1 “Tanatarariaing diiꞌ. Dootuuꞌkoong aarumo tampara nkoverima nantoong-koo dutakanooꞌke nkoveriaukaꞌ teinge ooraariiꞌnaang. Teeꞌ nkoveriaing deekoꞌ tee, teie Diumai paning-koonge mooꞌ aruriaukaꞌnung. 2 Aaꞌnomaatoai tenang teing ataꞌoinku averererima deekoꞌ tee-koo tuuviri puumperiaꞌ otoai teinge ampirinunukai nkoaamanaꞌ pava dootuuꞌnanka-koo eeꞌnoko napoꞌ taung sionairu-koo maroita nantoonge pankaing-antavaariiꞌnaang. Ninge masikaꞌ naurampimang, teinge tee biikaang mooꞌ ookara teka nkavaamaung. 3 Teka tenang diiꞌke teing ataꞌoinku averererima bakuꞌeri nkoveriai kapooꞌ tampanaange nkovuaing mareꞌanaange noruꞌuaukaꞌ; 4 Eeꞌnoko teie Diumai kapooꞌ bakuꞌniiꞌ oovumaunge sirapoꞌke mooꞌduriai diiꞌ tee-koo.”

5 “Tenang kunsirarima teing-pinaꞌ ampirinunuka-pinaꞌ nkorariaꞌ otoai. Pava dootuuꞌnairu-koo eeꞌnoko taung sionairue donkonai kunsi-koo aaꞌnaꞌ piavoromaing-pinaꞌ nantoonge ooaariiꞌnaang. Ninge masikaꞌ naurampimang, teinge tee biikaang mooꞌ ookara teka nkavaamaung. 6 Tenang diiꞌ kunsirarima diikanavaro-koo avoꞌniiꞌnavaro-koo tuntarima karanaang daꞌperima kunsirarimatoai tee-koo Diuma-koo naninge oo-paaꞌkoo, eeꞌnoko teie Diumai kapooꞌ bakuꞌniiꞌ oovumaunge sirapoꞌke mooꞌduriai diiꞌ tee-koo. 7 Eeꞌnoko tenang kunsirarima kara putuꞌeriaꞌ otoai teinge mutaanang-koo-nupoonge nkoaamanaꞌ aaꞌpaama, ‘Mmauꞌ kara-koo taaramuriainaꞌ.’ 8 Koontoꞌ teing-pinaꞌ nkorariaukaꞌ, aiꞌ teie Diumai tee noruꞌumaung teing kapooꞌ diiꞌ apukaꞌdarimaing tutung eentaveriaruko tee.

9 “Kunsirarima eeꞌ kunsirarimatoai, ‘Niuma paning-koo otomaung, dakaang miring meekaꞌantavari otoaing. 10 Dakaang muuꞌ poꞌantaveai. Dakaang pia nkoaravaing anke kansiꞌkoo paning-koo nkoaramanaꞌ nariꞌ. 11 Eꞌmung-koo makosinaꞌ ameriai tee taamang doong kante amerimaung. 12 Tontaꞌantameriai niikaning orarananka niiꞌ orakaꞌ nkomaarimaing tontaꞌantaevorompimanaꞌ. 13 Eeꞌnoko parapaara-koo siꞌmeriaukaꞌ, teka tontaꞌantameriai teieta naning orara bakaang purintoꞌketa; aiꞌ daꞌ tee ookara-koo okorui tarenumpoꞌ, purintoꞌpoꞌnung, eeꞌnoko meenaꞌdoi otomaung ookara doong-koo. Teeꞌ eeꞌnaꞌ.’

14 “Aiꞌ diiꞌke nantoong tontaꞌantavereriko teing diiꞌ orakaꞌ nkoraarimaing teie Diumai paning-koonge diiꞌ teeꞌ nariꞌ tontaꞌantaruriainge. 15 Teka diiꞌke tontaꞌantavereriaruko nantoong teing biikaning orakaꞌ nkonanka-koo teie Diumai tee tontaꞌantaruriaukaꞌnung diikaning orarananka-koo.”

16 “Tenang diiꞌ unkumorarima munteꞌdorining-pinaꞌ oroꞌdariaꞌ otoai teing ampirinunuka nkoarimanaꞌ, aiꞌ teing teing oing orakaꞌ oroꞌantavarimaing maroita unkumoaririning taaꞌniꞌantavarima. Ninge masikaꞌ naurampimang, teinge tee biikaang mooꞌ ookara teka nkavaamaung. 17 Teka tenang diiꞌ unkumorarima oing duuꞌdarimatoai boreꞌ duunie sisiꞌdarima nantoong-koo diiꞌ unkumoraririning-pinaꞌ oroꞌdariaukaꞌnaꞌ; 18 Teka tee narung-koo Diuma-koo naninge oo-paaꞌkoo deekoꞌ siraꞌdariri otoriai eeꞌnoko teie Diumai kapooꞌ bakuꞌniiꞌ oovumaunge sirapoꞌke mooꞌduriai diiꞌ tee-koo.”

