1 Youd singay tawtoun mo akin walba̱lab, mamagina na̱tan vin anakweim ka̱las; tibukon nises waskawan kaken; o wakunun anapay wutun sinawatan kweiy.

2 Vin mana̱wen kakuda̱pom, nuwan igidaged, ivva̱lam avakaein peinan bo itup; sivinan kid bitapouy naman.

3 Tawtoun youd kwayuwein mo akin walba̱lab, mamagina man avakaein, bwabwel won, kunun kweinim kweiy, anadog sinawatan, anapay tanmunum kweinim kweiy nisenas wakunun kweinim kweiy.

4 Yayun itaneiv liba̱lab palatanok waseg, wutun ikalka̱louws inineis ven watinow. Tage walba̱lab paley nisesus bwein.

Man towen itamanaw itom wamatan vin mana̱wen nitup; igaw bitapouy naman mo beikoum natun.

5 E, mo ikop natun kuda̱taw; igaw bivakaein, nakaytuk tanmunum wanaman mo bikaleiwag ven babaw wasigeis. Tage Yowbad ikow inow a̱pwaw towen, imwen inek Yowbad, nakabsis wamatan.

6 Mana̱wen vin mo isawl in wanawoud, nisik ven towen Yowbad nikatigik naven, mo ivakam yam lakatunim lakatunim lakatuy sinawanim sinawatan wasigeis.

7-9 Mo isilamaw naviy walba̱lab. Anelos towen Maykel sen nataka̱yobs ikaninaviys sisiyas man towen bwabwel sen nataka̱yobs; tage bo ikous sitawtoun, bo ikous siven walba̱lab waseg, peinan bo ilaves man towen avakaein, in watoulan, mtowen mwatet kweiboug nises, yagan Bwagaw o Seitan, nikatidavis ven babaw gimgilis; e, mtowen ilaves in ven watinow siney nataka̱yobs.

10 Mo aligen teitan walba̱lab, aygan avakaein, ilana, “Tut towen Yowbad bikaleiwag, natawtoun waseg bikatinabwes nagamag; o Kelis bo ikow nakaleiwag tonen. Bo igulek nakaleiwag towen nivtokes livan sidayas tayekelesiys, peinan nivtokes livan wamatan Yowbad, yam katanok katanok waseg o boug kakanok katanok waseg. E, bo ikous nakaleiwag mtowen takalbaleb.

11 “Tage sidayas tasiyas isimounids waseg buya̱vin La̱miy niwta̱wout pines; liva̱nen La̱miy illivans; o nag ikayuses mwamoves tatineis. Asisinap ma̱wan mo itakayways waseg man towen.

12 “Mapuna kumwa̱saws liba̱lab waseg, misikena gimgilis yakamiy; tage bukuva̱lams yakamiy wadaban pwepway o wa̱yol, peinan Seitan ikalivatow, biwekeimiy, kapasal nuwan, peinan ikakin inatut nuwanaw mo beikous.”

13 Man bwabwel ikakin ikalivatow in wadaban pwepway, mo ikawsep vin na̱wen nikop natun kuda̱taw.

14 Tage Yowbad isek vin bunibwan pinpenen paley kavka̱vek, va̱gan beiyow bein wanawoud wanven tatonen, mo bivakam bweilim kweitoun kwavasin watapwan-wan, wanven towen; mwatet awoum biyous.

15-16 Mwatet mo igus wadon sipinen mamagina bilateg avakaein, va̱gan kid binek vin biyatuwen; tage pwepway ileb, pwepway ikaliyow wadon ikanpwen yevagam towen man nigus wadon.

17-18 Man towen bwabwel mo ikawkun vin, inoun in va̱gan bivvatays siney vin nitun tasiyas nisesus, tasiyas gog takanaweins aygan Yowbad o takaweins liva̱nen Yeisuw; e, man towen mo itamanaw iton wakawalaw.