1 Ninge tee diiꞌke noruꞌkoo piamoing tee diiꞌkoo ning poreꞌmomanaꞌ diiꞌ pakurampima eeꞌnoko napoꞌ teing-koo Leodesiaꞌnupoong-koo nariꞌ, eeꞌnoko napoꞌ teing-koo nkaang oing mmeꞌ oomaavaing-koo. 2 Diiꞌ diikaang domang kuaaꞌdori otoriiꞌnaang poreꞌmomaung, teie piaae naroꞌka daiꞌduriiꞌnaang eeꞌnoko noruꞌ dupeniiꞌ nkaveriiꞌnaang diiꞌke Karistooꞌ kenkumperiainaꞌ tero Kumponinge makempukoꞌnung pakoꞌpariꞌuuꞌnooꞌketa. 3 Aiꞌ tee ookara noruꞌ eeꞌnoko mataunanka aaꞌnaꞌ tamparananka Karistooꞌkoo kuunge otoko nkaveruꞌnung. 4 Eeꞌnoko ninge teeꞌ naurampimang naninge niiꞌnunge kara menaankai kanuꞌantarurira tosiruriꞌneeng-koo. 5 Aiꞌ ning tee bane isipoꞌ oꞌnong nkaang mono, teka tee nkaang domange punkaantampiri otong. Eeꞌnoko bakei aaꞌnaꞌ dotumaramaung diikaang otootoꞌ tampaꞌ otori mintoontarimaung-koo, Karistooꞌkoo eꞌmaniri baitorariritaaꞌ.

6 Tee tee, diiꞌke tee Jiisuuꞌ Karistooꞌ diikaang Ovoring masikaꞌantaveruꞌnaꞌkoo, teeꞌ nariꞌ tee-koo kuung otoriaing. 7 Eeꞌnoko napoꞌ tee-koo kuunge pinkaꞌdariri ariꞌarurira duꞌduriai, eeꞌnoko tee masikaꞌantaveri pinkaꞌdariri otoriai teeꞌ eeꞌnaꞌ bare-antaraaruꞌnaꞌ, eeꞌnoko aaꞌnaꞌ dotu-eta tampaꞌ tamperimaatoai Kumponing-koo.

8 Diiꞌ tarerariri otoriai, nantoong-etaing daang-koong matau ninka aavaraarima kanuꞌantaraariꞌneenga, aaꞌning ninka toomo eeꞌnoko norunoruꞌnanka kantoꞌpuaing kansiꞌaapening, Karistooꞌ bakanaꞌ nauraariaꞌ. 9 Aiꞌ Karistooꞌ tee niiꞌkoo narung deempari otoi ookara aarumo Kumponing bakaang tee-koo dupearioꞌ otoi otomaung, eeꞌnoko tee tee ookara tanuaananka-koo ovontung-koo dau basi biikaning piatooronuka ninka nariꞌ; 10 Teeꞌkoo diiꞌ tee-koo Karistooꞌkoo kuung porimaing teing kapooꞌkoo apukaꞌdariaꞌ otorimaing Kumponinge diiꞌ baꞌmaikoriꞌ tanturiainaꞌkoong. 11 Aaꞌnoko tenang diiꞌ Karistooꞌkoo poruꞌnang teie tee diiꞌ dopaꞌ totoꞌniiꞌnuka pinaꞌ makosinuka deeng-antaruruꞌ urikung onou orara mono-aapenung totoꞌantarurima, Juꞌpinaꞌ birenge nkonaꞌ deeaꞌ, teka teie Tanuaang-aapenung nko-nkoi. 12 Eeꞌnoko tenang diiꞌ teie ntong-koo minkie meekaꞌantaraaruꞌnang diiꞌ teing Karistooꞌ ninka nariꞌ Kumponinge dakoꞌduruꞌning tee urikung aarumo onoue komperikoꞌning ninka. Eeꞌnoko napoꞌ tee Karistooꞌ ninka nariꞌ daaꞌduruꞌ, Kumponing bakaang iriꞌ tasiꞌperi masikaꞌantaveriko, Jiisuuꞌ booꞌketa daaꞌuuꞌnung-koong. 13 Aaꞌnoko tero mmeꞌ bereꞌdariaꞌ diiꞌ teing tanuaang booꞌnuka otorikoꞌ urikung onou totoꞌdariaꞌ otorikoꞌnung-koo, diikaning orakaꞌ nkonanka ninka daiꞌdariri, teka enang Kumponinge diiꞌ teing Karistooꞌ ninka nariꞌ domanturining eeꞌnoko diikaning orakaꞌ nkonanka tontaꞌderuri ookara. 14 Eeꞌ, Moosesi bakaang botoi niiꞌ orara aarumo-poꞌning booꞌnumpoꞌnuka tammuriko, Kumponinge piaamurira niikaang orakaꞌ nkonanka-koong deeru kuivuuꞌ kara tumpituumpi-koong ninka nariꞌ. Bakei, taapoꞌ tontaꞌura aaꞌbarataꞌkoo taakavuuꞌ. 15 Napoꞌ teie teka maꞌnari-koong ovontung biikaning piatooronuka ninka nariꞌ orari-antavuruꞌ ookara-koo dutakanooꞌka siraꞌantavui, aiꞌ Karistooꞌke biikaang iriꞌ kiruꞌurira tamunsiꞌnuka deeng-antavuruꞌ aaꞌbarataꞌkoo booꞌparuꞌnooꞌke.

