1 Ee mmaikoriꞌ, nantoong mmauꞌ nau-antananka deeng-antarariaukaꞌ, aiꞌ diiꞌke tee noruꞌeri otong niiꞌ nau-antanuka teing deepoꞌ simpeꞌmuriaining. 2 Niiꞌke ookarai amutemuriiꞌke bekoiꞌampimaung kara sikuriꞌke minkuampima, eeꞌnoko naninge karoma kapooꞌ orara minkuvuaukaꞌnung deekoꞌ tee tee naning koontoꞌ masikung, bakaang mono ootukunung tampaꞌ tarearamaung. 3 Napoꞌ tevoroꞌ oosinavoroꞌ deekoꞌ, niiꞌke aini okiꞌnavuꞌ karang-koo dusiꞌampiko tevoroꞌkoo koinampira tee ootukunavoroꞌ niiꞌ piamorimanaꞌ nanukooꞌ tevuꞌ beetoꞌampima botoampipeuꞌnairue. 4 Napoꞌ aarerinanka˜ ooveriai, aaꞌnaꞌ pankenanka, piong purintoꞌke biiꞌurimaing, teing teeꞌke, okiꞌnaventoꞌkoo booꞌe-naventoꞌkoo kaputeninukai koong-antavaarioꞌ nanaamaunge piavoromanooꞌke. 5 Napoꞌ meneng teeꞌke, tee okiꞌnaa kapooꞌ, teka kapooꞌ pankeng nkovuma daangamparapeuꞌ. Poraꞌ pankaing tee okiꞌnamoꞌketa ntaꞌke taivumaung. 6 Tee meneng teie ntaꞌke. Kapooꞌ orarai maantoꞌ mono-koo meuꞌke otomaung. Teke otoi toko-ita doompeto ookara mono orari-antavukooꞌ paroꞌuma mosianung okoraꞌarioꞌ.

7 Ookara kapooꞌnanka amutemuriiꞌ kauꞌ karenaumo eeꞌnoko barennanka napoꞌ kakanaamaunanka eeꞌnoko pirung-koonanka teing data-anta-koo makosi; data-antavaarimaung nantoonge. 8 Teka naning otoaꞌ meneng data-antavupeuꞌnung, tee dooroompari otoꞌ deeaung, orara, eeꞌnoko booꞌkooninge doparopai maantoꞌke. 9 Teie narunge menenge niiꞌke Kumponing tee Niuma tampara tampampimaung eeꞌnoko napoꞌ teie narunge menenge nantoong barakosiꞌarampikooꞌ, teing Kumponing-pinaꞌ oroꞌantavuri nkovuruꞌning. 10 Teka tee narung karang-eta tampaꞌ minkuampikooꞌ; napoꞌ barakosiꞌ minkuampikooꞌ. Ee mmaikoriꞌ, teeꞌ makosinaꞌ deeaꞌ. 11 Arekeeꞌ tee puꞌanta, dinkung narinkung-eta ntong tariiꞌ eeꞌnoko ntong tokaaꞌ naroꞌke bakoarepeuꞌ? 12 Arekeeꞌ, mmaikoriꞌ, tuare-navari-koo ee mou-koong sinang biꞌupeuꞌ? Napoꞌ moꞌming-naving-koo ee bia-namoniꞌ teke biꞌupeuꞌ? Makotuaꞌ. Napoꞌ pirung-eta ntong tariiꞌ nkeꞌkoo makosi deeaꞌ.

13 Baa naning matau eeꞌnoko norukasiꞌ diiꞌkoo? Makosi, tampaꞌ otoi tee bakaang matau oroꞌantavuaing mataunaꞌ dooroompari tampaꞌ nkovuma. 14 Teka diikaang domang-koo mamairo eeꞌnoko pankaing-pinaꞌ noruꞌ otoko deekoꞌ, diiꞌ matau-poꞌnupoong-pinaꞌ daangantarima kara masikung dakaꞌperiaukaꞌ. 15 Teeꞌ oroꞌ noruꞌnanka teing paning-eta poaꞌ, teka teing aing kansiꞌkooning noruꞌ; Tanuaang Meekung-etaning deeaꞌ, Sietaniꞌketaning. 16 Aiꞌ areꞌ tokoo mamairo, baka-noruꞌ, eeꞌnoko pankaing-pinaꞌ noruꞌ oroꞌparavainooꞌke teke turang otong eeꞌnoko amutemuriiꞌ orakaꞌnko otong. 17 Teka tee temuriiꞌ noruꞌ matau paning-etaing tutunaꞌ tee pituari otoꞌ deeaung, teketa mooa-anta, banainge otoꞌ, noruꞌ barorompari otoꞌ, piaae maantoꞌ, eeꞌnoko niiꞌning sinang tampeng, siivenkeꞌari noruꞌ otoaruko, ampirinung dovang nariꞌ. 18 Eeꞌnoko teinge mooa nkonukai tee mooa-koong sinang keempaakotaaꞌ tee koompari otoꞌ sinang kavaavaing.