1 Enang ooveriko diiꞌ kavo mmauꞌpoꞌnupoong, enang bairarima birontariaing arikananka kuneꞌeriaining-koo. 2 Ookara kapooꞌ diikaning teing deraꞌoroaining eeꞌnoko diikaning mononopaꞌnanka pumpuꞌke taiaavaininge. 3 Eeꞌnoko diikaang kooro eeꞌnoko silivaꞌnanka takarauꞌoroaing, eeꞌnoko teie takarauꞌnooꞌke tee diikaang mosiiꞌ siraꞌduriko toraꞌkiriaing ntaꞌke kateꞌduring-pinaꞌ. Diiꞌke tamung oosierimaung-koo teinankai tuumpiruriaing asiꞌnaꞌmung Ovoringe simpeꞌ nkovuko. 4 Ooveriko, teing diiꞌkoo mintoomparimaing mintoong daakaꞌderaariko tosiererima mooꞌ pinkaꞌevurererikooꞌ, eeꞌnoko tee eeꞌnara mooniꞌ bakuꞌerimaung Ovoring Iirakuta-koo punkang-koo biromparamang, teing kavuꞌnupoong biikaang birovirong ninka. 5 Eeꞌnoko diiꞌ teing nantoong koontoꞌnuka tuutunampererima dupisiꞌerererimaing biiꞌka avoꞌavoꞌdaariaruko; 6 Anke kansiꞌkoo otoritaaꞌ tee diiꞌ ookara kapooꞌnanka piarorimaing otoꞌderurimaung, eeꞌnoko teing-koo doturarima otorikooꞌ Ovoringe tuutunanturima mosianung-aape botoruriainaꞌmung nemperi, pooroꞌ pinaꞌ tamung doreng-antavarima teꞌmung domang tampeꞌaariainaꞌmung nempaamanaꞌ.

7 Teeꞌkoo, ee mmaikoriꞌ, teinge teeꞌ orakaꞌ nkoraariko miiꞌkiri otoriai poainaꞌmung nemperi. Ooverimang tee naning mintoong bauko sinang petaaꞌoainooꞌ nempui kaꞌduuari otomaung tee taamang tampara kansiꞌketa nkavuainaꞌmung noruꞌui. Tutuntoma-ita bera oꞌdomai basi tampaꞌ tarevumaung. 8 Diiꞌ teeꞌke, imaꞌdariri kaꞌduurariri otorimaatoai, aiꞌ Ovoring poainaꞌmung tee doong dueꞌuing. 9 Minkuminkureeriaꞌ otoai, ee mmaikoriꞌ, tuumpiruriꞌneenga. Ooveriko, tee Simpeꞌnko˜ tee karanaang-koo donkonui otong. 10 Ee mmaikoriꞌ, teing urikupoong nakaro-nupoong˜ ioꞌ oovereriaing, tee Ovoring bakaang miring ninka kareaakoꞌning. Teinge arikung kuneꞌaama kaꞌduuariri otorokoꞌnaꞌ tampaꞌ tasiꞌperira siomperiaing. 11 Enang noruꞌereriaing, teing turampaariko domang tampaꞌ nariꞌ otorokoꞌning biraankenuka tamparampimaing. Narung tee Jop, bakaang domang maamuari otokoꞌnaꞌ taaraverimaunge amutemuriiꞌ mankiꞌanta ninka, eeꞌnoko teeꞌ Ovoringe tampaꞌ botu basi-antavuuꞌnaꞌ tasiꞌperi otong. Teie Ovoringe niiꞌ napoꞌ teeꞌ nkomurimaung piaae maantoꞌ deemparitaaꞌ.

12 Ee mmaikoriꞌ, ookara-koo daua eeꞌ noruꞌeriai, oꞌnori marakamariaꞌ otoai paning-aape eeꞌnoko kansiꞌaape niiꞌnooꞌ niiꞌning kapooꞌ tampampima, teka masikung deekoꞌ tamung “eeꞌ” tamperiai, eeꞌnoko masikung deeaung deekoꞌ tamung “a” tamperiai, tuumpi kuneꞌeriꞌneenga.

13 Diiꞌkoo niiꞌnung mankiꞌ kuneꞌumaung deekoꞌ kunsiaravaing. Napoꞌ niiꞌnung domang kuaaꞌoi otoꞌ otomaung deekoꞌ Ovoring kenavuma daangampuaing. 14 Napoꞌ diiꞌkoo niiꞌnung siipavomaung deekoꞌ dootuuꞌkoo urantanuka-koo botoaravaing, eeꞌnoko teinge tee kunsiaavaing duunie sisiꞌaama Ovoring bakaang miring-koo. 15 Eeꞌnoko baitoariri kunsiariko Ovoringe domampura deto iꞌampuai tee. Eeꞌnoko orara nko-nko nkovuuꞌnung deekoꞌ tontaꞌantavevuai. 16 Teeꞌkoo diikaang orakaꞌ nkonanka sirasiraꞌdarimatoai niiꞌning diiꞌmaikororiꞌkoo. Eeꞌnoko napoꞌ kunsi-koo pakureerimaatoai taarevoroainaꞌ. Aiꞌ tee kunsi naning koontoꞌ bakaang tee aaꞌnaꞌ purintoꞌpoꞌnung kapooꞌ nko-koo. 17 Eliasi tee naning teeꞌ oroꞌ niiꞌpinaꞌ bakaang aarumo, niiꞌnaꞌmung tee aaꞌnaꞌ kunsiaruꞌ apoꞌuarooꞌnaang beenaumo mareꞌkoo bera ˜nau-taa kaara, eeꞌnoko teeꞌ nariꞌ apoꞌuaruuꞌ kansiꞌ. 18 Teketa napoꞌ damaꞌke kunsiarioꞌ paning-eta apoꞌ pouꞌ, eeꞌnoko kansiꞌke bakaning sinananka tavoꞌantavuruꞌ.

19 Ee mmaikoriꞌ, diiꞌkoo narung tampara aarumo sipui pooarako deekoꞌ, narunge koong-antavuaing tee. 20 Noruꞌeriaing, baa tee naninge tee pooaruꞌnung koong-antavuaing teie tee bakaang tanuaang booꞌparapeuꞌnooꞌketa domampuing. Bakaning mmauꞌ orananka tontaꞌaravaing deeng-antavuing.

Basi teꞌ.