19 “Aꞌ kansiꞌkoo kapooꞌ tampeng kavonanka oosieriaꞌ otoai teꞌ pumpuꞌ dovange eeꞌnoko takarauꞌ aaꞌninge orariaamanooꞌ, napoꞌ bakisipunankai pesiꞌaama bakiaaꞌaamanooꞌke. 20 Teka paning-koo mooꞌ tampeng oosierimaatoai teꞌ eeꞌnooꞌ pumpuꞌ dovange eeꞌnoko takarauꞌke orariaavarupeuꞌ, napoꞌ bakisipunankai pesiꞌaama bakiaaꞌaavaꞌnooꞌke. 21 Aiꞌ teꞌ tokoo naning bakaang muuninava˜ otoainooꞌ bakaang pankaruntoonge noruꞌ tee teꞌ otoaing.

22 “Domang tee duta pinaꞌ, tee diikaang mono bakaang puu. Tenang diikaang duta tampara deempari otoko diikaang mono ootukunairu arakai maantoꞌui otopeuꞌ. 23 Teka duta tampara deeaung deempari otoko diikaang mono mutaanange maantoꞌui otopeuꞌ. Teeꞌkoo tee diikaang domang mutaanang-nameng-koo otoko deekoꞌ bakei aaꞌnaꞌ masikaꞌ mutaanantoriaining.

24 Narunge kenaanka ovontura siompurearupeuꞌ, aiꞌ teie tee narung munteꞌuma niiꞌnung piaavumatopeuꞌ, niiꞌnooꞌ narung siompuma niiꞌnung siompuarupeuꞌ. Teeꞌkoo diiꞌke Kumponing eeꞌnoko kavokavoro ookeng deto deeng-antaveriarupeuꞌ.

25 “Teeꞌkoo ninge naurampimang diiꞌ, noruꞌ mankiꞌdoriaꞌ otoai aaꞌning-koo taamang tovang ntong domanturiaining eeꞌnoko mononopaꞌnanka. Aming-koo, nnaꞌ, domaang tee taamang-koo biꞌari otoaꞌ eeꞌnoko mono tee baarong-koo ioꞌaravaꞌ. 26 Oovereriai teing barennanka auviꞌau-kooning. Teing teing kapooꞌ keeng noruꞌaavaꞌ, kavaama oosi noruꞌaavaꞌ, koreꞌ noruꞌaavaꞌ pava-koo, teka teing teing Diumai paning-koonge bauꞌurimaing. Enang arekeeꞌ, diiꞌ ee teing-koo dau basinanka deeaꞌ bakaang norunoruꞌkoo? 27 Eeꞌnoko diiꞌkoo baie noruꞌ mankiꞌoma doong naraangaꞌnooꞌ deto beꞌnuꞌantavura teꞌkoo domampari otopeuꞌ? Otoaꞌ. 28 Eeꞌnoko aming-koo napoꞌ diiꞌ baarong tovang-koo noruꞌ mankiꞌdorikooꞌ? Oovereriai teing iiooꞌnanka tamung dupurimanaꞌ, baarong tuaꞌkoo poreꞌoroainge. 29 Teka ninge eeꞌ naurampimang, aaꞌnaꞌ tampaꞌ nerampurimaung nantoong biikaang meenasi puruꞌuitaaꞌ, bane dauraronanka Solomoniꞌpinaꞌ. 30 Teka Kumponinge baaꞌnanka teeꞌ nerampurimaung deekoꞌ, teing aaꞌnomaing naꞌmung doong-koo domamparara daunaꞌmung maraꞌoko tai-antavaakooꞌ, tee tee teeꞌ nariꞌ tasiꞌperiaing diiꞌke, masikaꞌanta okiꞌnaa otoꞌderurininge, aiꞌ diiꞌ teing deto basinooꞌ noruꞌduri duaanaruriaining.

31 Teeꞌkoo enang tee noruꞌ mankiꞌdoriaꞌ otoaing aaꞌperima, ‘Aming naiampiiꞌnaang?’ eeꞌnoko ‘Arenaaꞌ kurumariiꞌnaang?’ 32 Aing eeꞌ oroꞌ kapooꞌ mutaanang-nupoonge kariaamaing, teka diiꞌ teeꞌ deeaꞌ, aiꞌ diiꞌ Diumai Paning-etaing noruꞌui otong aing ookara kapooꞌ diiꞌ apukaꞌdarimaing. 33 Teeꞌkoo ainkato noruꞌeriaꞌ Kumponing bakaang muuꞌ deto pankaruntoonge noruꞌerimatoai tee ninka bakaang aarumo koompari otoꞌ ninka nariꞌ eeꞌnoko teing aing kapooꞌ apukaꞌdarimaing nariꞌ aruriainge. 34 Teeꞌkoo taneꞌnung doong-koo noruꞌ mankiꞌdoriaukaꞌ. Taneꞌ teꞌmung baka noruꞌaravainaꞌmung. Aiꞌ ookara mankiꞌnanka naꞌmung doong-koo makosinaꞌ bireꞌari otong.”