16 Teeꞌkoo teinge aava nkonukai Juꞌ biikanaꞌkoo tuumpiraariko taaraverereriaukaꞌ taamang tovang ntong nai dovang-koo, niiꞌnooꞌ doong pankeng-koo aaꞌning-koo: dootuuꞌkooning doong pankeng, kaara neraku dupumanang, eeꞌnoko Doong Uaanaꞌmung. 17 Aiꞌ aing teing tamunsiꞌning uuꞌaaꞌ makosining urikupoong nau-antavurikoꞌning kapooꞌ tavoꞌkuaining-koong, teka enang teing ookara Karistooꞌkoo kuunge dupeniiꞌnanka deemparirioꞌ Karistooꞌ narung tee mono masikung niiꞌke noruꞌkoo makosi.

18 Napoꞌ teinge aava nkonukai diiꞌ dootuuꞌnupoong makosinuka deeaing tantaariko taaraverereriaukaꞌ, aaꞌpaako, “Diiꞌ okiꞌnarekaꞌ Kumponinge taara-koo makosinuka deeaꞌ, bakaning koosinunanka-anko kunsirariko deekoꞌ makosi.” Teing teeꞌ nauraarimaing daang noone-koo ooaamaing-koo eꞌmanaama deravarimaung, eeꞌnoko biikaange monoi noruꞌ orakaꞌ siong-antavurioꞌ tamung boturopa daangamparikooꞌ. 19 Eeꞌnoko teing nantoong teeꞌ oroꞌnuka teing Karistooꞌkoo beꞌnuꞌariaꞌ, tee Boreꞌ niiꞌkoo eeꞌnoko niiꞌ bakaang mono makosinuka. Teie narunge bauꞌuma tanatavuioꞌ bakaang mono pankaꞌparamaung anairu-tenairu karu dovange beꞌnuꞌantavari tee Kumponing bakaang miruꞌ siomparioꞌ.

20 Diiꞌ teing Karistooꞌ ninka nariꞌ dooruꞌning deentariritaaꞌ norunoruꞌnanka kantoꞌpuaing kansiꞌaapening-koo enang daiꞌdariaꞌ otoring. 21 Teeꞌkoo biikaning dootuuꞌkoong botonanka-koo noruꞌ kato siperiaukaꞌ taamang tovang bioꞌ kereng-koong. 22 Teing aing kapooꞌnanka teing tamung namuꞌke paaꞌnumpoꞌ kompampiko, temuriiꞌ boto nantoong-etaning tamunsiꞌning nau-antananka deemparako. 23 Masikaꞌ, oo-koo tee mataunaꞌ oroꞌpari otong boto tampeng-pinaꞌ, teka teinge niiꞌ mono bakaang pia-ita unaa-anta-koo pakumaariarupeuꞌ. Tamung daang dootuuꞌ avutevuꞌanta-kooning, eeꞌnoko baruꞌ boonko noruꞌarama baka mono sisikeera-anta-kooning.