1 “Tee muuꞌ paninung tee tee-pinaꞌ oroꞌ, naning mintoonau-poꞌnung tero taneꞌke bera nantoong bakanau-koo mintoong-koo bokuvuruꞌnung, naꞌmung doong-koo mintoompariko mooꞌkoo namikue mooꞌuriiꞌnaang tampura; 2 Eeꞌnoko arooꞌaririoꞌ teie bakanau-koo botovuruꞌ. 3 Teketa napoꞌ duaaꞌ deto sirang poioꞌ bera baaveromaa niiꞌning nantoong tamung donkonaioꞌ oovuruꞌ. 4 Eeꞌnoko aaꞌpuruꞌ teing, ‘Diiꞌ aing berira nkanau-koo mintoontariai, eeꞌnoko ninge tee makosinaꞌ mooꞌdampiaing.’ Eeꞌnoko teing berouꞌ mintoong-koo. 5 Teketa napoꞌ duaakiꞌnang eeꞌnoko kamunooꞌnang napoꞌ beuꞌ bera teeꞌ nariꞌ tutung nkovuuꞌnaꞌ nkovuuꞌ. 6 Teketa napoꞌ muung-aapenang beraiꞌnange niiꞌning nantoong tamung donkonaioꞌ oovuruꞌ, eeꞌnoko niaꞌuruꞌ teing, aaꞌpuruꞌ, ‘Diiꞌ aming-koo tamung donkoniri otorimaang eꞌmung ootukunaꞌmung kapooꞌ nkoveriaꞌ?’ 7 Teinge aaꞌpauꞌ, ‘Naninge bokumuriaruko teeꞌ oꞌnorimaang.’ Eeꞌnoko teie aaꞌpuruꞌ teing, ‘Diiꞌ napoꞌ berira nkanooꞌke mintoontariaing, eeꞌnoko mooꞌ makosinaꞌ nkaveriaing.’

8 “Teketa muumpuko teie mintoong okovenunge teing bakaning mintoong-nupoong tarevurikoꞌning bokuvura aaꞌpuuꞌ, ‘Teing nantoong mintoomparirining bokuerira mooꞌ averiaing asiꞌning-eta bera tutunaꞌnupoong-koo basi.’ 9 Teing mintoong-nupoong muung-aapenang bokuvurioꞌ tutumpariruꞌning poroioꞌ mooꞌkoo namikunaꞌ avuruꞌ. 10 Teeꞌkoo teing tutung bokuvurioꞌ mintoong tutumpariruꞌning mmauꞌ nkavaavaing-pinaꞌ noruꞌariruꞌ, teka teing napoꞌ teeꞌ namikunaꞌ mono kante nkakauꞌ. 11 Eeꞌnoko teinge teeꞌ nkavaara minkuminkuauꞌ tee mintoong okovenung, aaꞌpaama, 12 ‘Dake aing damaꞌ mintoong tutumparira narung aua mintoomparirining niiꞌ uipaariiꞌkoo aaꞌnaꞌ mintoomaririning ninka nariꞌ basie mooꞌering.’ 13 Teka teie narung teing-koo karavuma aaꞌpuuꞌ, ‘Ee mmaikoꞌ, ninge diiꞌ orakaꞌ nkorampiaꞌ. Arooꞌeriaruinge ee temiku namiku mintoontarira nka-koo? 14 Nkaverira aung diikaang mooꞌ beriai. Teing damaꞌ bokuaransing teeꞌ nariꞌ avuꞌkoo piamoi oꞌnong. 15 Orakaꞌke kapooꞌ nkaang mooniꞌ ninge piamopeuꞌnaꞌ nariꞌ nko-koo? Aiꞌ diiꞌ domang oraruꞌkiring ee ning tampaꞌ avusiroꞌmarioꞌ?’ 16 Teeꞌ nariꞌ teing nantoong damaꞌdu-nupoong teing ureaavaining, eeꞌnoko ureaamaing teing damaꞌduariaining.”

17 Enang tee Jiisuuꞌ uroitaaꞌ Jerusalemaꞌaape daanto beroma bakaning nanaiꞌketa kenaankara barevare-nupoong taapoꞌ tontaꞌurira teka aaꞌpuruꞌ teing, 18 “Aing ee, Jerusalemaꞌaape merimang eeꞌnoko teka eeꞌnooꞌka naninge tooka kompui ning Tee Naning-naumpoꞌ Paning-etaing tauraꞌmuuꞌnaang aaꞌning-koo Piristiꞌnuka-koo ovontung eeꞌnoko boto naunuka, eeꞌnoko teinge tee ning dupisiꞌkoo manemaavaing. 19 Eeꞌnoko teinge Juꞌdeeaing-anko siꞌmaavaing teka akapeuꞌmaama muraꞌmaavaꞌnaang, eeꞌnoko aaꞌbarataꞌkoo biꞌmaara dupisiꞌmaavaing. Teketa beenang doong deemparako napoꞌ daaꞌmaravaing.”

