1 Diiꞌ niiꞌmaikororiꞌ ooveriko, tee beroveeroꞌ niiꞌke beeroꞌdarampikoꞌnung tamunsiꞌnung deeaꞌ, teka teie tee sinang nkavuuꞌnung. 2 Diiꞌke noruꞌeri otong niiꞌ tee Pilipai-namono-koo bakei orakaꞌ nkomaarikoꞌ; turamaaruꞌ diiꞌanko mmeꞌ tavoꞌkampiaruko; aaꞌnaꞌ masikaꞌ toraꞌantamaaruꞌ teka. Nka Kumponinge puring-antamurioꞌ nanampira napoꞌ diiꞌ daankirarampiruꞌ tee tampara doorenang, bane napoꞌ aaꞌnaꞌ turamaariko. 3 Niikaang tautau tee boturopa deeaꞌ; napoꞌ bakiaaꞌ nko-koo minkuampiaꞌ; eeꞌnoko aava nkoampiaꞌ niiꞌke. 4 Teeo, Kumponinge tee makosinuka tammurira arooꞌmuri botomuruꞌ tee doorenang tampara bereng-antavampiiꞌnaang. Teeꞌkoo niiꞌke enang siraꞌpampimang Kumponinge niikaang noruꞌ paaramurimaung dotu-anta-koo, niiꞌnung naning dotu-anta-koo deeaꞌ. 5 Diiꞌke tampaꞌ noruꞌmereri otong niiꞌ. Diiꞌkoo kara menaanka minkuampiaꞌ. Eeꞌnoko Kumponinge noruꞌui otong diiꞌ niiꞌke diikaang kapooꞌ okomuriiꞌnaang navurarampiaꞌ niikaang minkunaa dakaꞌpuioꞌ. 6 Eeꞌnoko napoꞌ niiꞌnung naninge daangamuriarooꞌnaang diiꞌkoo, aing-koonge eeꞌnoko niiꞌning-koonge. Aunooꞌ masikaꞌ niiꞌ Karistooꞌ bakaning kara okovuri nkanuka. Niiꞌ pia-koo dei tee diiꞌke niiꞌ daangamerereripeuꞌ. Nka niiꞌke daangang besiꞌampiaꞌ. 7 Tamung kaꞌduumariri oꞌnorikoꞌ diiꞌ ninka, nani toireꞌ tanatavurimai-pinaꞌ. 8 Teeꞌkoo niiꞌke diiꞌ piaararampiri diiꞌ tee doorenang tampara Kumponing-etaing arorompiruꞌ, eeꞌnoko tee narung deeaꞌ, niiꞌ niiꞌka napoꞌ avuꞌkoo makosi-antamarikoꞌ, diiꞌ bakei niiꞌmaikororiꞌ masikeng deentariruꞌnung-koo.

9 Ee mmaikoriꞌ, diiꞌke masikee-antameripeuꞌ, aiꞌ noruꞌeri otong niiꞌ tee bakei aaꞌnaꞌ poreꞌmorikoꞌ iriꞌ oꞌmarima, birenge mintoomarima doong eeꞌnoko muung niiꞌka bauꞌmariiꞌnaang diiꞌ poreꞌantararampiarooꞌnaang taamang tovang-koo, tee doorenang tampara Kumponing-nung daankiampima. 10 Diiꞌ teing niiꞌ niikaning sirasiraꞌ nkonuka, Kumponing napoꞌ teeꞌke, niikaang tare diiꞌkoo baito-nupoong-koo kiiroraaꞌ eeꞌnoko koontoꞌ, tuumpi otoaꞌ. 11-12 Noruꞌeri otong diiꞌke, niiꞌke tee diiꞌ nariꞌ tarerarampikoꞌ teeꞌ biumai toireꞌ tarevurimanaꞌ, tautau ninka domang kuaaꞌantararampiri, dunsirunsi˜antararampiri, eeꞌnoko toꞌbii-antararampiri diiꞌ Kumponing dotu-antanaꞌ otoriiꞌnaang, tee eeꞌnara diiꞌ bokururuꞌnung bakaang muuꞌkoo eeꞌnoko meenasi-koo kuunge otoriiꞌnaang.

13 Eeꞌnoko niiꞌnung kapooꞌkoo Kumponing tampara minkuampimaung: Tenang diiꞌkoo daankiampiko diiꞌke tee kara niikaang-pinaꞌ noruꞌeriarukoꞌnung, teka tampaꞌ taaraverikoꞌ tee kapooꞌ minkuampiko Kumponing bakaang kara-pinaꞌ, teie eeꞌnunge diikaang domang bereꞌantaruruꞌ tenang diiꞌke masikaꞌantaveriko. 14 Eeꞌnoko enang diiꞌ teing niiꞌmaikororiꞌ masikeng otorimaing Kumponing bakaning dootuuꞌnupoong Judiaꞌnameensiꞌkoo otoromaing-pinaꞌ nariꞌ Jiisuuꞌ Karistooꞌkoo kuunge, aiꞌ diikanooꞌnupoonge poreꞌantaraarimaunge Juꞌnupoonge poreꞌantavaarikoꞌnaꞌ biikanooꞌnupoong. 15 Teing eeꞌning tavauꞌning tee Ovoring Jiisuuꞌ eeꞌnoko nakaronuka˜, eeꞌnoko niiꞌ bataꞌmaaruꞌ. 16 Teeꞌkoo Kumponing iira-antavauꞌ eeꞌnoko nantoong ookara tooꞌdempaaruꞌ niiꞌ avoꞌavoꞌmaarima kara nau-koo teing Juꞌ deeaing domamparipeuꞌnung. Teeꞌ nariꞌ nkoaakotaaꞌ orakaꞌnkoi maantoꞌnuka deempariruꞌ. Tee tee enang asiꞌnamuꞌ Kumponing bakaang iira kuneꞌaavaing.

17 Niiꞌmaikororiꞌ ee, niiꞌke tee okiꞌnooꞌ siꞌdarampira birontarampi-kotaaꞌ taung besiꞌampiruꞌ oomeeriiꞌnaang, aaꞌnaꞌ piamorira. Aꞌnooꞌkoo tee noruꞌke siꞌdarampiaꞌ, mono narunge. 18 Niiꞌ tee diiꞌanko toro-koo piamori otong. Baruꞌ ning Paulaꞌ aaꞌnaꞌ mmauꞌnamuꞌpie diiꞌ oo-koo paaravantuꞌ, nka Sietaniꞌke avoꞌavoꞌukoꞌ. 19 Diiꞌ beeroꞌkoo piamorimang diiꞌ duaꞌdariꞌneeng-koo noruꞌampiri, aiꞌ damaꞌke tee niikaang Ovoring Jiisuuꞌ Karistooꞌ toroarara aming-koo tampaꞌ noruꞌmuriaing? Aming-koo mooꞌmurira dotu-antamuriaing-pinaꞌ noruꞌampimaung nempampiri? Tee aaꞌ diiꞌkoo eeꞌning-koo oorurira masikaꞌantaveriko. 20 Diiꞌkoo eeꞌning-koo dotumariri oꞌnorimaung.