6 Paylat iligen asilivan, ilana, “Tage taw towen gum-Galiliy, ne?”

7 Ilansa, “Oo!”

Paylat ilana, “Elod takaleiwag ven Galiliy waseg, kadiloka kunawes binek Elod; mtowen bikaleiwag.”

Tut gog towen Elod nises Yelusalem. Paylat ikayeb Yeisuw, binek Elod va̱gan bikaleiwag.

8 Elod ikin Yeisuw neim, imwa̱saw, peinan tut kadiveiyov sivinan bikin Yeisuw. Bo iligen bulagan Yeisuw, tage sivinan bikin kweitan nawotet tawtoun.

9 Ikatitugwan waseg Yeisuw ee... bo nag. Nag ikatimop anilivan.

10 Tasiyas tanuwgwes lun sisiyas takatimlakeins kaleiwag itomos, singay iyateles Yeisuw, asilivan tawtouna singay.

11 Elod siney natakanaviy iyagages Yeisuw peinan ikasigumis, o issiba̱wes. Ikous, mo isekes Yeisuw anakweim mwaynamnabwein bisikam, peinan isiba̱wes. Ikous mo Elod ikayeb beiyum binek Paylat.

12 Yam towen Elod imwas son Paylat, peinan kweiboug kavikun son.

13-14 Paylat mo idawes bimeis tasiyas tanuwgwes lun, sisiyas takalleiwags, sisiyas min-Yudiy babaw. Imeis mo idibakes, ilana, “Nukumeyes taw towen, kuyateles, kulansa, ‘Imgwayem ked kalbaleb waseg, va̱gan bakakabiyun gabman nawotet.’ Wamtamiy bo nakatigan, nag kweitan ansinap kalbaleb aban ma̱wan nukuliva̱nes, nag.

15-16 “Wankuyeim mo akayeb inek Elod, o Elod nag kweitan iban ansinap kalbaleb, nag; mo ikayeb vayuwein iyamnavaw; o nag kaban ansinap kalbaleb. Nag ivag silawun bitakatimet gamag towen. Misinaka bawaweiy vatul waseg mo balik binoun.” 17 (-)

18 Iweis min-Yudiy tasiyas, iwaks, ilansa, “Awoum kulik taw towen, kwatimet-wan! Kulik Bala̱bas beim.”

19 Mtowen Bala̱bas nises wa̱deil peinan bo ikabutus gamag ven towen waseg mo ikanaviys wasigeis gabman natakanaviy, o bo iweiy gamag mwasanin.

20 Vayuwein Paylat mo iliwon, idibakes tasiyas, sivinan kid bilik Yeisuw, binoun.

21 Tasiyas gog iwkuwaks, ilansa, “Kwatikavates waklos beimat.”

22 Sivtounun idibakes, ilana, “Aveiyag wawun bitaweiy? Aveiyag ansinap kalbaleb? Nag aban ansinap kalbaleb va̱gan bakatimet. Misinaka bawaweiy mo balik binoun.”

23-24 Tasiyas gog min-Yudiy singaya iwkuwaks, sivines kid bikatimates Yeisuw. Avakaein ages iwkuwaks ee... bo itawtoun asilivan; Paylat bo iwnatout, mo itam.

25 Ilik taw towen nikabutus gamag silma̱nin naviy waseg gabman, tawa̱yin gamags mtowen Bala̱bas. Bo ilik, peinan gamag sivines. Tage Yeisuw itam silma̱nin ninous tasiyas biva̱ges.

26 Itokes Yeisuw, inawes, iyousis gum-Saylin mwana meinoy wanawoud neim, isekes Yeisuw anklos, tatonena ikew. Yeisuw imug in, gum-Saylin mtowen wankuyeim.

27 Gamag singay babaw ibukunis, o vinay mwasanin ivva̱lams-wan, peinan beiweiys Yeisuw.

28-29 Yeisuw itouvin idibakes tasiyas ilana, “Vinay-nen Yelusalem yakamiy, awoum kuva̱lams peinan beiweigs, kuva̱lams pinamiy simiyas nitimiyas. Peinan tut kalbaleb bukulivatus, mo gamag bilansa, ‘Tasiyas vinakal bwein, ta-ivag nitsiyas, nag ikakuda̱poms, nag ivsasus pwa̱pwaws.’

30 “Tut towen waseg gamag bidibakes koy, bilansa, ‘Kugiyeil kum kudibwanim’; peinan biwenes Yowbad. E, tut singay kalbaleb bukulivatus.