20 Teketa napoꞌ Siebedi baurinketa beuko Jiisuuꞌanko pouꞌ baurinketa ninka. Pora uroꞌkanooꞌ kinkinura eentavaruꞌ. 21 Jiisuuꞌke aaꞌpuuꞌ, niaꞌuma, “Daꞌ aming kapooꞌ piaromaang?” Eeꞌnoko tenie aaꞌpuuꞌ, “Amainta nnurinketa dake enang eeꞌ miruꞌereaing narung tampavine-aape baꞌnanuaing eeꞌnoko narung mareꞌaanavine-aape daꞌkoo tenang daꞌ daurarong deentaravainang.” 22 Teketa Jiisuuꞌke temainta aaꞌpuretuꞌ, “Deeꞌke noruꞌereaꞌ tee kapooꞌ eentameremaatomaung. Deeꞌke ee teruꞌ ntonaruꞌ orakaꞌ deeꞌnaruꞌ ning naikampainaruꞌ naikirepeuꞌ? Eeꞌnoko tee sisikeera ning meekaꞌantamaravainge ee meekaꞌantararepeuꞌ?” Eeꞌnoko temaintai makuꞌurema aaꞌpuretuꞌ, “Eeꞌ, neeꞌ makosira.” 23 Teketa Jiisuuꞌke aaꞌpuretuꞌ, “Eeꞌ, masikaꞌ deeꞌke naiereaing teruꞌ nkanareng-eta, eeꞌnoko teeꞌ sisikeerai meekaꞌantarareainge ning meekaꞌantamaravainaꞌ, teka tee baꞌnavaꞌnaniꞌ ning-koo tampavine-koo niiꞌnooꞌ mareꞌaanavine-koo ning-koo ninge miruꞌkoo makosi deeaꞌ. Teie Mmaꞌke bampuuꞌnaꞌ baꞌnantareaing.”

24 Eeꞌnoko teinge napoꞌ nanaiꞌke teeꞌ taaravaara teinge iikooꞌaaretuꞌ temainta. 25 Teketa Jiisuuꞌke ookara naroꞌ bokuvurira aaꞌpuruꞌ, “Diiꞌke noruꞌeri otong teing nantoong Juꞌdeeaing-kooning urantanuka biiꞌka ovontumparimaing eeꞌnoko biikaning pankenankai biikaang iriꞌke nantoong etuaarikooꞌ. 26 Teka diiꞌkoo teeꞌ nkoaravaukaꞌnung. Eeꞌ nkoaravaing diiꞌkoo: baa tee naning Kumponing bakaang duta-koo pankaimparaaꞌnaang piavoaing diiꞌkoo meuꞌke tee tee eeꞌnung pakupakunung deemparavaing. 27 Eeꞌnoko napoꞌ baa tee naning diiꞌkoo dau basi deemparaaꞌnaang piavoaing tee tee eeꞌnung napoꞌ diiꞌkoo botovotonaaꞌ otoaing. 28 Ning Tee Naning-naumpoꞌ Paning-etaing teeꞌke, kansiꞌkoo ovoring-pinaꞌ otoꞌkoo moaꞌ, teka pakupakunung deemaraaꞌnaang mouꞌnung, eeꞌnoko nkaang domaang duaꞌkoo teing-koo mmauꞌ booꞌketa simpiriꞌariiꞌnaang.”

29 Teketa tenang Jiisuuꞌ teing ninka bakaning barevare-nupoong Jerikooꞌnamono sipaara beroko nantoong karingai siompauꞌ tee. 30 Kenaanka naninka kaputuꞌka taung miiringe baꞌnanuresi otorekoꞌ, eeꞌnoko tenang tee Jiisuuꞌ teketa tankinuko taaravureta tenaanka bokurema aaꞌpuretuꞌ, “Ovoring, Deevitaꞌ bakanaving-koong, piaamereai neeꞌ.” 31 Teka nantoong karingai akaꞌpaarema dooroompareeꞌnaang botoaaretuꞌ. Teka tenaanka baruꞌ aaꞌnaꞌ bokuretuꞌ aaꞌpurema, “Ovoring, Deevitaꞌ bakanaving-koong, piaamereai neeꞌ.” 32 Jiisuuꞌke teꞌ datearara bokuvuretuꞌ tenaanka, teketa aaꞌpuretuꞌ, “Deeꞌ ninge arekeeꞌ nkorampeeꞌnaang piaroremang?” 33 Tenaankai nauvurema aaꞌpuretuꞌ, “Ovoring ee, neeꞌ ookampeeꞌnaang piamoremang.” 34 Jiisuuꞌ bakaang domang aaꞌnaꞌ piaavouꞌ tenaanka-koo, eeꞌnoko beekaang duta kompureko namuꞌke bantoreta ookuretuꞌ. Teketa Jiisuuꞌ siompuretuꞌ.