31 “Yey toubwein mamagina kay mwamov, bo iyagageigs yey, o yakamiy ma̱wana kaligweg nimta̱mats tasiyas bo biyagageimiy singay.”

32 Tasiyas takanaviy bikatimates-vak takalbalebs asteiy. Sisiy Yeisuw inawes bikatikavates wasklos.

33 Inawes ineis ven yagan “Busabwes,” mo ikatikavates naman kaken wanklos waseg, mo kativtawes klos akiwen, Yeisuw bikayagweg ee... beimat. Takalbalebs ma̱wan inuwakes, teitan wanaka̱tay, tayuwein wankimaw.

34 Yeisuw ikayagweg wanklos, initoug waseg Yowbad, ilana, “Tamag, kuwid asisimap kalbaleb, kunumlev. Peinan sikalbaleb niva̱ges nag ikakins.” Mo ikalawages anakweim; makava ilaves kweitan youd bikines kalisiy bikawes asikweim tatanok tatanok tasiyas.

35 Gamag babaw itowas ikikines, tage astakaleiwags isiba̱wes Yeisuw, ilansa, “Bo ikatinob gamag mwasanin; bweina bikatinob tatonen, magat mtowen Yowbad angamag Kelis.”

36-37 Tasiyas takanaviys-vak isiba̱wes, imimeis bisekes wayn yayan, ilansa, “Kukin ya̱koum min-Yudiy siking, kadilok kwatinabweim tatoneim.”

38 Anklos wakunuwatan bo ileles silawun neiweiys, mamagina: “Mtowen min-Yudiy siking.”

39 Takalbaleb teitan nikayagweg wanklos, iyeg Yeisuw, ilana, “Ya̱koum Kelis ne? Kwatinabweids simey ya̱koum.”

40-41 Tage son ikan, ilana, “Adok nag kugoul Yowbad, peinan neiweim bukumat ma̱wana taw towen. Ya̱kid aditeiy kadiloka bitamat peinan adsinap kalbaleb; tage taw towen nag ivag ansinap kalbaleb.”

42 Mo idibek Yeisuw, ilana, “Yeisuw, igaw bukusilamaw mukwaleiwag, kadiloka bukunuweig yey.”

43 Iw to Yeisuw, ilana, “Mounid adibakeim nagein bitasin ven bwanabwein waseg, yey soug yak.”

44-45 Bo yanay mo iladadub wadaban pwepway; ka̱las nag imiteil ven ee... itageg ka̱las mo ikamnat vayuwein. Maynawen kweim mwaynavakaein nisilbwed palakakit Yowbad wanbunatum mo iksigeb, ivag mwayney.

46 Yeisuw mo iwak, aygan avakaein, ilana, “Tamag, kululuwag kukow.” Ilivan ikous, mo ikanig.

47 Takalikay towen nikakin mo iya̱kawn waseg Yowbad, ilana, “Mounid taw towen tadidumwal.”

48 Gamag babaw nikatuyouns ikikines ikous, mo iyums ineis wasiven; iwaways wavtakous, peinan ninous igeg.

49 Yeisuw taliven nitowas ikikines, sisiyas vinay tasiyas nibukunis Yeisuw Galiliy waseg mo nimeis Yelusalem.

50 Gum-Alimatiy teitan yagan Yosep, inaven Alimatiy wawnuwan Yudiy. Mtowen Konsel teitan, ansinap bwein, didumwal.

51 Nag itam va̱gan bikatimates Yeisuw, bikayus kid; bo nag. Mtowen ikayamat Yowbad nakaleiwag asina̱vin beim.

52 Mtowen Yosep inek Paylat, initoug won Yeisuw silma̱nin bikow binow bidibwen.

53 Itam Paylat. Mtowen Yosep in mo inibwis Yeisuw, ikawes inawes, isumweilis kweim pwapwa̱kaw, isenas wanuwan alawag, mamagina takunumwan nitateiys koy dakul waseg. Takanigs nag idibwanis kweiboug wanuwan alawag towen, peinan kweivaw mwana nitateiys, mo itakus Yeisuw alawag towen waseg.

54 Yam towen ikatunags silma̱nin sagal nubweig, bo beiyam nubweig Sa̱dad, min-Yudiy tasiyas siSa̱bat.

55 Vinay-nen Galiliy siyas nibukunis Yeisuw nimeis Yelusalem, bo ikikunis Yosep, ikines ama̱wan inuwek, Yeisuw isen wakalawag, mo iyums, ikatinages tagon simasim va̱gan won Yeisuw biptumis.

SiSa̱bat iyeiwas, peinan Moses nakaleiwag ma̱wan. 56 (-)